Urubyiruko n’abagore bagiye guhugurwa mu bukanishi n’imicungire y’amazi

Urubyiruko n’abagore bagiye guhugurwa mu bukanishi n’imicungire y’amazi

Imvaho Nshya

February 26, 2022

Ikigo gitunganya amazi kikanayageza ku baturage “Ayateke Star Company Ltd” cyatangije umushinga wo guhugura abakozi, barimo urubyiruko rw’abasore n’inkumi bakiva mu mashuri yisumbuye bose bagera kuri 650 kugira ngo bagire ubumenyi mu byo gukanika iby’amazi buzuze ibisabwa ku isoko ry’umurimo.

Aya mahugurwa azibanda ku bice byo mu cyaro. Umushinga wo gutangiza aya mahugurwa  wamuritswe ku mugaragaro  taliki 25  Gashyantare 2022, imbere y’abafatanyabikorwa n’abandi bikorera bafite imishinga itunganya amazi mu bice bitandukanye by’igihugu.

Umuyobozi wa Ayateke Star Company Ltd, Eng. Sebikwekwe Cyprien yavuze ko amahugurwa urwo rubyiruko n’abakozi basanzwe mu by’amazi bagiye guhabwa azatuma urwego rwo gukanika amazi rubona ingufu n’abakozi babifitiye ubushobozi.

Ati : “Tuzabahugura ku bijyanye n’uburyo bahuza amatiyo y’amazi, tubahugure n’uburyo bacunga abakiliya.”

Akomeza agira ati : “Uyu mushinga wacu uzakorwa mu gihe cy’imyaka ibiri, tukaba tuzahugura abantu 650. Mu bo tuzahugurwa Ayateke Star Company Ltd  yo ubwayo ifite abakozi 364, tuzahera ku bakozi bacu ariko kubera ko dufite n’abandi dukorana uyu murimo, nk’uko turi ibigo 17, twese hamwe twakoze urutonde rw’abantu bagomba guhugurwa.”

Umuyobozi wa Ayateke Star Company Ltd, Eng. Sebikwekwe Cyprien

Eng. Sebikwekwe avuga ko uyu mushinga uzanibanda ku basore n’inkumi bakirangiza amashuri yisumbuye batarengeje imyaka 24 y’amavuko.

Mu bijyanye n’icyo umushinga uje gusubiza mu batekenisiye n’imicungire mu by’amazi.  Eng. Sebikwekwe yagize ati : “Ni uko muri rusange twari dufite ikibazo cyuko abantu bazi iby’amazi usanga batabikora mu buryo bwa kinyamwuga; usanga abakozi bagifite ubushobozi buke, icyo uyu mushinga uzakemura ni ukubakira ubushobozi abakozi b’ibyo bigo.”

Mugwaneza Vincent de Paul wari uhagarariye Ikigo Gishinzwe Amazi, Isuku n’Isukura “WASAC” akaba ashinzwe serivisi z’amazi, isuku n’isukura mu bice by’icyaro yavuze ko muri rusange igihugu kigeze heza mu kugeza amazi mu baturage cyane cyane mu cyaro.

Yakomeje avuga ko imishinga nk’iyo yongerera ubumenyi abakora mu by’amatiyo y’amazi ifasha urwo rwego.

Mugwaneza Vincent de Paul, umukozi muri WASAC ushinzwe serivisi z’amazi, isuku n’isukura mu bice by’icyaro

Ati : “Iradufasha kuko nkeka ko mu gihe kiri imbere ibikorwa remezo tuzaba dufite bizaba bibungabunzwe cyangwa se bisanwa ku gihe kandi mu buryo buboneye. Ni ikintu cyiza cyane, kuko ushaka kugeza amazi meza ku bantu ntabwo ureba ku bikorwa bibashyira amazi ahubwo ureba kure yaho ukareba ku buryo bwo kubungabunga ibyo tugeraho.”

Mugwaneza yavuze ko no mu rwego rw’abatekenisiye mu by’amazi bagikenewe kuko gahunda yo kugeza amazi ku baturage igikomeje nk’uko biri mu ntego igihugu kihaye yo kugeza amazi ku baturage bose 100%  kugeza mu 2024.

Uyu mushinga wamuritswe ufite agaciro k’amayero ibihumbi 400 asaga  miliyoni 400 z’amafaranga y’u Rwanda, igice kimwe cy’amayero ibihumbi 200 yatanzwe n’umuterankunga GIZ, andi ava mu kigo Ayateke Star Company Ltd nk’uko amabwiriza mu gupiganira umushinga yasabaga ko upigana aba afite kimwe cya kabiri cy’ayo yifuza gupiganira.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA