Ikipe ya REG VC yemeje Kwizera Pierre Marchal nk’umutoza mukuru  aho yasimbuye Mugisha Benon wari umutoza w’iyi kipe kuva mu Kwakira 2018 akaba yarasezerewe mu ntagiriro za Mata 2022 kubera umusaruro muke.

Umutoza Mugisha yari yaje muri REG VC asimbuye Kwizera Pierre Marchal wabaye umutoza ari n’umukinnyi nyuma y’uko uwari umutoza mukuru Mana Jean Paul yari amaze gutandukana n’iyi kipe muri 2017.

Kwizera Pierre Marchal wabaye umukinnyi w’ikipe y’igihugu akanakina mu makipe atandukanye mu Rwanda no hanze  uretse ikipe ya REG VC yabaye umutoza wa Kirehe VC ndetse na Gisagara VC ari yo yaherukagamo muri 2021.

Umutoza Kwizera Pierre Marchal yasinye amasezerano y’imyaka 2 nk’umutoza mukuru. Inshingano yahawe ni ugufasha iyi kipe kwitwara neza ikaba yakwegukana igikombe cya shampiyona ya 2022. Iyi kipe ikaba iheruka kwegukana igikombe cya shampiyona muri 2019.

Muri 2017 kugeza 2018, Kwizera Pierre Marchal yari  umutoza mukuru wa REG VC yungirijwe na Kamasa Peter ubu utoza Kirehe VC aho yegukanye igikombe  cyo  kwibuka Rutsindura Alphonse « Memorial Rutsindura 2018 ».

Nyuma yo kugirwa umutoza mukuru, Kwizera Pierre Marchal yeretswe abakinnyi, kuri uyu wa Kabiri taliki 26 Mata 2022 ni bwo azakoresha imyitozo ye ya mbere.

Ba uwa mbere mu kumenya amakuru agezweho!!!