Biniam Girmay, umukinnyi ukomoka muri Eritrea ukinira ikipe ya Intermarché – Wanty – Gobert Matériaux yo mu Bubiligi akaba afite imyaka 22  y’amavuko yongeye gutsindira igihembo cy’umukinnyi witwaye neza mu mwaka wa 2022 muri Afurika  mu mukino wo gusiganwa ku magare  “Cycliste Africain de l’année 2022” akaba  ari inshuro ya gatatu kuko yari yegukanye iki gihembo muri 2020 na 2021.

Biniam Girmay yegukanye iki gihembo ahigitse  bagenzi be batoranyijwe n’itsinda  ry’abategura isiganwa mpuzamahanga ry’umukino wo gusiganwa ku magare ribera muri Gabon “La Tropicale Amissa Bongo” riyobowe na Bernard Hinault wegukanye Tour de France ishuro 5 ari na we watangije iki gikorwa cyo guhemba umukinnyi witwaye neza kuva mu 2012.

Muri uyu mwaka wa 2022,  Biniam Girmay yitwaye neza  yegukana isiganwa mpuzamahanga ry’umunsi umwe mu Bubiligi “Ghent-Wevelgem” muri Werurwe 2022 ndetse yegukana n’intera ya 10  ya Giro d’Italia 2022 muri Gicurasi 2022.

Uko abakinnyi bakurikiranye

Ku mwaya wa kabiri haje  Louis MEINTJES (South Africa – Intermarché-Wanty-Gobert), uwa 3 aba Natnael Tesfazion (Eritrea – Drone Hopper-Androni Giocattoli)  hakurikiyeho Mugisha Moïse (Rwanda – ProTouch),  Henok Muluebrhan (Eritrea – Bardiani-CSF-Faizanè), Daryl Impey (South Africa – Israel-Premier Tech), Amanuel Ghebreigzabhier (Eritrea – Trek-Segafredo), Dawit Yemane (Eritrea – Bike Aid), Paul Daumont (Burkina Faso) na Gustav Basson (South Africa – Pro Touch).

Abegukanye iki gihembo kuva muri 2012

Natnael Berhane (Eritrea, 2012), Louis Meintjes (South Africa, 2013 na 2017), Mekseb Debesay (Eritrea, 2014), Daniel Teklehaimanot (Eritrea, 2015) Tesfom Okubamariam (Eritrea, 2016), Areruya Joseph (Rwanda, 2018), Daryl Impey (South Africa, 2019) na Biniam Ghirmay Hailu (Eritrea, 2020,2021 na 2022).

Ba uwa mbere mu kumenya amakuru agezweho!!!