2024 izarangira amashuri yose mu Rwanda afite internet
Ikoranabuhanga

2024 izarangira amashuri yose mu Rwanda afite internet

KAMALIZA AGNES

November 30, 2023

Minisiteri y’Uburezi ivuga ko uburezi bw’u Rwanda buri gutera intambwe mu rugendo rwo gukoresha ikoranabuhanga, aho  amashuri yose yahawe internet ageze kuri 60%, ndetse bikaba byitezwe ko umwaka wa 2024 uzarangira amashuri yose afite internet.

Ni ibyagarutsweho na Minisitiri w’Uburezi Twagirayezu Gaspard mu nama y’iminsi itatu yitwa “Innovation Africa Summit” iteraniye i Kigali uhereye kuri uyu wa 30 Ukwakira.

Iyi nama ihurijwemo Abaminisitiri b’Uburezi b’Afurika n’abafatanyabikorwa mu by’ikoranabuhanga, aho bari kurebera hamwe uko ikoranabuhanga ryakemura ibibazo bikigaragara mu burezi bw’Afurika.

Minisitiri Twagirayezu Gaspard avuga ko u Rwanda rugeze kuri 60% ruha amashuri internet mu rwego rwo kwirinda gusigara inyuma mu gukoresha ikoranabuhanga.

Ati: “Mu Rwanda twashyize imbaraga mu gushyiraho umuyoboro wo guha amashuri yose internet ubu tugeze hafi 60%, ariko dufite intego ko 2024 izarangira amashuri yose afite internet. Turi kongera ibikoresho by’ikoranabuhanga haba ari mudasobwa cyangwa telefone abarimu bakoresha no kugira amasomo yigishwa hakoreshejwe ikoranabuhanga.”

Yongeyeho ko abarimu bakora amahugurwa mu rwego rwo kumenya gukoresha ikoranabuhanga.

Hagaragajwe ibibazo bikibangamiye uburezi bw’Afurika, n’uburyo byakemuka hakoreshejwe ikoranabuhanga.

Ati: “Ikoranabuhanga ryadufasha gukemura ibibazo byo mu burezi kuko twarebeye hamwe akamaro ko gukora integanyanyigisho nziza zireba ku bibazo dufite tutirengagije n’uburyo Afurika yatezwa imbere binyuze mu burezi”.

Minisitiri w’Uburezi wa Afurika y’Epfo Dr Reginah Mhaule, avuga ko igihugu cye cyigira ku Rwanda uko bakoresha ikoranabuhanga mu burezi, kandi nubwo COVID-19 yaje ari icyorezo ariko yeretse Afurika ko kwiga hakoreshejwe ikoranabuhanga bishoboka.

Ati: “Rimwe na rimwe abantu batekereza ko turi imbere mu by’ikoranabuhanga ariko u Rwanda na Kenya bo bateye imbere cyane. Tujya tuza no kubigiraho, rero dukwiye kuva mu byakera uburezi bukisanga mu Isi y’ikoranabuhanga. Nubwo COVID-19 yaje ari icyorezo ariko yatweretse ko gukoresha ikoranabuhanga muri byose bishoboka.”

Iyi nama ibaye ku nshuro ya 11 aho iba igamije kwigira hamwe insanganyamatsiko zitandukanye zirebana n’iterambere ry’uburezi.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA