Zimwe mu mpuha zagize ingaruka ku guhangana na COVID-19
Amakuru

Zimwe mu mpuha zagize ingaruka ku guhangana na COVID-19

NTAWITONDA JEAN CLAUDE

July 1, 2022

U Rwanda ni kimwe mu bihugu byashimiwe kuba intangarugero mu gukumira ikwirakwira ry’icyo cyorezo, gukora ubukangurambaga no gushyiraho ingamba zagize umumaro mu guhangana na COVID-19 kimwe na gahunda yo kwikingiza.

Nubwo bimeze gutyo hagiye habaho ibihuha byakomye mu nkokora ishyirwa mu bikorwa n’iyubahirizwa ry’ingamba zabaga zashyizweho 100%, bitewe n’imyumvire ya bamwe hashingiwe ku kuba badasobanukiwe neza impamvu zo kubahiriza izo ngamba uko zakabaye, amakuru y’ibihuha ku ngaruka zo kwikingiza ku byiciro bimwe na bimwe, abandi bigashingira ku myemerere.

Imyumvire itariyo n’ibihuha kuri COVID-19

Uwimbabazi Charlotte utuye mu Kagari ka Mbyo, mu Murenge wa Mayange mu Karere ka Bugesera yatangarije Imvaho Nshya ko muri rusange nk’abaturage bari bafite imyumvire itandukanye kuri COVID-19, aho bamwe mu baturage batubahirizaga neza ingamba zo kwirinda, bamwe mu babyeyi batwite batitabiriye kwikingiza vuba na bwangu uko bikwiye kandi bagejeje igihe cyemewe cyo kuba bakingirwa.

Yagize ati: “Hari imyumvire y’uko umugore utwite iyo akingiwe inda ivamo, abyara igihwereye cyangwa se inda igahirima, abandi bakavuga ko ahera mu buriri akazahara cyane”.

Uwimbabazi yakomeje avuga ko yageze aho arikingiza kandi mu bihuha byavugwaga yasanze ari ukubeshya, kuko nta ngaruka kuba yarikingije byamuteye.

Muganga Gashumba Gaston wungirije Umuyobozi w’Ikigo nderabuzima cya Mayange  gihereye mu Murenge wa Mayange mu Karere ka Bugesera na we yagarutse ku makuru y’ibihuha, avuga ko byatumye bamwe bageza aho bavuga ko umuntu ufashe urukingo ashobora no kuba yahebeba nk’ihene.

Hari ibikoresho bigezweho bifasha mu kwita ku brwayi ba COVID-19 (Foto Nyiraneza J.)

Imyumvire ishingiye ku myemerere

Hari bamwe mu baturage basetaga ibirenge mu kwikingiza COVID-19, bavugaga ko ari ikimenyetso cy’inyamaswa.

Gashokoro Anathalie utuye mu Murenge wa Mayange yatangarije Imvaho Nshya ko hari bamwe bavugaga ko kwikingiza ari ugushyirwaho ikimenyetso cy’inyamaswa ivugwa muri Bibiliya, kubera ubukangurambaga bwakomeje gukorwa n’inzego z’ubuzima ku bufatanye n’Inzego z’ibanze bagiye basobanukirwa, ku buryo hari abitabiriye kwikingiza.

RBC yagaragaje impamvu umugore utwite agomba kwikingiza

Umukozi w’Ikigo cy’Igihugu cy’Ubuzima RBC ushinzwe itsinda rishinzwe gukurikirana ubwandu bwa COVID-19, Dr. Nkeshimana Menelas yavuze ko ibihuha byabaye byinshi mu baturage ahakwirakwijwe ko umugore ukingiwe atabyara, cyangwa se yabyara akabyara umwana upfuye, akabura amashereka n’ibindi. Yasobanuye ko ahubwo kubera intege nke z’umubiri, umugore utwite iyo yarwaraga yarembaga.

Dr. Nkeshimana yagize ati: “Impamvu umugore utwite yagombaga kwirinda cyane ni uko atari yemerewe gufata imiti n’inkingo bya COVID-19, kubera ko ugeze mu gihembwe cya kabiri cyangwa icya gatatu ni we wari wemerewe gukingirwa, kuko iyo inkingo ari nshashya umugore utwite cyangwa wonsa ntabwo yemerewe kubihabwa”.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA