Volleyball: Gisagara VC yegukanye umwanya wa gatatu muri Afurika
Amakuru

Volleyball: Gisagara VC yegukanye umwanya wa gatatu muri Afurika

NTAWITONDA JEAN CLAUDE

May 16, 2022

Umwanya wa gatatu

Gisagara VC 3-1 Port de Douala

Umukino wa nyuma

Al Ahly 3-1 Esperance de Tunis

Ikipe ya Gisagara VC yaserukiye u Rwanda mu mikino y’Afurika y’amakipe yabaye aya mbere iwayo mu bagabo  “Men’s African Volleyball Clubs Championship 2022” yitwaye neza ikora amateka yegukana umwanya wa 3  iba ikipe ya mbere mu Rwanda ibashije kwegukana umwanya nk’uyu ku rwego rw’Afurika.

Iyi kipe yitwaye neza yegukana umwanya wa 3  itsinze ikipe ya Port de Douala yo muri Cameroun amaseti 3-1 (18-25, 25-23, 25-18 na 25-18).  Gisagara VC yabaye  ikipe ya  mbere mu mateka y’u Rwanda  isoreje ku mwanya wa 3 mu mikino y’Afurika  kuko iheruka gukora aya mateka ni UNR VC muri 2011 aho  yasoreje ku mwanya wa 4.

Inzira Gisagara VC  yanyuzemo

Ikipe ya Gisagara VC  yari mu itsinda D hamwe na Nigeria Customs (Nigeria), Port de Douala (Cameroun) na  Equity Bank (Kenya).  Mu mikino y’amajonjora mu itsinda,  Gisagara VC yatsinze Port de Douala amaseti 3-1 (25-18, 20-25, 25-21  na  31-29), itsinda Equity Bank amaseti 3-1 (25-18, 22-25, 25-15 na  25-18) inatsinda Nigeria Customs amaseti 3-2 (20-25,25-16,24-26,25-17  na  15-13).

Muri ¼ cy’irangiza, ikipe ya Gisagara VC yatsinze  CO Kelibia yo muri Tunisia amaseti 3-2  (29-27, 22-25, 16-25, 25-23  na  15-12).  Muri ½  yatsinzwe na Esperance Sportive de Tunis yo muri Tunisia amaseti 3-0 (25-21, 25-14 na 25-20).

Akumuntu Cavalo Patrick (ibumoso), kapiteni wa Gisagara VC ari kumwe na mukuru we, Ndamukunda Flavier (iburyo)

Mu guhatanira umwanya wa 3, Gisagara VC yitwaye neza itsinda Port de Douala amaseti 3-1 . Aya amakipe yombi  akaba yari no mu itsinda rimwe.

Ikipe ya Gisagara VC iyi yari  inshuro ya 2 yitabiriye  imikino y’Afurika kuko muri 2019 yitabiriye bwa  mbere ubwo iyi mikino yaberaga mu Misiri maze isoreza ku mwanya wa 10 mu makipe 22 yari yitabiriye.

Al Ahly yegukanye igikombe ikomeza kubaka ibigwi

Ikipe ya Al Ahly  yo mu Misiri ni yo yegukanye igikombe cy’Afurika itsinze ku mukino wa nyuma ikipe ya  Esperance de Tunis (Tunisia) yari ifite igikombe giheruka cya 2021.

Muri uyu mukino Al Ahly  yatsinze Esperance de Tunis amaseti 3-1 (25-22, 25-22, 24-26 na 25-17).

Ikipe ya Al Ahly yegukanye igikombe cy’Afurika ku nshuro ya 15

Ikipe ya Al Ahly  ikomeje kubaka ibigwi kuko ni yo imaze kwegukana iki gikombe cy’Afurika inshuro nyinshi (15) mu gihe ikipe iyikurikiye, CS Sfaxien (Tunisia) imaze kwegukana ibikombe 6 hakaza Zamalek VC (Misiri) na Esperance de Tunis (Tunisia) zifite ibikombe 5.

Uko amakipe yakurikiranye

Imikino y’Afurika y’uyu mwaka wa 2022 yatangiye taliki 08 isozwa 16 Gicurasi yitabirwa  n’amakipe 14.  Ikipe ya Al Ahly ( Misiri) yasoreje ku mwanya wa mbere ikurikirwa na Esperance de Tunis (2),Gisagara VC (3), Port Douala (4), KPA (5), Club Olympique de Kelibia (6), Nigeria Customs  (7),FAP (8),AS Douanes (9), Equity Bank (10), Madda Walabu University (11), AS INJS (11), VC Espoir (13)  na Wolaitta Dicha (14).

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA