Abakoresha umupaka wa Rwempasha batangiye kuwubyaza umusaruro
Amakuru

Abakoresha umupaka wa Rwempasha batangiye kuwubyaza umusaruro

Imvaho Nshya

August 11, 2023

Nyuma y’ukwezi umupaka wa Rwempasha – Kizinga  uhuza u Rwanda na Uganda ufunguwe, abaturage b’ibihugu byombi baravuga ko batangiye kuwubyaza umusaruro binyuze mu bikorwa by’ubucuruzi.

Hasabwa indangamuntu yonyine ku wifuza kwambuka ava mu gihugu kimwe ajya mu kindi.

Nyuma yuko uyu mupaka ufunguwe, hari abahise batangira ibikorwa by’ubucuruzi bw’imyaka bwiganjemo ubw’ibitoki biva mu gihugu kimwe bijya mu kindi.

Umwe yagize ati: “Gufungura uyu mupaka byaranshimishije cyane kubera ko bitugirira umumaro mu bucuruzi dufatanya n’Abanyarwanda.

Batuzanira amafaranga muri Uganda bakagura ibitoki bakabyambutsa natwe tukabitwara mu Rwanda tukabona inyungu”.

Akomeza avuga ko umupaka wabaye igisubizo kuko bajya kuzana ibitoki Uganda bakabigurishiriza mu Rwanda. 

Ati: “Nkiranguye amafaranga makeya inyungu nke ndibukiboneho ni amafaranga ibihumbi bitanu by’inyungu”.

Mbere yuko uyu mupaka ufungurwa byari ikibazo gusurana, gutahirana ubukwe cyangwa kujya gushyingura uwitabye Imana.

Umwe mu baganiriye na RBA yagize ati: “Ubu byaradufashije kuko niba hari uwagize ubukwe hano hakurya aha cyangwa natwe twagize ubukwe baraza bakadutahira ubukwe, muri make ubona uyu mupaka waradufashije”.

Ashimangira ko gufungura umupaka yabyakiriye neza kuko ngo yari amaze imyaka 10 atajya mu rugo none yishimiye guca ku mupaka aho guca ku muyanja.

Undi we yagize ati: “Ubuyobozi nta kibazo bufitanye, burafatanya, nta numwe ugora undi, twese turatambuka neza ni amahoro, muri make ibintu bimeze neza.

Ibyo turabishimira ba Perezida bombi bemeye bagafatanya, umupaka ugafungurwa”.

Nubwo urujya n’uruza rutaragera ku rwego rushimishije, abatuye ibihugu byombi bavuga ko gufungurwa k’uyu mupaka ari kimwe mu bishimangira umubano mwiza w’ibihugu byombi.

Aha ni ho bahera bemeza ko bizarushaho kongera ikibatsi mu iterambere ry’abatuye ibihugu byombi.

Ati: “N’ubucuruzi buzakomeza butere imbere kubera yuko niba imodoka yakoreshaga amavuta menshi kuva Gasenyi ikanyura Buziba cyangwa ikanyura Kagitumba, ni ukuvuga ngo uyu munsi izakoresha amavuta makeya, nyir’imodoka azatera imbere kandi n’abacuruzi ku mpande zombi bazatera imbere”.

Umuyobozi w’Akarere ka Nyagatare Gasana Stephen asaba abaturage bakoresha uyu mupaka gukomeza kuwukoresha neza kandi bagakora ibikorwa bibateza imbere.

Yagize ati “Bakoreshe umupaka wemewe uri hafi yabo, ari ibikorwa bagiyemo bitandukanye, ari iby’imibanire ari ibindi bikorwa by’iterambere umuntu agiyemo bakore ku buryo banyura ku mupaka wemewe, ni byo bitanga umutekano”.

Ubuyobozi bwa Nyagatare buvuga ko mu minsi iri imbere umuhanda Nyagatare Rwempasha Kizinga uzashyirwamo kaburimbo.

Yanditswe na KAYITARE JEAN PAUL

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA