Umwalimu SACCO yijeje abarimu kuvugurura ikoranabuhanga rya Moblie Banking
Amakuru

Umwalimu SACCO yijeje abarimu kuvugurura ikoranabuhanga rya Moblie Banking

KAMALIZA AGNES

January 2, 2024

Ubuyobozi bwa Koperative Umwalimu SACCO bwemeje ko muri uyu mwaka wa 2024 bugiye kurushaho kunoza ikoranabuhanga ryoroshya serivisi, by’umwihariko Mobile Banking ifasha abarimu kubitsa, kubikuza, gusaba inguzanyo n’ibindi bitabasabye kujya ku mashami abegereye.

Ubwo buyobozi buvuga ko mu bikorwa by’ibanze bizibandwaho muri uyu mwaka wa 2024, ari ugukoresha ikoranabuhanga kuko rizagabanya ingendo abarimu bakoraga bajya gushakisha serivisi.

Nubwo hari serivisi zimwe na zimwe sisanzwe zitangwa hifashishijwe ikoranabuhanga, ubuyobozi bw’iyo Koperative bwemeza ko hari ahakigaragara icyuho by’umwihariko muri sisitemu ya Mobile Banking idakora neza.

Uwambaje Laurence, Umuyobozi Mukuru wa Koperative Umwalimu SACCO, avuga ko bagiye kurushaho kunoza iryo koranabuhanga bagamije kugabanya ingendo mwarimu akora ajya gusaba serivisi z’imari.

Ati: “Igikorwa cyo kwibandwaho ni uburyo bwo gutanga serivisi tugabanya ikiguzi bisaba mwarimu kugira ngo akore urugendo rugera kuri serivisi z’imari tumuha. Aha rero dushyira imbaraga cyane mu gukoresha uburyo bugezweho, aho kugira ngo umwarimu aze ku ishami abe yakwiha serivisi wenyine.”

Yakomeje agira ati: “Twashyizeho ko tuzakomeza kwibanda cyane kuri ibyo bikorwa bituma serivisi zegera abanyamuryango, kandi noneho bakabyikorera bitabasabye kuza ku ishami, bakinjira muri sisitemu zacu ako kanya tugahita tubona igikozwe.”

Yongeyeho ko aho zimwe muri sisitemu z’ikoranabuhanga zitakoraga neza hazibandwa mu kuzitunganya no kurushaho kuzongerera ubushobozi.

Ati: “Hamaze iminsi havugwa ko Mobile Banking idakora, neza ubu twashyizeho ko tuzibanda cyane mu kuyitunganya igakora neza kugira ngo abanyamuryango babone serivisi zihuse. Twashyizeho sisitemu yo gusaba inguzanyo hifashishijwe ikoranabuhanga, aho guca kuri Email twashyizeho sisitemu izajya ikora isesengura ry’inguzanyo kugira ngo umunyamuryango abone amakuru y’aho inguzanyo igeze ndetse n’ibibura akabyohereza atiriwe aza ku ishami.”

Kugeza ubu Koperative Umwalimu SACCO ifite amashami 30, kandi ifite imikoranire n’Umurenge SACCO aho kuri ubu abarimu basigaye basabira serivisi ahaboroheye.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA