Abafite ubumuga bavuga ko bagihezwa
Amakuru

Abafite ubumuga bavuga ko bagihezwa

Imvaho Nshya

July 29, 2023

Abantu bafite ubumuga bavuga ko aho batuye bahezwa hakiyongeraho kuba babwirwa amagambo abakomeretsa.

Ibi byemezwa n’imiryango yita ku bantu bafite ubumuga ikorera mu Karere ka Kicukiro mu Mujyi wa Kigali.

Bamwe mu bantu bafite ubumuga baganiriye n’Imvaho Nshya ubwo hatangizwaga ubukangurambaga bugamije kurwanya ihohoterwa rikorerwa abantu bafite ubumuga.

Niyonkuru Dorcas, utuye mu Murenge wa Gahanga mu Kagari ka Nunga, avuga ko yarangije amashuri abanza ibyo kwiga bikarangirira aho.

Nubwo atashoboye gukomeza amashuri, ubu ni umwe mu banyeshuri biga amasomo y’imyuga.

Zimwe mu mbogamizi bahura na zo ni ukubatoteza babwirwa ko nta kintu bashoboye, ko nta n’icyo bazimarira.

Ahamya ko hari abana bafite ubumuga babwirwa amagambo mabi no gukorerwa ihezwa.

Yagize ati “Hari nk’ukuntu najyaga ntambuka muri karitsiye abantu bakambwira ngo nta kintu nzimarira ariko baje kubona ko bishoboka ntabwo bakibimbwira”.

Umwizerwa Justine utuye mu Kagari ka Rwabutenge, yavukanye ubumuga bigatuma ababyeyi be bahora bashwana.

Ati “Barashwanye ariko aho ngiye hose abantu bakanyita ikirema cyo kwa Haruna, nkabwirwa amagambo atari meza ariko nyine ntibakibivuga”.

Avuga ko iyo babimubwiraga yihebaga na we akumva ko ntacyo amaze nta n’icyo azigezaho.

Umwizerwa Justine ufite ubumuga na we avuga ko bakorerwa ihezwa (Foto Kayitare J.Paul)

Amaze kujya mu Muryango Nyarwanda w’Abagore bafite ubumuga (UNABU) yarigishijwe, uyu muryango umuba hafi ngo akaba ari cyo cyatumye yiga imyuga.

Mu buhanzi Umwizerwa akora, ibihangano bye bigaragaza ibibazo byamubayeho ndetse n’ibiba ku bantu bafite ubumuga.

Aha ni ho ahera ashishikariza ababyeyi kudashyira abana bafite ubumuga kure yabo kuko ni abana nk’abandi kandi barashoboye.

Tuyisenge Ananias wagize ubumuga bw’ingingo amaze gukura, yahamirije Imvaho Nshya ko aho atuye mu Karere ka Kicukiro yakorewe ihezwa.

Yagize ati “Hari ukuntu njya muri Bisi bitewe n’ubumuga mfite ugasanga kuyinjiramo bibaye ikibazo.

Tuyisenge Ananias wagize ubumuga akuze, yavuze ihezwa yakorewe (Foto Kayitare J.Paul)

Icyo gihe bikaba ngombwa ko aho nari ngiye biri buze kumfata amasaha arenze abiri kandi naribukoreshe iminota mirongo 30, bikansaba ko ntegereza abandi bakinjira njye nkinjira nyuma yabo”.

Mapambano Festo, umusigire w’Umunyamabanga Nshingwabikorwa w’Umurenge wa Gahanga mu Karere Kicukiro, asobanura ko batangije ubukangurambaga binyuze mu rubyiruko.

Ati “Icyo tugamije ni ukugira ngo dukore ubukangurambaga dufatanyamo n’umuryango wa CBR mu kurwanya ihohoterwa rikorerwa abantu bafite ubumuga”.

Mapambano na we yemeza ko mu miryango hari abantu bafite ubumuga bagikorerwa ihezwa.

Ku rundi ruhande, ubuyobozi bw’Umurenge wa Gahanga busaba abaturage kudakorera iheza abantu bafite ubumuga.

Ati “Hari aho twasangaga umubyeyi wabyaye umwana ufite ubumuga akamuheza mu rugo, akamuhisha ariko uyu munsi icyo tubakangurira, nibumve ko umuntu ufite ubumuga ari umuntu nk’abandi bose”.

Ubuyobozi bw’Umurenge wa Gahanga bwibutsa ababyeyi kujyana abana mu ishuri, abakiri batoya bakajyanwa mu marerero.

Hafashimana Jean Damascène, wari uhagarariye Ihuriro ry’Imiryango y’abantu bafite ubumuga mu Rwanda (NUDOR), avuga ko abantu bafite ubumuga na bo bakwiye kujyanwa ku ishuri.

Ahamya ko mu Karere ka Kicukiro ihezwa ry’abantu bafite ubumuga rishobora kuba ritahagaragara ariko ko bisaba gukumira icyaha kitaraba.

Akomeza agira ati “Muri rusange abantu bafite ubumuga, hari aho bagenda bakorerwa ihezwa. Aho usanga bamwe ari abana bagikingiranwa mu nzu, batabona uko bagera ku ishuri”.

NUDOR isaba ababyeyi guhindura imyumvire, kuko ngo hari aho umugabo ata urugo, umugore ahasigarana abana.

Umuryango usabwa gusigasira wa mwana ufite ubumuga bityo agahabwa uburezi bw’ibanze bw’umuryango, agahabwa imibereho myiza, ubuvuzi, yageza imyaka imujyana ku ishuri akajyanwa ku ishuri.

Sr Mukamazera Francine, Umubikira mu Muryango w’Ababikira b’Inshuti z’Abakene uhagarariye ishyirwa mu bikorwa rya za gahunda y’iterambere ridaheza rishingiye ku muryango (CBR), ashimangira ko abantu bafite ubumuga bahezwa.

Ati “Abafite ubumuga barahezwa nubwo atari hose birimo kugenda bitera intambwe ariko hari aho bigaragara ko bahezwa”.

Sr Mukamazera Francine, Umubikira mu Muryango w’Ababikira b’Inshuti z’Abakene (Foto Kayitare J.Paul)

Agaragaza ko bagitangira gahunda yabo wabonaga ko hari ababyeyi bafata abana bakabakingirana mu nzu kubera ko bafite ubumuga.

Agira ati “Akenshi ugasanga ntibabashyira mu mashuri, ntibashobora kubavuza ahubwo ugasanga barabaheza”.

Asaba ababyeyi gutinyuka bakumva ko abana babyaye na bo ari abana nk’abandi bakirinda kubakingirana mu nzu cyangwa kutabaha ibigenerwa abandi bana.

CBR itangaza ko hari abantu bari bakingiranye mu nzu, ubu bakaba bamaze gutera intambwe ubu nibura ngo ababyeyi barisanzura.

Mu ibarura ryakoze na CBR mu Murenge wa Gahanga, ryasanze hari abana 388 bafite ubumuga ariko abenshi muri bo ngo bagezweho n’ubufasha.

Yanditswe na KAYITARE JEAN PAUL

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA