USA: Umupolisi washumurije imbwa umwirabura arakorwaho iperereza
Amakuru

USA: Umupolisi washumurije imbwa umwirabura arakorwaho iperereza

NTAWITONDA JEAN CLAUDE

July 25, 2023

Abayobozi bo muri Leta ya Ohio batangiye iperereza ku kibazo cy’umupolisi washumurije imbwa umushoferi w’ikamyo w’umwirabura wari wakoze ibishoboka byose ngo atagora inzego z’umutekano zamuhagaritse. 

Imbwa y’umupolisi yibasiye uwo mushoferi w’ikamyo mu Mujyi wa Circleville wa Ohio muri Leta Zunze Ubumwe z’Amerika (USA) ku wa 4 Nyakanga. 

Uwo mushoferi w’ikamyo ubwo yahagarikwaga yananiwe guhagarara ku gihe kugira ngo abanze agenzurwe n’abapolisi bari mu kazi. 

Nyuma yo kumukurikirana, uwo mushoferi wamenyekanye nka Jadarrius Rose, yasohotse muri iyo kamyo yamanitse amaboko bigaragara ko yemeye gufatwa ariko ashumurizwa imbwa y’umupolisi iramuruma. 

Uyu mushoferi uri mu kigero cy’imyaka 23 yabwiye abashinzwe umutekano bitaba nomero ya 911, ko yananiwe guhagarara kuko yatinyaga kugirirwa nabi ariko aza kubona ko nta yandi mahitamo. 

Polisi ikorera mu Mujyi wa Circleville yavuze ko uwo musore yahagaritswe nyuma yo kubona ko ikamyo yari atwaye itagiraga ibikobokobo nk’uko byemejwe na Meya w’uwo Mujyi Don McIlroy.

Amashusho yafashwe na camera ziba ku myambaro y’abapolisi  ndetse n’imwe yo ku muhanda agaragaza ko abo bapolisi bakurikiranye uwo musore umwanya munini akaza kwemera gufatwa amaze kubona abapolisi bamuzengurutse. 

Ubwo imodoka yahagararaga, umwe mu bapolisi yumvikanye abwira uwo musore kujya hasi cyangwa imbwa zikamurya.

Ariko undi mupolisi bikekwa ko yari aturutse ku cyicaro gikuru yumvikanye asaba abandi kutarekura imbwa mu gihe uwo musore yamanitse amaboko. 

Uwo musore yubahirije amabwiriza yose yasabwaga akimara guhagarikwa, ahereye ku kumanika amaboko, gupfukama n’ibindi. 

Ariko imbwa y’umupolisi yarekuwe yamaze kwemera maze iramukurubana mu byatsi biri mu nkike z’umuhanda, ndetse iranamukomeretsa. 

Ubwo abapolisi bamukurikiranaga, mu Rose yigiriye inama yo guhamagara nomero y’ubutabazi ya 911 avuga ko ahangayikiye ubuzima bwe kuko abapolisi bashaka kumwica. 

Yavuze ko atumva impamvu bose bakuyemo imbunda zabo biteguye kurasa ubwo bamuhagarikaga kandi ari umushoferi wahitaga.

Mu majwi yafashwe ahamagara 911 yumvikanye agira ati: “Numvise ntatekanye ku buryo byatuma mpagarara.” Uwamwakiriye ni we wamugiriye inama yo guhagarara. 

Rose yabanje kuvurirwa aho imbwa yamuririye mbere yo kujyanwa gufungwa akurikiranyweho kwanga kubahiriza amabwiriza ya Polisi nk’uko byemejwe n’Ibiro Ntaramakuru by’Abongereza. 

Nyuma y’imimsi mike yararekuwe ariko hatangiye iperereza ku mbaraga z’umurengera zakoreshejwe ku muntu wari wamanitse amaboko.

Mcllory yabwiye itangazamakuru ko umupolisi warekuye imbwa yahanwe ndetse agahagarikwa by’abagateganyo mu gihe harimo gukorwa iperereza ricukumbuye. 

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA