Uyu munsi uwatekereza Jenoside ni we byagora-Hon. Bamporiki
Amakuru

Uyu munsi uwatekereza Jenoside ni we byagora-Hon. Bamporiki

NTAWITONDA JEAN CLAUDE

March 20, 2022

Umunyamabanga wa Leta muri Minisiteri y’Urubyiruko n’Umuco Hon. Bamporiki Edouard yavuze ko akurikije icyerekezo Ubuyobozi bw’Igihugu bufite no kwimakaza ubunyarwanda, uwatekereza Jenoside uwo ari we wese byamugora.

Yabigarutseho  uyu munsi ku wa 19 Werurwe 2022, mu kiganiro yatanze nyuma y’umuganda wihariye w’urubyiruko ruri ku rugerero, aho  yifatanyije n’abaturage b’Umurenge wa Cyanika mu Karere ka Nyamagabe, hakaba hakozwe isuku ku Rwibutso rwa Jenoside rwa Cyanika ahashyinguye imibiri irenga ibihumbi 50 y’Abatutsi biciwe muri aka gace.

Ikiganiro cyagarutse ku ruhare rw’urubyiruko mu kurwanya ingengabitekerezo ya Jenoside n’umusanzu warwo mu bikorwa byo Kwibuka ku nshuro ya 28 Jenoside yakorewe Abatutsi mu 1994.

Hon. Bamporiki yagize ati: “ Nkurikije ubuyobozi bwacu icyerekezo bufite, umubabaro wacu w’amateka yacu, ni amateka. Uyu munsi uwatekereza Jenoside uwo ari we wese ni we byagora, ndabizi ko n’uwabitekereza mu bana nka batanu bari ku rugerero byamugora, muri abo batanu bitari byajya no mu mategeko”.

Yavuze ko Abanyarwanda bagomba  gukomeza kurinda ibyiza u Rwanda rwagezeho bubaka ubushobozi butuma  utekereza nabi amenyekana akabihanirwa. Ati: “ … ibitekerezo byacu bikajya mu murongo wo kubaka u Rwanda”. 

Yavuze ko u Rwanda rwabayemo Jenoside, abayikoze ari Abanyarwanda aho ubutegetsi bubi bwigishije umuntu kwica umuturanyi mugenzi we, avuga ko urubyiruko rugomba kubisobanukirwa rukitandukanya n’abapfobya Jenoside yakorewe Abatutsi mu 1994 n’ingengabitekerezo yayo.

Yagize ati: “Twebwe abari muri Leta y’Ubumwe, abana b’Abanyarwanda bakura  uyu munsi aho ibyari amacakubiri tubigira amateka, ubunyarwanda bukatwubakira ejo hazaza ayo mahirwe tuyabyaza musaruro ki? Ni  aho ruzingiye. Icya mbere tugomba kwitandukanya  ijana ku ijana n’abapfobya, bagahakana Jenoside yakorewe Abatutsi ndetse tukarwanya ingengabitekerezo ya Jenoside iyo iva ikagera”.

Yongeyeho ati: “Ariko dushobora kuzagira n’izindi ngorane aho mu bindi bihugu, abantu batigira ku mateka yacu no ku mateka y’ibindi bihugu ababaje, abantu bakajya muri Jenoside ishobora gukorerwa no mu bindi bihugu. Aho bibaye u Rwanda ruratabara ni ikimenyetso cy’uko iyo wababaye cyane uba uzi icy’umubabaro uvuze bigatuma uhora witeguye ko uwababara nk’uko wababaye wamutabara”.

Hon. Bamporiki yavuze ko Abanyarwanda bakwiye gukomeza kuba maso kugira ngo hato hatagira ubasubiza inyuma abiba amacakubiri.

Ati: “Niba rero dutabara ahandi tujye duhora turi maso kugira ngo umwe muri twebwe washaka kudusubiza inyuma  tujye twitabara nta cyaha arakora, tujye twitabara nta kintu arakora kidutwara umuntu”.

Uyu muganda wihariye w’urubyiruko wibanze ku gukupakupa ibyatsi mu busitani bw’urwibutso, gukoropa no gukubura ku rwibutso.

Hon. Bamporiki afatanyije n’abayobozi b’Akarere ka  Nyamagabe bateye indabyo ku cyobo cyakuwemo imibiri irenga 100 y’Abatutsi biciwe kuri Paruwasi ya Cyanika. Iyi mibiri yagaragajwe n’umwe mu rubyiruko  mu 2019.  Iki gikorwa cyakozwe mu rwego rwo gusigasira ibimenyetso bya Jenoside yakorewe Abatutsi mu 1994.

Yasabye n’urubyiruko ruturiye urwibutso kujya rwihuza rugategura umuganda nk’uriya  rutagombye gutegereza ko igihe cyo kwibuka cyegereza. Avuga ko ibi biri mu rwego rwo guha agaciro abarushyinguyemo no kurusigasira.

Umuganda wihariye w’urubyiruko ukaba wanabereye mu Gihugu hose.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA