Urubyiruko rw’Abayisilamu rwiyemeje kwirinda ingengabitekerezo ya Jenoside
Amakuru

Urubyiruko rw’Abayisilamu rwiyemeje kwirinda ingengabitekerezo ya Jenoside

MUTETERAZINA SHIFAH

April 10, 2024

Urubyiruko  rw’Abayisilamu mu Rwanda rwagaragaje ko rufite uruhare rinini mu kwirinda no gukumira ingengabitekerezo ya Jenoside ndetse n’ubuhezanguni mu rwego rwo kurushaho kubaka Igihugu kizira amacakubiri. 

Mu gitondo cyo kuri uyu wa Gatatu tariki 10 Mata 2024, Abayisilamu mu Rwanda bifatanyije n’abandi bo ku Isi mu kwizihiza umunsi Mukuru wa Eid Fitri nyuma y’igisibo cy’ukwezi gutagatifu kwa Ramadhan, mu isengesho ryakorewe kuri Kigali Pélé Stadium ku rwego rw’Igihugu.

Nyuma y’isengesho, bamwe mu rubyiruko baganiriye n’Imvaho Nshya bayitangarije ko bafite inshingano yo kurwanya ingengabitekerezo ya Jenoside n’irindi vangura iryo ari ryo ryose.

Kuba mu idini ya Isilamu babigisha bakiri bato, bituma bakura bazi ko urubyiruko ari ishingiro rya byose kandi biteguye kumva bakumvira nkuko Ndayishimiye Said abisobanura. 

Ati: “Dushingiye ku ntumwa y’Imana Muhammad, Imana imuhe amahoro n’imugisha, batubwira ko urubyiruko ari rwo ruba rufite imbaraga nyinshi kugira ngo rwirinde ndetse rurinde abandi, idini ndetse n’Igihugu.”

Ibi kandi binashimangirwa na Is’haq uvuga ko urubyiruko rugomba kwirinda ingebitekerezo n’ubuhezanguni ubwo ari bwo bwose. 

Ati: “Amategeko y’idini yacu atubuza guhohotera umuntu uwo ari we wese; umukoro wacu ni uwo kwirinda ingengabitekerezo n’ubuhezanguni ubwo ari bwo bwose, kurwana intambara yo kwirinda amakosa nk’ay’urubyiruko rwatubanjirije rwaguyemo.”

Nubwo bishimira ko basoje igisibo, ariko ngo ni inshingano za bo gusengera Igihugu, kuko ibi bihe biba bitoroshye  ku barokotse Jenoside yakorewe Abatutsi, nkuko Uwase Queen Latifa abisobanura.

Ati: “Ni byiza kuba twasoje igisibo turi mu gihe cyo kwibuka Jenoside yakorewe Abatutsi, ni ibihe bitoroshye kuko imitima y’abarokotse iba ishenjaguritse,  turabasengera kandi  tukarushaho no kubegera, kuko Isilamu ni ugutabarana.”

Yongeraho ati: “Ikindi kandi urubyiruko dukoresha imbuga nkoranyambaga cyane, twandike, kuri za Instagram, X, Tik Tok, tugaragaze amateka yabaye mu gihugu cyacu ya nyayo. Turwanye abayavuga nabi n’abapfobya, turiteguye kuko aho amacakubiri yatugejeje turahazi ntitwahifuza ukundi.”

Urwo rubyiruko ruvuga ibi mu gihe Mufuti w’u Rwanda Sheikh Hitimana Salim, asaba abayisilamu bo mu Rwanda gukomeza indangagaciro batozwa n’idini yo gufasha no kuba hafi abababaye. 

Ati: “Turasaba Abayisilamu gukomeza kurangwa n’umuco mwiza dutozwa n’idini yacu wo gufasha, gukomeza abarokotse Jenoside no kubaba hafi.”

Yongeraho ati: “Ikindi ni uko umuco w’idini uvuga ko iyo ari ibihe by’akababaro nta byishimo bihaba, baributswa ko ibyo kwishimisha no gusabana ntabwo ari igihe cyabyo, iki ni igihe cyo kwibuka ndetse no kugandara.”

Mufuti w’u Rwanda aributsa Abayisilamu kuzirikana no kuba hafi abarokotse Jenoside yakorewe Abatutsi.
Is’haq avuga ko nk’urubyiruko biteguye kumva no kumvira, mu rwego rwo kwirinda kugwa mu makosa nkay’urubyiruko rw’ababanjirije rwaguyemo.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA