Abana bihangiye ubucuruzi baniga bagiye guhagararira u Rwanda ku rwego rw’Afurika
Amakuru

Abana bihangiye ubucuruzi baniga bagiye guhagararira u Rwanda ku rwego rw’Afurika

NTAWITONDA JEAN CLAUDE

July 14, 2023

Abanyeshuri biga muri Green Hills bihangiye ubucuruzi bakiri ku ntebe y’ishuri batsinze amarushanwa yo ku rwego rw’Igihugu abemerera guhagararira u Rwanda mu marushanwa yo ku rwego rw’Afurika.

Ayo marushanwa yabereye mu Ishuri Ryisumbuye rya Tekiniki rya SOS (SOS Technical High School) ku wa Kane taliki ya 13 Nyakanga, akaba yahuje abanyeshuri bashinze ibigo by’ubucuruzi baturutse mu Rwunge rw’Amashuri rwa Gikomero, SOS Technical High School, SOS Kayonza Secondary School, King David Academy, Green Hills na Excella School.

Itsinda ryabaye irya mbere ryashinze Ikigo cyitwa “The Wizards of Tech”, aho ryahanze agashya k’ikoranabuhanga rigezweho ritanga ibisubizo birambye mu rwego rw’ubuhinzi.

Batangaza uwo mushinga bagaragaje ingero (prototypes) z’imashini bakora zitanga ibisubizo byo kuhira, gusigasira ibihingwa n’umutungo kamere w’amazi ku buryo nta mazi cyangwa ubutaka bipfa ubusa, abantu bakabyaza musaruro mwinshi ubutaka bwose baba bafite.

Abo banyeshuri bavuga ko bifuza gutanga igisubizo kirambye mu buhinzi, by’umwihariko ubwo mu Rwanda n’Afurika ahakigaragara umubare munini w’abakora ubuhinzi bwa gakondo budatanga umusaruro ukenewe hashingiwe ku mubare wiyongera w’Abanyafurika.

Umwe mu banyeshuri bagaragaje uwo mushinga yagize ati: “Twifashishije ikoranabuhanga rigezweho mu gutegura umushinga wacu uzajya ufasha abahinzi kuhira. Nk’abanyeshuri twabonye ko nta muntu ushobora kubaho atarya, ni yo mpamvu gukora ubhinzi butanga umusaruro ari ingenzi.”

Hatali Patrick, Umuyobozi ushinzwe ibikorwa by’Umuryango SOS Children’s Village Rwanda, yavuze ko ayo marushanwa ari muri gahunda yihariye igamije gufasha urubyiruko gutekereza no guhanga ibishya kurusha ababyeyi n’abakurambere mu gushaka ibisubizo by’ibibazo byugarije u Rwanda n’Isi muri rusange.

Yagize ati: “Iyi gahunda yaje yihariye, tugasanga ari ibintu twishimiye gukorana na Junior Achievement Africa (JA Africa); nk’uko mwabibonye muri rusange ni uburyo bwo gufasha urubyiruko kugira ngo rutekereze kurusha uko twebwe tubitekereza, hari ukwishakira ibisubizo ku bibazo bitwugarije ariko nanone bakoramo imishinga ibateza imbere.”

Yavuze ko ku bufatanye na JA Africa bakangurira urubyiruko gukomeza kwagura impano no guhanga udushya tubateza imbere. Yemeje ko iyo gahunda ikomereza ku rwego rw’Afurika hanyuma abazatsinda bakazagera no ku rwego rw’Isi.

Geofrey Wakhakunyu wari uhagarariye JA Africa mu marushanwa, yongeyeho ati: “Turashaka ko urubyiruko ruba mu bashaka ibisubizo muri Afurika, atari ukubona inyungu mu byo abandi bakoze gusa, ahubwo na bo bakagira uruhare mu birimo kuba ku Isi cyangwa ibibazo biri mu muryango mugari.”

Yakomeje akomoza no ku kuba JA Africa ishyize imbere ku guha amahirwe urubyiruko rwayabuze kandi rufite impano zo gukora ibintu bitandukanye, hakaba hari na gahunda yo gutangiza ishami ry’uwo Muryango mu Rwanda.

Yongeyeho ati: “Twizera ko ubu bufatanye na SOS buzadufasha kubona urwo rubyiruko rwiganjemo urwo mu byaro rufite impano zo gukora ariko rukaba rutarahabwa amahirwe yo kwigaragaza.”

Amatsinda agizwe n’abanyeshuri bagera kuri 250 baturutse muri ayo mashuri ni yo yamuritse ibigo bishingiye ku mishinga itandukanye, uhereye ku kuboha uduseke, imishinga ishingiye ku ikoranabuhanga rigezweho, koroshya ubukerarugendo, gukora Imbabura zitangiza ibidukikije,  gutegura amafunguro ahuriza hamwe imico itandukanye, gufasha abafite ibibazo birebana n’ubuzima bwo mu mutwe  n’iyindi.

Abo banyeshuri bamaze amezi ane bategura iyo mishanga y’ubucuruzi bakanashyira mu bikorwa aho bamwe banemeza ko yatangiye kubinjiriza amafaranga.

Ikigo Wizards of Tech giteza imbere ikoranabuhanga ryifashishwa mu kuhira ni yo yahize ibindi mu marushanwa
Geofrey Wakhakunyu waje ahagarariye Junior Achievement Africa
Imishinga y’Abana biga muri Green Hills Academy ni yo yahize iyindi

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA