Umuyobozi wa UNICEF yasuye u Rwanda, mu ruzinduko rwa mbere muri Afurika
Amakuru

Umuyobozi wa UNICEF yasuye u Rwanda, mu ruzinduko rwa mbere muri Afurika

NTAWITONDA JEAN CLAUDE

April 1, 2022

Catherine M. Russel, Umuyobozi Nshingwabikorwa w’Ishami ry’Umuryango w’Abibumbye ryita ku bana (UNICEF) ku Isi, yatangiye uruzinduko rw’iminsi itatu mu Rwanda, akaba ari rwo ruzinduko rwa mbere akoreye ku mugabane w’Afurika kuva yahabwa izo nshingano muri Gashyantare uyu mwaka.

Ubuyobozi bwa UNICEF mu Rwanda bwamwifurije uruzinduko ruhire no kuzagira ibiganiro byiza n’urubyiruko, abayobozi bo mu nzego zitandukanye za Guverinoma ndetse by’umwihariko abana b’Abanyarwanda.

Biteganyijwe ko Madamu Catherine Russel azahura akanagirana ibiganiro n’abayobozi bo ku rwego rwo hejuru muri Guverinoma y’u Rwanda barimo na ba Minisitiri batandukanye.

Nanone kandi uyu muyobozi azasura umushinga uterwa inkunga na UNICEF mu ishuri riherereye mu Karere ka Kayonza mu Ntara y’Iburasirazuba, aho amashuri yashyiriweho gukemura ibibazo byihariye akomeje kugira uruhare rukomeye mu kugabanya ibibazo byo gusoma, kwandika n’imibare.

Madamu Catherine Russel azanasura Urugo Mbonezamikurire ruherereye ku Isoko rya Rwamagana rifasha abacuruzi bo muri iryo soko mu gukurikirana imikurire n’uburere bw’abana babo.

Biteganyijwe ko azasoreza uruzinduko rwe mu gihugu cy’abaturanyi cya Repubulika Iharanira Demokarasi ya Congo (RDC) mbere yo gusubira I New York muri Leta Zunze Ubumwe z’Amerika.

Catherine M. Russel yagiye ku buyobozi bwa UNICEF guhera taliki ya 1 Gashyantare 2022, akaba yari abaye umugore wa kane uyoboye uwo muryango mu myaka 75 ishize. Uyu mugore yitezweho kuzana impinduka zijyanye no guhanga udushya muri politiki igamije kubaka ubushobozi bw’abantu batereranywe mu bice bitandukanye ku Isi. harimo na gahunda zitanga umusaruro wo ku rwego rwo hejuru mu kurinda abagore n’abakobwa by’umwihariko ahabaye intambara n’ibindi biza karemano.

Mbere yo gukora izo nshingano, hagati y’umwaka wa 2020 n’uwa 2022, Russel yakoraga muri Guverinoma ya Leta Zunze Ubumwe nk’Umunyamabanga wa Perezida n’Umuyobozi ushinzwe abakozi mu Biro by’Umukuru w’Igihugu (White House)

Muri izo nshingano, yahurije hamwe ibibazo bibangamira abagore bikigaragara muri Politiki mpuzamahanga ya USA, ahagararira igihugu cye mu bihugu birenga 45 ndetse akorana na guverinoma z’amahanga, imiryango mpuzamahanga, na sosiyete sivile. Yabaye ku ruhembe rw’imbere mu kubaka Gahunda Mpuzamahanga ya mbere ya USA igamije kongerera ubushobozi abakobwa b’abangavu.”

Mbere y’umwaka wa 2020, Madamu Russel yakoze nk’Umunyamabanga wungirije wa Perezida muri White House ku buyobozi bwa Perezida Barack Obama, Umujyanama Mukuru ku bibazo by’abagore ku rwego mpuzamahanga muri Komite ya Sena ishinzwe Ububanyi n’Amahanga.

Mbere y’uko yinjira muri Guverinoma mu 2020, yigishije mu Ishuri rya Havard Kenedy nk’umwe mu bize mu Ishuri Rikuru ryigisha ibya Politiki. Yanabaye Umuyobozi w’Inama y’Ubutegetsi w’Ihuriro rishinzwe Politiki Mpuzamahanga y’Abagore (Women’s Foreign Policy Group), umwe mu bagize Inama y’Ubutegetsi ya “Women for Women International”, umwe mu bagize Inama Njyanama y’Umuryango Sesame Street, umwe mu bagize Umuryango KIVA ndetse n’umwe mu bashyira mu bikorwa gahunda yiswe Trust Women y’Umuryango Thomson Reuters Foundation.

Madamu Russel afite Impamyabumenyi y’icyiciro cya kabiri mu bucurabwenge/ filozofiya (Philosophy) yakuye muri kaminuza ya Boston ndetse abona n’impamyabumenyi y’icyiciro cya gatatu cya kaminuza mu by’amategeko (Juris Doctor degree) muri Kaminuza kigisha Amategeko ya Washington.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA