“Abagore bitinyuke bakure intoki mu mifuka baziteza imbere”
Amakuru

“Abagore bitinyuke bakure intoki mu mifuka baziteza imbere”

NTAWITONDA JEAN CLAUDE

June 26, 2023

Abagore bashobora gukora imirimo itandukanye iyo bitinyutse bagakora, bagakura amaboko mu mifuka bibafasha kugira uruhare mu iterambere ryabo, imiryango yabo n’Igihugu muri rusange. 

Bamwe mu bakobwa ndetse n’abagore bakora mu myuga itandukanye, harimo ubwubatsi, ubuhinzi, gutunganya ibikomoka ku buhinzi bakangurira bagenzi babo kwitinyuka bagakora.

Umwe mu rubyiruko rukora ubuhinzi Bayiro Ines yavuze ko abagore bagomba kwitinyuka bagakora kuko umuntu atatera imbere adakora ndetse bagakangukira gukoresha ikoranabuhanga. 

Yagize ati: “Abagore na bo bari mu iterambere, iterambere turi kubona riri kuza, abagore na bo bafashe iya mbere.  Kuko dufite amakoperative cyane cyane y’abagore duhagarariye tukaba dufite inshingano, ingamba dukuye aha, ni ukubigisha bamenye ko burya ibyo dutekereza atari byo, babashe guhuguka babe bakwitabira amahugurwa kugira ngo na bo biyongere ubumenyi”.

Umuhinzi Manizabayo Madeleine utuye mu Kagari ka Ruhina, mu Murenge wa Kiyumba ho mu Karere ka Muhanga ubwo hizihizwaga Umunsi Mpuzamahanga w’ibiribwa yatangarije Imvaho Nshya ko abagore bakwiye kwitinyuka baagakora kuko ubuhinzi akora bwamufashije kwiteza imbere.

Yagize ati: “Inama nagira abagore bo mu cyaro dukunda kwitinya, twamara kwitinya ngo ntitwahinga cyangwa ngo tujye ku masoko ducuruze, kandi mu by’ukuri ubuhinzi buduteza imbere kuko nta kandi kazi dufite. Inama nagira abandi bagore bagenzi banjye ni uko twashyira hamwe tugafata imirima turayifite ntitwatisha, tukabona uko twiteza imbere”.

Yasobanuye iterambere amaze kwigezaho ririmo kubaka inzu abikesha ubuhinzi bw’inanasi.

Ati: “Nshuruza imbuto natangiye mu 2000 mpinga inanasi, amatunda, ibinyomoro. Nahisemo guhinga imbuto ni ibintu biteza imbere. Nk’umugore nabanje guhinga inanansi niteza imbere icyo gihe nabaga mu bukode ariko narazihinze zimpa ikibanza nyuma ndubaka none ubu ndi mu nzu yanjye.

Yavuze ko inanasi ku mwero wazo buri kwezi ashobora gukuramo ibihumbi 100 zihinze ku gice cya Hegitari kuko buri cyumweru agemura, ku isoko rya Kayenzi mu Karere ka Kamonyi.

Nk’ubu mu buhinzi nakuyemo inzu itaca munsi ya miliyoni 3, nanakuyemo imashini iboha imipira y’agaciro k’amafaranga 400,000. Mbigezeho mu gihe cy’imyaka 5”.

Manizabayo yavuze kandi ko mu gihe kiri imbere afite gahunda yo kuba yashakisha uburyo agura igikoresho cyajya kimugereza umusaruro ku isoko, akaruhuka kwikorera ku mutwe kandi agakora ubuhinzi bwa kijyambere, akifashisha ikoranabuhanga.

Yagize ati: “Gahunda y’iterambere mu gihe kiri imbere ni uko ngomba gukora cyane ngo ibyo njyana ku isoko byiyongere, kandi nk’umushinga nashaka icyajya kizinjyanira mu buryo bwo kuzitwara aho kuzijyana nikoreye”.

Nimukuze Angelique utunganya ifu y’Akawunga mu Murenge wa Cyabingo, mu Karere ka Gakenke na we yavuze ko ari abagore, ari urubyiruko bakwitinyuka kuko mu buhinzi harimo amahirwe, kandi bakitabira gukoresha ikoranabuhanga kuko ritanga icyizere ku kongera umusaruro.

Ati: “Guhinga bifite akamaro kanini ku baturage no ku rubyiruko, dusobanukiwe gukoresha ikoranabuhanga mu buhinzi, tukaba twashobora kongera intungamubiri mu gihingwa, tukaba twabasha kurwana n’ihindagurika ry’ibihe, mu izuba tukaba twakeza, mu mvura nyinshi tukabona ibyo kurya bitatugoye. Mu gihe cy’izuba tukaba dufite uko tubikurikirana kimwe no mu gihe cy’imvura tukaba dufite uko tubikurikirana ntituzahure n’ikibazo cy’ibiribwa”.

By’umwihariko kandi yashishikarije abagore n’urubyiruko gukora cyane ndetse rukitabira ubuhinzi kuko uretse gukuramo ibitunga umuntu anakuramo n’amafaranga. 

Mfikije Angelique utuye mu Murenge wa Muhanda, mu Karere ka Ngororero, ukora ku ruganda rw’icyayi rwa Rubaya yatangarije Imvaho Nshya ko kuba ahakora bimufasha kwiteza imbere ku buryo yikenura mu rugo ndetse agashobora kwigurira ubwisungane mu kwivuza.

Manirere Jeanne d’Arc utuye mu Mudugudu wa Mutara, mu Kagari ka Rwasa, mu Murenge wa Gahunga mu Karere ka Burera, na we agira inama abagore yo gukora aho gutegereza ko abagabo aribo bakora bonyine, icyiza bagafatanya.

Ati: “Abagore ndabagira inama yo gufatanya n’abagabo babo baba bafite akazi mu rugo bakagakora ntibategereze ko iyo umugabo yagiye avayo ngo naza agakore”. 

Yongeyeho ko ubworozi bw’inkoko buzamufasha kwiteza imbere, agashishikariza buri wese kugira icyo akora kuko nta murimo cyangwa umwuga udafite akamaro mu iterambere, mu gihe ubikoze  mu buryo bwa kijyambere ndetse  ukanjyana n’igihe mu gukoresha ikoranabuhanga.

Umugore iyo yongerewe ubumenyi mu buryo butandukanye agaragaza ko ashoboye, bikaba binafitanye isano n’insanganyamatsiko yo kwizihiza Umunsi Mpuzamahanga w’Umugore uyu mwaka ku wa 8 Werurwe 2023, yagiraga iti: “Ntawe uhejwe: Guhanga udushya n’ikoranabuhanga biteza imbere uburinganire”.

Nimukuze Angelique atangaza ko mu buhinzi harimo amahirwe y’iterambere (Foto Nyiraneza J.)
Bayiro Ines ahamya ko ubuhinzi bukozwe neza bufasha kwiteza imbere, agashishikariza abagore kwitabira umurimo (Foto Nyiraneza J.)

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA