Abanyeshuri basaga 202,000 basabwe gukora ibizamini bya Leta nta gihunga
Amakuru

Abanyeshuri basaga 202,000 basabwe gukora ibizamini bya Leta nta gihunga

Imvaho Nshya

July 17, 2023

Umunyamabanga wa Leta muri Minisiteri y’Uburezi ushinzwe ikoranabuhanga, imyuga n’ubumenyi ngiro Irere Claudette yatangije ibizamini bya Leta kuri Camp Kigali, abanyeshuri batangiriye ku kizamini cy’imibare. Kuri uyu wa Mbere tariki ya 17 Nyakanga 2023, hatangiye ibizamini bisoza amashuri abanza, hakora abanyehsuri 202 967.

Yagize ati: “Mwarize, mwariteguye neza mugiye kutwereka ko mwabyize, hanyuma umwaka utaha tuzahurira mu mashuri yisumbuye. Mukore nta gihunga. Mbifurije gutsinda”.

Irere yagarutse ku myiteguro y’ibizamini bya Leta avuga ko imyiteguro imeze neza kandi bose bitabiriye.

Ati: “Abanyeshuri tugerageza kubategura uko dushoboye hanyuma umunsi nk’uyu bose bakitabira. Abari bateganyijwe kuri iyi santere bose bitabiriye nta n’umwe ubura. Ubwo turaza kureba mu gihugu hose, kwegeranya uko bimeze hirya no hino”.

Yongeyeho ko “ku munsi wa mbere akenshi hari abanyeshuri bamwe bakererwa rimwe na rimwe baba bagiye nko ku mashuri badasanzwe bigaho, abaturuka kure, cyangwa se igihunga. Indi minsi ikurikiraho ntibikunze kubaho, turizera ko ari uyu munsi gusa”.

Yagize inama atanga ku babyeyi kugira ngo abanyeshuri bahagerere igihe.

Ati: “Turakangurira ababyeyi kwibutsa abana kuzinduka, kureka bakaryama kare bakaruhuka, iyo baryamye kare bakaruhuka bituma babyuka kare, bakaza ku ishuri nta gihunga bakagera ku ishuri kare hanyuma bakinjirira mu kizamini ku masaha”.

Ku bijyanye n’umunyeshuri warwara mu gihe cy’ibizamini, Umunyamabanga wa Leta Irere yavuze ko kumufasha bitoroha agirwa inama yo kuzakora umwaka utaha, ariko ko nk’uwakoze ibizamini akarwara hari icyo atakoze bareba amanota yagize muri ibyo bindi bakareba niba yajya mu mashuri yisumbuye.

Umuyobozi w’Umujyi wa Kigali Rubingisa Pudence na we yari mu batangije ibizamini muri Camp Kigali, yavuze ko imyiteguro yagenze neza n’abandi biteguye.

Ati: “Uyu munsi hatangiye ibizamini by’abanyeshuri basoza amashuri abanza, bariteguye mu Mujyi dufite aho bari gukorera hatandukanye ku masantere 86 mu Mujyi wose.

Abana baje gukora ibizamini biyandikishije ni 23 704, tukaba twumva ko bose bari bukore ibizamini, ariko ubwo ari bwo bagitangira tugiye kuzenguruka hose turebe ko bose bashoboye kuboneka. Imyitegiro barayikoze ndetse n’ababafasha gusubiramo, ubu ibizamini bikaba bitangiye, twaje hano ngo tubitangize, tunabifurize intsinzi”.

Uhagarariye iyo santere y’ibizamini muri Camp Kigali, Kamanzi Kalisa Gilbert yatangarije itangazamakuru ko kuri iyo santere hakoreye abanyeshuri bo ku bigo 5 icya Camp Kigali, EP BIRYOGO, Ikigo cyitwa Saint Nicolas, icyitwa Solid Foundation n’icyitwa Sainte Angeline (Pigeon) bagera kuri 455.

Ibizamini bya Leta birimo kubera muri santeri 1 099 ziherereye mu bice bitandukanye by’Igihugu, zikaba zihuje abo banyeshuri baturutse mu bigo by’amashuri abanza 3 644 byatanze abo bakandida.

Kuri uyu wa Mbere, hakozwe ibizamini by’imibare (Mathematics), na S.S (Social and Religious Studies).

Ku wa Kabiri taliki ya 18 Nyakanga, hazakorwa ikizamini cy’Ikinyarwanda na S E T (Science and Elementary Technology), naho ku wa Gatatu taliki ya 19 Nyakanga hakorwa Icyongereza.

Yanditswe na NYIRANEZA Judith

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA