Abitandukanyije n’imitwe irimo FDLR biyemeje kudatatira Ubunyarwanda
Amakuru

Abitandukanyije n’imitwe irimo FDLR biyemeje kudatatira Ubunyarwanda

Imvaho Nshya

July 21, 2023

Abanyarwanda bitandukanyije n’imitwe yitwara gisirikare barimo abo mu Mutwe w’Iterabwoba wa FDLR babaga mu mashyamba ya Repubulika Iharanira Demokarasi ya Congo (RDC), bagaragaje ko biteguye gusigasira ibyo Abanyarwanda bagezeho bishingiye ku bumwe n’ubwiyunge.

Byagarutsweho n’abagize itsinda ry’abagera kuri 92 bo mu cyiciro cya 69 basoje amasomo y’ubumwe n’ubwiyunge ajyana n’ay’imyuga n’ubumenyi ngiro baherewe mu Kigo gishinzwe gusezerera no gusubiza mu buzima busanzwe abahoze ari abasirikare cya Mutobo, gihereye mu Karere ka Musanze ku wa Kane taliki ya 20 Nyakanga.

Umwe  mu barangije aya mahugurwa, Col. Nizeyimana Mariko wahoze muri F L N,(Force de Liberation National) yabwiye Imvaho Nshya ko na we asanga kudasigasira ubumwe by’Abanyarwanda ari uguta igihe no guhemukira u Rwanda.

Yagize ati: “Igihe tugezemo mu Rwanda ntabwo ari icy’intambara kuko Abanyarwanda barazirambiwe cyane, kandi iyo ubonye ibyo Abanyarwanda bamaze kugeraho ntiwatekereza intambara, kandi abitwaza ko hari ibyo barwanira ntabyo. Ahubwo ubu twiyemeje kubana neza nk’Abanyarwanda, duharanira ineza y’Igihugu n’iterambere, tuzabana neza kandi n’abo dusanze mu Rwanda.”

Izabayo Sabin, umwe mu bahoze muri FDLR, avuga ko uko yasanze u Rwanda atari ko yarutekerezaga kubera ko bamubwiraga ko habayo ubwoko bumwe kandi abarufashe icyo bakoze ari ukurusahura.

Yagize ati: “Njyewe nari nzi ko mu Rwanda hataboneka amajyambere ameze gutya, mbonye imihanda barayikoze neza mbona abantu bose baragendera kuri gahunda, abantu bose urabona baganira bahuje nta kibazo bafite, mu gihe batubwiraga ko igihugu cy’u Rwanda kirimo ubwoko bumwe gusa, abanyamahanga barufashe bararusahuye gusa, bakarwaka umwimerere, ariko nasanze buri Munyarwanda aganira neza na mugenzi we ndetse natwe batwakiriye neza ndumva nta kibazo.”

Yakomeje avuga ko bakigera mu Rwanda ubwoba n’igihunga bari bafite byayoyotse ku buryo ubu biyumva nk’Abanyarwanda. Ati: “Ni na byo nshimira rero Perezida wa Repubulika Paul Kagame washyizeho gahunda y’ubumwe n’ubwiyunge”.

Akomeza avuga ko asanze u Rwanda  ari Igihugu gitekanye ndetse, gifite n’iterambere, ahereye ko ku mihanda ahasanga amatara, Abanyarwanda bakaba  bagenda amasaha 24 kuri 24, maze avuga ko na we azanye umusanzu we mu kubaka u Rwanda.

Yagize ati: “Natwe tuje kwifatanya n’abandi Banyarwanda nk’abandi, natwe tuje kubaka Igihugu cyatubyaye, natwe dusaba ko badutoza nk’umuco bafite. Nzafatanya n’Abanyarwanda kubaka Igihugu cyacu cy’u Rwanda, ni ugufatanya n’abandi kubaka Igihugu, none se wakongera ugasubira iriya inyuma mu mapole (mu mashyamba)?”

Minisitiri w’Ubutegetsi bw’Igihugu Musabyimana Jean Claude, yasabye abayahawe bose gukomeza kubumbatira ubumwe bw’Abanyarwanda hagamijwe amahoro n’iterambere ry’Igihugu.

Minisitiri Musabyimana yagize ati: “Kuba mwaritandukanyije n’imitwe igamije kugirira nabi u Rwanda n’Abanyarwanda ndabibashimira ariko ndabasaba kudatatira ihame ry’ubumwe n’ubudaheranwa by’Abanyarwanda, ntimuzigere mugerageza gukoma mu nkokora intambwe nziza kandi ishimishije u Rwanda rumaze gutera.”

Yakomeje agira ati: “Haba mu kubaka ubumwe n’ubudaheranwa by’Abanyarwanda, haba ndetse no mu zindi gahunda zigamije kubaka Igihugu no guhora kijya heza kurushaho, ndabasaba kuzagaragaza ko amahugurwa mwaherewe hano yabagiriye akamaro koko,agatuma mbere na mbere muhinduka mu bitekerezo no mu migenzereze kandi mugaharanira gusigasira umutekano, Umukuru w’Igihugu cyacu n’Inzego z’umutekano bamaze kutugezaho”.

Minisitiri Musabyimana akomeza asaba abahawe imbabazi na Perezida wa Repubulika ko batazipfusha ubusa, ahubwo bagaharanira kubana neza n’abo basanze.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA