Abagore bo mu cyaro banyuzwe n’uko u Rwanda rubitayeho
Amakuru

Abagore bo mu cyaro banyuzwe n’uko u Rwanda rubitayeho

Imvaho Nshya

October 15, 2023

Abagore batuye mu Karere ka Gicumbi barishimira ko kuva umugore yahabwa ijambo mu Rwanda ubuzima bwahindutse bakigirira icyizere, cyatumye bibumbira mu matsinda bagakora imirimo ibabyarira inyungu.

Ni ibyagarutsweho kuri iki Cyumweru tariki ya 15 Ukwakira, ubwo hizihizwaga Umunsi Mpuzamahanga w’Umugore wo mu Cyaro aho ku rwego rw’Igihugu wizihirijwe mu Karere ka Gicumbi, Umurenge wa Rubaya, ku nsanganyamatsiko igira iti “Dushyigikire iterambere ry’umugore wo mu cyaro.”

Abatuye mu Murenge wa Rubaya, bavuga ko abagore bo mu cyaro kuri ubu bakora ibikorwa bibateza imbere kandi bibumbiye mu mastinda mu rwego rwo gushimangira ubufatanye no gukorera  hamwe.

Mukampundwa Annonciata, aganira n’Imvaho Nshya, yagize ati: “Abagore bo mu cyaro turishimira iterambere twagezeho, dukora ibikorwa byinshi bituganisha ku iterambere. Tuba mu matsinda kandi turahinga tukeza, tukagurisha ku masoko tukikenura.”

Uwambayeneza Patricia na we ati: “Umugore wo mu cyaro arishimira uko Igihugu cyimwitayeho ntamirimo agihezwa yose tuyisangamo. Twahawe ijambo umugore wo mu cyaro agaragara nk’umugore wifite kandi wiyubashye ; nubwo ubukene buza tuburwanya twishyira mu matsinda, yafata amafaranga akagura intama akayorora akabona ifumbire ashyira mu myaka ngo abone umusaruro uhagije tukikura mu bukene.”

Umuyobozi w’agateganyo w’Akarere ka Gicumbi Uwera Parfaite, yavuze ko  nubwo umugore wo mu cyaro hari ibyo amaze kugeraho hakiri inzitizi zirimo nk’abagihohoterwa ndetse n’abagabo bamwe batarumva neza ihame ry’uburinganire n’ubwuzuzanye aho usanga hagikenewe ubukangurambaga.

Ati: “Hari imirimo idahabwa agaciro abagore bakora harimo kubyara, isuku, kurera, kandi iyo ni imirimo myiza cyane. Ikindi kikiri inzitizi ni amakimbirane yo mu muryango, umugabo akumva ko umugore adafite uburenganzira ku mitungo cyangwa ugasanga umugore wo mu cyaro aracyahohoterwa.”

Yakomoje no ku kibazo cy’imiryango ibana itarasezeranye ugasanga bibuza umugore uburenganzira ku mutungo, agasaba ko hakongerwa ubukangurambaga ndetse n’amategeko akarushaho gukora akazi kayo.

Minisitiri w’Uburinganire n’Iterambere ry’Umuryango Dr Uwamariya Valentine, yavuze ko abagore bakwiye kugira inyota yo kuzamura iterambere ryabo, aboneraho no gusaba abagabo ubufatanye n’abagore babo.

Ati: “Iyo umugore n’umugabo bagiranye ibiganiro, bakagira urukundo bagahuza gahunda kuko nta nkingi imwe igera inzu, bagera kuri byinshi. Ndabasaba gukorera hamwe, gufatanya no kwizera abagore banyu ko bashoboye mu mirimo cyane cyane ibyara inyungu.”

Yabasabye kandi gufasha no gukurikirana abagore mu gukoresha ikoranabuhanga mu bikorwa by’ubuhinzi harimo kuhira imyaka, gukoresha ifumbire, ari na byo bizabafasha gukora ubuhinzi bw’umwuga kandi busagurira isoko.

Yanaboneyeho kubasaba ubufatanye mu kurwanya imirire mibi n’igwingira ry’abana mu miryango harwanywa amakimbirane, ubusinzi, ubuharike kandi n’abana bakitabira kujya mu ishuri kugira ngo iterambere rirambye rigerweho.

KAMALIZA AGNES

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA