Abari bafungiwe amazi mu Mudugudu wa Kinigi bongeye kuyahabwa
Amakuru

Abari bafungiwe amazi mu Mudugudu wa Kinigi bongeye kuyahabwa

Imvaho Nshya

October 1, 2023

Abaturage batujwe mu Mudugudu w’Icyitegererezo wa Kinigi mu Karere ka Musanze, barashima itangazamakuru ryabakoreye ubuvugizi bakongera guhabwa amazi bari bafungiwe bashinjwa kutishyura umwenda wa miliyoni 10 z’amafaranga y’u Rwanda.

Ku wa 24 Nzeri 2023, ni bwo abakozi b’Ikigo cy’Igihugu gishinzwe Isuku n’isukura mu Rwanda (WASAC) bafashe icyemezo cyo gufungira amazi imiryango 13 mu miryango 140 yatujwe muri uyu Mudugudu w’icyitegererezo uherereye mu Murenge wa Kinigi.

Imvaho Nshya yasohoye inkuru ku wa 26 Nzeri, itabariza abo baturage bavugaga ko bishyuzwa amafaranga y’umurengera arimo n’ay’amazi batakoresheje.  

Nyuma y’amasaha make, ubuyobozi bw’Akarere ka Musanze bwatangaje ko ikibazo cy’amazi yari yafunzwe cyashakiwe umuti, amazi agafungurwa maze abaturage bagakomeza kuvoma nk’ibisanzwe.

Kuri ubu, abaturage bari bafungiwe amazi bavuga ko ku munsi inkuru yasohotse bahise bafungurirwa amazi bakaba, bashimira Imvaho Nshya yabakoreye ubuvugizi.

Girakumva Jean Claude yagize ati: “Byari ibintu bikomeye badufungira amazi nta wundi muvugizi twari dusigaranye kuko natwe twabonaga ari nk’ibitangaza birimo kutubaho.  Umwanda wari utumereye nabi nawe urabona izi nzu n’ubu bwiherero, gusa umuvugizi wacu yari itangazamakuru kuko mugera hose n’ijwi ryanyu rikagera kure.  

Ndibuka ubwo Imvaho Nshya yageraga hano twavomaga mu bizenga byo muri Rwebeya, ubu rero amazi barayafunguye nta kibazo, bayafunga nta kintu batubwiye no kuyafungura twabibonye gutyo nkanjye banyishyuzaga ibihumbi 269 kandi ntaho nayakura.”

Uyu mugabo akomeza ashimira Perezida Paul Kagame wumvise ko abaturage barengana akabasubiza amazi.

Girakumva yashimye ubuyobozi bw’Igihugu bwumvise ugutakamba kwabo bukabafungurira amazi

Yagize ati: “Rwose natwe twari twarumiwe kubona inzu twiherewe na Perezida Kagame irimo byose natwe tuzi ko tugomba kwishakamo ibisubizo, ahubwo abo hasi bakatwambura amazi nawe yabyumvise agasaba abayobozi bari barakase amatiyo kongera kuyateranya. Turamushimiye ahubwo akomeze haboneke uburyo iki kibazo kigenda burundu”.

Ngerageze Emmanuel na we ashimangira ko kuba bari barafungiwe amazi byari ibintu bikomeye kuri bo, ariko kandi agashimira ababakoreye ubuvugizi.

Yagize ati: “Itangazamakuru rikimara kuvuga ibibera hano nta minsi ibiri yashize batatugaruriye amazi yacu twiherewe na Kagame mu nzu nk’izi. Tuzi neza ko tugomba kwishyura neza kandi tukishyura ibyangombwa birimo amazi n’amashanyarazi.

Umuyobozi w’Ishami rya WASAC mu Karere ka Musanze Murigo Jean Claude, yavuze ko bafunguye ariya mazi nyuma yo gukora isesengura ricukumbuye, anavuga ibyo bagendeyeho kugira ngo bayafungure.

Yagize ati: “Twari twafunze amazi ku miryango 13, kubera ko yari ifite inyemezabwishyu ziriho amafaranga menshi, ariko nyuma y’aho twaje gusanga hari ibigomba kwishyurwa tubanje kuganira n’inzego bireba mu minsi iri imbere harimo Umurenge wa Kinigi n’Akarere ka Musanze, ibibasha kwishyurwa byishyurwe ahasigaye umuturage na we akomeze yishyure amazi yakoresheje.

Icyo nabwira abaturage ni uko bafite igihugu cyiza kandi cyita ku muturage, nibahumure rero bumve batekanye, kandi bakomeze gufata neza ibikorwa remezo Perezida wacu Kagame agenda atugezaho”.

Aba baturage bo mu Mudugu w’Icyitegererezo wa Kinigi bivugwa ko babereyemo WASSAC umwenda ungana na miliyoni 10 z’amafaraga y’u Rwanda, ariko bikaba ari ingorabahizi kuri benshi kugira ngo bishyure umwenda  w’amazi babariwe.

NGABOYABAHIZI PROTAIS

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA