Uretse CHOGM2022, u Rwanda rwiteguye indi nama ikomeye muri Kamena
Amakuru

Uretse CHOGM2022, u Rwanda rwiteguye indi nama ikomeye muri Kamena

NTAWITONDA JEAN CLAUDE

February 28, 2022

Guhera taliki ya 6 kugeza ku ya 16 Kamena 2022, i Kigali hitezwe kubera inama mpuzamahanga izaba yiga ku iterambere ry’itumanaho ku Isi hagamijwe kureba uko ibice bisigaye bitarahuzwa n’ikoranabuhanga ry’itumanaho byahuzwa byihuse mu rwego rwo koroshya kugera ku iterambere rirambye.

Insanganyamatsiko y’iyo nama iri mu zikomeye ku Isi, iragira iti: “Kugeza itumanaho ku bo ritarageraho mu guharanira iterambere rirambye.”

Iyi nama izaba mu kwezi u Rwanda rwiteguyemo indi nama ikomeye y’Abakuru b’Ibihugu na Guverinoma bo mu bihugu bigize Umuryango w’Ibihugu bikoresha Ururimi rw’Icyongereza (CHOGM2022) izaba mu cyumweru cyo ku italiki ya 20 Kamena 2022.

Iyo nama mpuzamahanga itanga amahirwe yihariye yo gutegura inzira n’uburyo bushya bwo gushimangira ubufatanye mu kwagura ihuzanzira ry’imiyoboro y’itumanaho ndetse no gutegura ibisubizo bishya by’ikoranabuhanga mu gihe imyaka ikomeje gucuma yegera ku kugera ku Ntego z’Iterambere Rirambye (SDGs).

Ayo makuru yatangajwe mu gihe ku wa Gatanu w’icyumweru gishize, Perezida wa Repubulika y’u Rwanda Paul Kagame, yakiriye Umuyobozi w’Ishami rishinzwe iterambere ry’itumanaho mu Kigo Mpuzamahanga cy’Itumanaho (ITU) Doreen Bogdan-Martin mu biganiro bigamije gutegura iyo nama yitezwe muri Kamena uyu mwaka.

Abarimo gutegura iyo nama iziga ku iterambere ry’itumanaho ku Isi, bavuga ko izakorwamo ibikorwa bitandukanye birimo n’ibiganiro bizahuza abafatanyabikorwa bagamije gushaka umuti urambye wo guhuza abatuye Isi hifashishijwe ikoranabuhanga rigezweho (Partner2Connect Digital Development Roundtable).

Byitezwe ko iyi nama izabanzirizwa n’indi ihuza urubyiruko (Generation Connect Global Youth Summit) hagati y’italiki ya 2 kugeza ku ya 4 Kamena, igamije kwimakaza ikoranabuhanga mu isakazamakuru mu gisekuru gishya cy’urubyiruko.  

Hagati aho, Ikigo mpuzamahanga cyo mu Bwongereza gitanga serivisi za telefoni (Inmarsat) cyatangaje ko kizitabira ibyo biganiro bizahuza abafatanyabikorwa by’umwihariko hagati ya taliki ya 6-7, kandi ko cyiteguye gutanga miliyoni 1.2 z’amadolari y’Amerika yo kugura umuyoboro w’ibyogajuru  mu Ihuriro ryiswe “Partner2Connect” (P2C).

Iyo mpano yitezweho gufasha kugera ku ntego yo guhuza abantu ku ikoranabuhanga aho bari hose, biturutse ku kwifashisha ikoranabuhanga ry’ibyogajuru mu guhangana n’ibiza, kwiyubaka ndetse no guhangana n’ibibazo bitandukanye by’ubuzima bwa buri musi.

Ihuriro Partner2Connect rigizwe n’abafatanyabikorwa batandukanye, rikaba ryarashinzwe n’ubuyobozi bwa ITU mu kwimakaza iterambere ry’ihuzanzira rya murandasi n’impinduka mu by’ikoranabuhanga zigera mu bice bigoranye kugezwaho ikoranabuhanga.

Guhera mu mwaka wa 2021, iryo huriro ryatangiye gahunda yo gukusanya ubushobozi binyuze mu bufatanye bw’inzego zitandukanye, mu guharanira ko ihuzanzira rya murandasi ryagera kuri buri wese aho ari hose, harimo no gushyigikira by’umwihariko abaturage bo mu bihugu bikiri mu nzira y’amajyambere bakunze guhura n’ibiza bituruka ku bikorwa bya muntu, Leta z’ibyo bihugu ndetse n’ibigo by’abagiraneza birimo gukora ibishoboka byose ngo bibagezeho iryo koranabuhanga.

Umuyobozi Mukuru wungirije wa Inmarsat Donna Bethea-Murphy, yagize ati: “Twishimiye kwesa imihigo no gukomeza ubufatanye na Partner2Connect Coalition, kugira ngo tubafashe kugera ku ntego zo guhuza abantu ahantu hose. Imihigo yatangajwe uyu munsi izafasha guharanira ko ikoranabuhanga ryacu ry’ibyogajuru rishobora gukoreshwa kugira ngo abantu bose bahuzwe neza. ”

Doreen Bogdan-Martin, wa ITU, na we yagize ati: “Ndashimira Inmarsat ku ruhare runini yagize mu gushyigikira ibikorwa bya ITU byo guhangana n’ibiza ikoresheje umuhigo yiyemeje kwesa binyuze muri Partner2Connect Digital Coalition. Iri huriro ni amahirwe akomeye yo guteza imbere urwego rw’Ikoranabuhanga mu isakazabumeyi binyuze mu gufata ingamba nshya, kwimakaza ubufatanye no gukusanya ubushobozi bukenewe mu guhuza abatari bagerwaho na murandasi.”

Yakomeje asaba abafatanyabikorwa bose guhaguruka bagahuza ababarirwa muri miliyari 2.9 bataragerwaho n’ihuzanzira rya internet. Ati: “Nakiriye neza uku kwiyemeza gushyigikira P2C kandi niteguye gukomeza kubona abafatanyabikorwa bandi benshi biyemeza kugira ngo duhuze Isi yose mu ikoranabuhanga mu buryo bushyitse.”

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA