Abacuruzi b’inyongeramusaruro 18 b’ukuboko kurekure batawe muri yombi
Amakuru

Abacuruzi b’inyongeramusaruro 18 b’ukuboko kurekure batawe muri yombi

Imvaho Nshya

October 9, 2023

Hagamijwe kongera umusaruro ngo Abanyarwanda bihaze mu biribwa, hashize imyaka 10 Leta yunganira umuhinzi ku mbuto nziza n’ifumbire. Hakaba hamaze gufatwa 18 bagaragayeho uburiganya mu kugeza ku bahinzi inyongeramusaruro muri iki gihembwe cy’ihinga 2024A.

 Umuvugizi wa Polisi ACP Rutikanga Boniface yasobanuye ko mu kuriganya hazamo abantu batandukanye bafite aho bahuriye no gukwirakwiza inyongeramusaruro.

Yagize ati: “Gushyiramo UPI, ubuso bw’ahazahingwa bivuze ingano y’imbuto izahahingwa n’ifumbire, hakaba abasaba isaguka, isagutse ubwo umucuruzi w’inyongeramusaruro (agrodelear) arabisigarana.

Hamaze gufatwa ba agrodelear 18 mu gihugu hose, hagiye hagaragara ibikorwa byinshi byo kuyinyereza”.

Yakomoje ku buryo butandukanye inyongeramusaruro zinyerezwamo, harimo abayihabwa kandi badakora ibikorwa by’ubuhinzi,  abahinzi bagenda bafatanya n’abacuruzi b’inyongeramusaruro ugasanga umuhinzi afite inyongeramusaruro zidahuye n’ubuso afite, bigatuma hari abajya kuyigurisha mu bihugu by’abaturanyi.

Yagize ati: “Bitewe n’uko yegereye umupaka, bitewe n’uko yasanganywe imbuto cyangwa ifumbire birenze ibyo yagenewe, birenze umurima afite, uhita ubona ko harimo ikindi byari bigiye gukoreshwa. Bitwereka ko nidukomeza, bigaragara ko hari n’abandi babyungukiramo b’abahinzi”.

Minisitiri w’Ubuhinzi n’Ubworozi, Dr Musafiri Ildephonse yasobanuye ko hari abariganya mu itangwa ry’inyongeramusaruro, ariko rigenda rinozwa hifashishijwe ikoranabuhanga.

Ati: “Twashyizemo ikoranabuhanga, aho umuhinzi ahinga, hagenerwa ifumbire ingana gutya ku butaka bungana gutya, bariyandikisha, barazwi n’ikigo kibisuzuma kirahari, abo bagererwabikorwa, abo dufatanya ngo ifumbire, imbuto ibagereho haba abiga ubundi buryo, ikibwa”.

Dr Musafiri yatangaje ko Leta yunganira abahinzi ku ifumbire kuri 40% naho umuhinzi agatanga 60%, ku mbuto z’ibigori, ibishyimbo, ingano na soya.  Buri mwaka, Leta ikaba itanga amafaranga y’u Rwanda arenga 35 000 000 000 kuri gahunda ya nkunganire y’imbuto n’ifumbire.

Yanagaragaje aho bipfira harimo abayicuruza batabyemerewe, abahinga indi bakigana ifumbire itari yo, abayiba bakayambutsa umupaka, abatubura imbuto bakavangamo n’itujuje ubuziranenge.

Umuvugizi wa RIB, Dr Murangira Thierry yasobanuye ibyaha bikorwa muri uko kutageza inyongeramusaruro ku bahinzi nk’uko bikwiye.

Yagize ati: “Umuturage aza kugura iyo fumbire agrodealer akavuga ngo zana nzakwishyurira, ntayishyure ni icyaha cy’ubuhemu. Ikindi gukoresha impapuro mpimbano. Magendu bica mu nzira zitemewe babijyana mu baturanyi kandi ari ifumbire yagenewe Abanyarwanda, kandi hari inkunga ya Leta ngo umuturage abibone ku mafaranga make.

Ibyaha bikorwa n’abafite aho bahuriye n’ibi bikorwa banabifitemo ubumenyi. Ikindi kandi ni uko ibi ari ibyha bifite n’ibihano kandi bizahanirwa.

Minisiteri y’Ubuhinzi n’Ubworozi, igaragaza ko abari mu bucuruzi bw’inyongeramusaruro, abarangura ifumbire hirya no hino mu gihugu bagera mu 3000, n’abemewe 29 batubura imbuto z’ibigori, ibishyimbo, ingano, soya n’izindi.

Muri rusange ifumbire yanyerejwe irarenga toni 57. Bivugwa ko hari na bamwe mu bacuruzi bagiye bafatwa bambutsa ifumbire ikajyanwa gucuruzwa mu bihugu by’abaturanyi.

Mu gukemura iki kibazo cy’inyerezwa ry’inyongeramusaruro, hashyizweho uburyo bukomatanyije bwo kugenzura no gukurikirana iki gikorwa buhuriweho na Minisiteri y’Ubuhinzi n’Ubworozi, Minisiteri y’Ubutegetsi bw’Igihugu n’Inzego z’Umutekano ( Polisi na RIB).

Minisitiri w’Ubutegetsi bw’Igihugu Jean Claude Musabyimana yavuze ko ubufatanye ari ingenzi kugira ngo inyongeramusaruro zigere ku bo zigenewe kandi neza.

Ati: “Ubugenzuzi bukorwa tubirimo twese, mu Midugudu bagasobanukirwa n’impamvu Leta ishyiramo imbaraga, kutabikurikirana bakamenya ingaruka bigira ntibicare mu Mudugu, mu Kagari ngo ntibibaze impamvu abaturage batakoresheje ifumbire cyangwa niba barayigenewe ntibagereho”.

Abanyarwanda muri rusange basabwa kuba ijisho rya mugenzi wabo, hirindwa ko inyongeramusaruro zinyerezwa kuko Leta ishyiramo Nkunganire ngo abantu bihaze mu biribwa.

NYIRANEZA JUDITH

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA