Abaturage basabiwe kwigishwa mbere yo gutuzwa mu Midugudu
Amakuru

Abaturage basabiwe kwigishwa mbere yo gutuzwa mu Midugudu

Imvaho Nshya

August 4, 2023

Sena yashimye ibyagezweho mu gukemura ibibazo byagaragaye mu Midugudu  y’Icyitegererezo n’Imidugudu isanzwe kugira ngo abayituyemo barusheho kugira imibereho myiza, ariko Abasenateri benshi bahurije ku cyifuzo cy’uko hajya habanza kuganiriza abazayituzwamo, hagahindurwa imyumvire yabo  bagasobanurirwa imigirire n’imyitwarire ikwiye abayituyemo.

Vizi Perezida wa Sena, Nyirasafari Esperance yagejeje kuri Sena raporo igaragaza ibibazo  byabonetse  hirya no hino mu Midugudu y’Icyitegererezo, no mu yindi Midugudu imwe n’imwe harimo kuba nta mazi, nta mashanyarazi,  ahangirika ntihasanwe bagatekereza ko Leta igomba kubasanira.

Yavuze ko habayeho gusura Imidugudu hirya no hino mu gihugu kuva ku wa 13-20 Kamena 2023 hari hagamijwe kumenya uko ingamba zafashwe mu 2022 inzego zifatanya mu gukemura ibibazo byagaragaye n’uko bishyirwa mu bikorwa.

Bimwe mu bibazo byagaragaye birimo inzu zishaje cyane, inzira z’imyotsi zasibye, abatuyemo bafunga, Imidugudu idafite ibikorwa remezo, ibura ry’ibicanwa, ibibazo by’isuku, biyogaze zitagikora n’ibindi. 

Senateri Nyirasafari Esperance yagize ati: “[….] Bigaragaza ko bakeneye kwigishwa, guherekezwa no guhindura imyitwarire bitewe nuko ubuzima bwahindutse. Inzu bazifate neza, ni izabo, baziteho”.

Yakomeje asobanura ko ibitarakosorwa ku kibazo cy’inyubako babibonye ko hari inzu zishaje n’izubatswe nabi, hari ibyakosowe  cyane zimwe zisanwa hakurikijwe uko ingengo y’imari igenda iboneka. 

Imidugudu 10 basanze nta mashanyarazi ifite, bikaba bigenda bikorwa kuko ni ibikorwa remezo biri mu by’ibanze kugira ngo Umudugudu abantu bishimire kuwuturamo.

Yasobanuye ibikubiye muri raporo ya Sena, ko mu Midugudu 20 yasuwe hagaragaramo inkuta zaturitse, mu Midugudu 13 hari aho usanga nta bwiherero, ni ikibazo kitakagombye no gutinda gukemurwa kuko hakoreshwa n’umuganda.

Ku rundi ruhande, yavuze ko mu Midugudu 13 ku bijyanye n’amazi  hari ibyakosowe, muri raporo y’ubushize nko ku Mudugudu wa Karama amazi yari yarafunzwe kubera ko wari ufitiye umwenda WASAC itarishyuwe amafaranga y’u Rwanda 9 000 000,  ariko Umujyi wa Kigali ubu basanze warishyuye, hari n’Uturere twasannye imiyoboro y’amazi yari yarangiritse.

Abasenateri batandukanye batanze ibitekerezo ku bibazo byagiye bigaragara bagaruka cyane ku kwigisha abaturage mbere y’uko batuzwa mu Midugudu y’Icyitegererezo n’indi Midugudu ndetse no guherekezwa bagasobanurirwa imyitwarire ikwiye kuranga abantu mu mibanire yabo.

Harishimirwa ibyagezweho

Abasenateri bashimye uburyo ibyo bibazo bigenda bikemurwa, hari intambwe yatewe  mu kubikemura kuko hari inzu zigenda zisanwa, hagashyirwa ibikorwa remezo mu Midugudu n’ibindi.

Banavuze ko ibibazo bidakeneye ingengo y’imari bikwiye kuba biva mu nzira bigakemurwa.

Leta igenda ishyiraho ingamba zo gukemura Ibibazo nko ku bicanwa abantu bagahabwa gaze,  za rondereza ndetse hamwe na hamwe Inzego z’ibanze zigenda zikora uko zishoboye zikabaha ku bisagara bya Leta kugira ngo abatuye mu Midugudu babone aho guhinga, hanatekerezwa ku yindi mirimo yabateza imbere.

Ku bijyanye n’ubworozi, hari aho bigenda neza, hakaba n’aho imicungire itagenze neza, hakifuzwa ko RCA yajya ikurikirana amakoperative yo mu Midugudu nk’uko ikurikirana andi.

Muri rusange abatuzwa mu Midugudu bashishikarizwa gufata neza inzu n’ibindi bikorwa remezo kuko ari ibyabo.

Uhawe inzu mu Mudugudu akayifata neza imyaka 5 ashobora kuyegukana kandi hari hamwe abatujwe ubona bagenda bongererwa agaciro izo nzu nk’abashyiramo amakaro.

Mu bijyanye n’imiturire, biteganyijwe ko nibura 80% by’abantu baba batuye mu Midugudu mu 2024 80%  naho mu 2030 abantu 100% bazaba bari mu Midugudu.

Dr. Alvera Mukabaramba, Visi Perezida wa Sena ushinzwe Imari n’Abakozi

Yanditswe na NYIRANEZA JUDITH

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA