Abantu 2,446 bahembuwe n’Umuryango yashinze kubera impanuro za Perezida Kagame
Amakuru

Abantu 2,446 bahembuwe n’Umuryango yashinze kubera impanuro za Perezida Kagame

Imvaho Nshya

July 20, 2023

Ngenzi Shiraniro Jean Paul amaze kumva impanuro za Perezida wa Repubulika y’u Rwanda Paul Kagame abanenga ko ntacyo abavuga rikijyana bo mu Karere ka Rubavu bakora ngo bakure abana mu muhanda, yashinze Umuryango none nyuma y’imyaka 10 umaze gufasha ababarirwa mu 2446.

Kuri ubu ni Umushumba mu Itorero Zion Temple ishami rya Mahoko. Pasiteri Ngenzi Shiraniro Jean Paul washinze Umuryango Ngenzi Foundation,  akaba n’Umuyobozi Mukuru wa sosiyete yitwa Agruni Group Rwanda, ihuje ibigo 11 bikora ibintu bitandukanye mu Rwanda.

Aganira n’itangazamakuru yasobanuye uburyo igitekerezo yakuye kuri Nyakubahwa Perezida wa Repubulika y’u Rwanda Paul Kagame cyatumye mu myaka 10 amaze gufasha urubyiruko rugera ku 2446 rwari rudafite ikizere cy’ahazaza.

Muri bo harimo abishyuriwe amashuri yisumbuye 164, abishyuriwe kaminuza 54, aboherejwe mu mahanga 16 aho ibyo bikorwa byose bimaze gutwara amafaranga y’u Rwanda asaga miliyoni 240.

Kubwimana Clementine Kado, umwe mu barihiwe amashuri ashima uburyo yafashijwe kuva mu mashuri abanza kugera arangije Kaminuza none kuri ubu yahawe n’akazi.

Agira ati:”Njye Ngenzi yamenye ndi umwana muto cyane yandeze nk’umwana we nari mfite ababyeyi babiri Papa arapfa aza mu kigwi cye, yarankurikiranye niga abanza, ayisumbuye amfasha na Kaminuza, n’ubu nahawe akazi mu kigo cye. Mbayeho neza kuko yambereye umubyeyi.”

Ubwo hizihizwaga isabukuru y’imyaka 10 Umuryango Ngenzi Foundation umaze ushinzwe, yagarutse ku rugendo banyuzemo rukabageza ku byo bishimira byashibutse ku gukeburwa na Perezida Paul Kagame.

Yakuye mu muhanda abahoze ari mayibobo n’abajura

Ngenzi yavuze ko ubwo Akarere ka Rubavu kasurwaga na Perezida Kagame, yabatumiye nk’abavuga rikijyana abanenga ku kuba ntacyo bakora ngo bakure abana mu muhanda.

Agira ati: “Icyo gihe Perezida wacu Nyakubahwa Paul Kagame yaratunenze numva nanjye ndigaye, ni bwo nahise mfata iya mbere mpera muri Mahoko niyegereza abana bakoraga mu mifuka biba. Narabafashe ndabaganiriza barankundira mbaha akazi binyorohereza kubahindurira imibereho, abandi mbashyira mu mashuri ndabarihira ndetse mbitaho mu buzima bwa buri munsi kuko abenshi bari imfubyi.”

Musabinema David, umwe mu bahoze ku muhanda bakora ubujura, ashima Pasiteri Ngenzi wamukuye mu muhanda.

Ngenzi yarihiye abana benshi amashuri, bamwe muri bo ubu baritunze

Agira ati: “Ndashima Ngenzi! Duhura nakoraga mu mifuka ndi umujura wo mu muhanda, yaradushatse adushyira hamwe atugira inama, adushakira imirimo turakora tukigishwa; byageze aho ashinga ibikorwa muri Mahoko aduha akazi turazamuka kugeza n’ubu adufasha muri byinshi yanshakiye aho kuba angurira amatungo ndetse ingeso yankuyemo na njye ndi kuyikuramo abandi kuko nzi aho navuye.”

Abakoraga uburaya babivuyemo ubu ni abakozi b’Imana

Pasiteri Shiraniro Ngenzi Jean Paul avuga ko mu gukora ibikorwa bihindura ubuzima yasanze hari abagore n’abakobwa benshi bishoye mu busambanyi yiyemeza kugira icyo akora.

Agira ati: “Nyuma nasanze kimwe mu bibazo biri muri Mahoko ari uburaya bugenda bufata indi ntera, hari abagore babaga ahitwa muri Ziniya twarabegereye duhuriza hamwe abagera kuri 26 barigishwa barabureka. Mu kubahindurira ubuzima bigishijwe imyuga, ubu barahindutse barasenga ni abakirisito mu itorero.”

Aba bagore kuri ubu bakora imirimo itandukanye bakesha imyuga bize bibeshejeho n’imiryango yabo.

Pasiteri Ngenzi avuga ko mu myaka 10 hatanzwe Mituweli ku baturage bo mu miryango 10,000 yo mu Karere ka Rubavu, n’igice gito cya Nyabihu bituma ubuzima bwabo butekana ngo ni ibikorwa bakora buri mwaka.

Muri iyi myaka 10 avuga ko bubatse Ibiro by’Akagari ka Kabatwa muri Nyabihu, n’ibindi bya Shyira.

Havutse Ishuri ry’inshuke Shekinah

Pst. Ngenzi Shiraniro Jean Paul avuga ko kubera ko yari afite imishinga y’ubwubatsi yagiye gushaka abakozi asanga kuri Bambone (aho abashaka imirimo y’amaboko bategerereza) hasigara abagore gusa abagabo bamaze kubona imirimo.

Yaganiriye n’abagore bamubwira ko imbogamizi bafite ari abana babura abo babasigira ndetse ari na cyo  abatanga imirimo babaziza.

Abana biga mu ishuri ry’inshuke Shekinah

Akimara kumva ikibazo neza yafashe umwanzuro  wo kujya abasigarana ari na ko yashinze ishuri ry’inshuke rizwi nka “Shekinah Nursery School” muri Mahoko munsi ya Gare.

Agira ati: “Kuri ubu abana tubasigarana ku ishuri mu gihe ababyeyi babo bagiye gushaka imibereho, icyo bisaba ni ukuzana umwana gusa ubundi akitabwaho.”

Akomeza ashima Leta y’Ubumwe ku ruhare igira rwo gushigikira ibikorwa bye aho abana bunganirwa bagahabwa amata, ifu y’igikoma byagera mu masomo bagahabwa imfashanyigisho.

Bimwe mu byo Ngenzi yifuza harimo kuba ikigo yashinze cyakomera kigahoraho n’iyo yaba atakiriho no kuba yabona ubutaka bwagutse yakubakaho ibikorwa bye.

Ingabire Josiane Umunyamabanga Nshingwabikorwa w’Umurenge wa Nyundo mu Karere ka Rubavu,  ashima uyu muryango kuko ari abafatanyabikorwa beza barinze abana ubuzererezi n’imico mibi yangiza Sosiyete Nyarwanda.

Ati: “Iyo yaganiriye n’abana barererwa hano usanga bafite aho bavuye n’aho bageze. Turashima uyu mufatanyabikorwa kuko adufasha kuzamura imibereho myiza y’abaturage, adufasha muri Mituweli, kubakira abatishoboye… Turifuza abafatanyabikorwa nka we bakomeza kunganira Leta mu guteza imbere umuturage.”

TANGA IGITECYEREZO

  • nagiraclaude2010@yahoo.fr
    July 20, 2023 at 4:36 pm Musubize

    Uyu Past Ngenzi J Paul niwe ukwiriye kuba Umwungeli Imana imuhe umugisha

  • Nagiradata
    July 20, 2023 at 4:37 pm Musubize

    Uyu Past Ngenzi J Paul niwe ukwiriye kuba Umwungeli Imana imuhe umugisha

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA