Abubatsi b’i Rubavu biyemeje kurwanya akajagari mu myubakire
Amakuru

Abubatsi b’i Rubavu biyemeje kurwanya akajagari mu myubakire

NTAWITONDA JEAN CLAUDE

August 27, 2023

Abagize Sendika y’abubatsi, ababaji n’abanyabukorikori ya STECOMA biyemeje kurwanya imyubakire yo mu kajagari mu Karere ka Rubavu kubera ko idindiza Igihugu ndetse igashira mu kaga ubuzima.

Aba banyamyuga biyemeje ibi ubwo bari mu nama yateguwe na STECOMA ku nkunga ya ENABEL muri aka Karere ku wa Gatanu 25 Kanama 2023.

Iyo nama yari igamije kwigira hamwe uko barushaho gukora kinyamwuga, mu muco no kurebera hamwe zimwe mu mbigamizi bagihura na zo.

Abiganjemo abubatsi bavuze ko imyubakire yo mu kajagari ikiri ikibazo muri aka Karere binatuma babura akazi kubera abanyamuryango ba Sendika batajya barebera amakosa.

Uzabintwali Prudence uhagarariye Sindika STECOMA mu Karere ka Rubavu, yemeza kobagiye gushishikariza abanyamuryango kubaka ibyemewe no gukangurira abacyubaka mu kajagari kubivamo.

Yagize ati:” Tugomba guca akajagari mu myubakire twihereyeho tukanabishishikariza n’abandi. Mu karere kacu usanga umuntu uri kubaka mu kajagari agiye gushaka abubatsi ahazwi nko ku Ndege akaba ari bo abafata, twe tuba muri Sendika tukabura akazi kubera aba aziko atatubwira gukora amakosa.

Twiyemeje  kubihagurukira, imyubakire yo mu kajagari igacika.”

Mukanziza Olive uhagarariye abagore b’abatekinisiye mu rugaga rw’Inama y’Igihugu y’Abagore mu Karere ka Rubavu,  yemeza ko bagiye gukora ibishoboka byose ikibazo cyo kubaka mu kajagari kigacika burundu.

Ati: “Mfatanyije na bagenzi banjye tugiye gushishikariza abubaka mu kajagari kubivamo bakubaka bafite ibyangombwa. Tugiye kugira uruhare mu kwigisha abaturage amategeko ajyanye n’imyubakire aho bari.”

Mukasine Florentine , Umunyamabanga Mukuru wungirije wa STECOMA ushinzwe ubuvugizi n’ikemurampaka mu Rwanda, yavuze ko bari mu bukangurambaga mu Ntara y’Iburengerazuba baganiriza abubatsi ku murimo unoze, kwihesha agaciro no kumenya ibibagenewe.

Ati: “Muri Rubavu hari abakozi b’abashomeri bari muri Sendika badahabwa akazi kubera hari ibyo bashobora gusaba kurusha abafundi bari ku Ndege. Abanyamuryango bacu baba bafite amakuru twababujije kwinjira mu bwubatsi bw’akajagari n’aho babibonye bahita batanga amakuru.

Usanga icyo kintu abanyamuryango bacu bakizize bakabura umurimo ariko tugiye gukomeza gukora ubuvugizi, kandi ibyo twiyemeje no uguca amakosa yose yagaragaraga mu murimo iri muri Sendika.”

Ubuyobozi bw’Akarere ka Rubavu buvuga ko bumaze igihe bwarahagurukiye kurwanya imyubakire yo mu kajagari yaba mu magambo no mu bikorwa.

Harelimana E.Blaise, Umunyamabanga Nshingwabikirwa w’Umurenge wa Rubavu, aganira n’Imvaho Nshya yemeje ko ikibazo cyo kubaka mu kajagari kigenda gikemuka.

Ati: “Twarabihagurukiye nk’ubuyobozi ndetse n’abaturage bamaze kubigira ibyabo. Turashimira abibumbiye muri Sendika ya STECOMA kuko bafite gahunda nziza mu gufatanya n’ubuyobozi kurwanya abubaka mu buryo butemewe. Hari byinshi bamaze kugiramo uruhare, tubasaba gukomeza ubukangurambaga kugira ngo kubaka mu kagajari bicike burundu dufatanyije.”

Sendika ya STECOMA kugeza ubu imaze kugira abanyamuryango barenga 

 78,000 mu Rwanda hose ikaba ibafasha mu buvugizi no kubahugura. 

 Ku nkunga y’Ikigo cy’u Bubiligi gishinzwe Iterambere Mpuzamahanga (ENABEL) n’Ikigo cy’Igihugu cy’Ubumenyingiro (Rwanda TVET Board) biteganywa ko abanyamuryango bazajya bahugurwa bakanahabwa impamyabushobozi.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA