Amakoperative afite ibikorwa by’indashyikirwa mu Rwanda
Amakuru

Amakoperative afite ibikorwa by’indashyikirwa mu Rwanda

Imvaho Nshya

July 29, 2023

Ku munsi w’ejo ku wa Gatanu tariki 28 Nyakanga 2023 hizihijwe umunsi mpuzamahanga w’Amakoperative wizihirizwa kuri Kigali Pelé Stadium mu Karere ka Nyarugenge mu Mujyi wa Kigali.

Uyu munsi witabiriwe na Minisitiri w’Ubutegetsi bw’Igihugu, Musabyimana Jean Claude, Meya w’Umujyi wa Kigali, Umuyobozi Mukuru w’Agateganyo wa RCA Mugwaneza Pacifique ndetse n’inzego z’umutekano.

Hamuritswe ibikorwa by’amakoperative yo mu Turere. Insanganyamatsiko y’uyu mwaka igira iti ‘Amakoperative afasha mu kwihutisha iterambere rirambye’.

Kuri uyu munsi mpuzamahanga wahariwe amakoperative, hashimwe abakoze ibikorwa by’indashyikirwa ku rwego rw’Igihugu, Koperative RFTC yo mu Karere ka Nyarugenge ni yo yahize izindi mu bikorwa by’intangarugero.

Itanga serivise zo gutwara abantu n’ibintu mu gihugu hose. RFTC ni Ihuriro ry’amakoperative 12 arimo abanyamuryango 1,312.

Ubwasisi bwatanzwe muri Werurwe 2023, bungana na 339,481,477 Frw. Ingoboka zahawe abanyamuryango zingana n’amafaranga y’u Rwanda 12,400,000.

Mu ishoramari RFTC ifite harimo Jali Transport Ltd ishinzwe gutwara abagenzi mu Mujyi wa Kigali, Jali Real Estate Ltd ishinzwe kubaka no gucunga gare zitandukanye na Jali SC Plc Ikigo cy’imari ku banyamuryango b’amakoperative n’Abanyarwanda muri rusange.

SACCO y’Indashyikirwa ku rwego rw’Igihugu ni Urufunguzo rw’Ubukire Runda (S.U.U.R.) yo mu Murenge wa Runda mu Karere ka Kamonyi mu Ntara y’Amajyepfo.

Ifite abanyamuryango 14,203, umutungo wayo wose ni 2, 105, 964,323 Frw. Umutungo bwite ni 572,834,719 Frw. Ubwizigame bw’abanyamuryango ni 1,496,277,051Frw.

Kugeza ubu inguzanyo ziri mu banyamuryango ni 1, 086, 988,558 Frw.

Umujyi wa Kigali

Ku rwego rw’Umujyi Koperative COCTRAMAVK yo mu Karere ka Kicukiro ni yo yaje ku isonga.

Ikora ubwikorezi bw’abakoresha amakamyo imbere mu gihugu ndetse no hanze y’igihugu.

Buri mwaka Koperative itanga umusanzu wa Mituelle ku baturage 200 mu Mirenge Ibiri.

Umunyamuryango wagize ibyago ahabwa ingoboka ya 980,000 Frw. Buri munyamuryango ubishaka ahabwa inguzanyo ya 500,000 Frw akayishyura nta nyungu mu mezi 6.

Abanyamuryango bafite imodoka zabo bakoresha hiyongereyeho ikamyo 7 bose bahuriyeho.

COCTRAMAVK yabonye ubuzimagatozi muri 2011, ifite abanyamuryango 98 harimo abagabo 96 n’abagore 2 aho umugabane ugeze kuri 2,300,000 Frw.

Umutungo wayo ungana na 554,800.665 Frw. Buri munyamuryango wa koperative ahabwa amafaranga 600,000 Frw y’inyungu buri mwaka.

Iburasirazuba

Koperative y’indashyikirwa mu Ntara y’Iburasirazuba ni Twongere Umusaruro wa Kawa yo mu Karere ka Kayonza.

Ikusanya umusaruro wa Kawa ikanawutunganya. Koperative yabonye ubuzima gatozi mu 2013.

Yatangiranye abanyamuryango 45, ubu igeze ku banyamuryango 162, abagore 156 n’abagabo 6.

Imari shingiro yayo igeze ku 14,110,200 Frw Ifite imitungo yimukanwa n’itimukanwa y’agaciro ka 178,132,404 Frw.

Itangira abanyamuryango bayo Ejo Heza aho buri mwaka ibatangira 2,916,000 Frw.

Yishyurira buri munyamuryango ubwisungane mu kwivuza bw’abantu 3. Yubatse uruganda rutunganya Kawa ku bufatanye n’abafatanyabikorwa, inubaka inzu y’urusogongerero rwa Kawa iri ku rwego mpuzamahanga.

Amajyepfo

Koperative y’indashyikirwa mu Ntara y’Amajyepfo ni iyo mu Karere ka Nyamagabe yitwa KOBACYAMU.

Yabonye ubuzima gatozi mu 2010 ifite abanyamuryango 5,675 barimo abagore 2,157 abagabo 3,518. Ihinga icyayi ku buso bungana na Hegitari 790.

Ifite Inyubako zitandukanye zifite agaciro ka 51,408,006 Frw, inyubako y’agaciro ka 55,135,749 Frw, ubutaka bufite agaciro kangana na 24,600,000 Frw, ibinyabiziga bitifte agaciro kangana na 129,262,081 Frw na Station ya essence ifite agaciro ka 167,837,420 Frw.

KABACYAMU yatanze akazi ku bakozi 46 bahoraho, n’abakozi ba nyakabyizi biyongera cyangwa bakagabanywa bitewe n’akazi gahari.

Amajyaruguru

Koperative y’Indashyikirwa mu Ntara y’Amajyaruguru ni Koperative Abakunda Ibireti yo mu Karere ka Musanze.

Yabonye ubuzima gatozi muri 2010. Ifite abanyamuryango 1,004 n’umugabane ungana na 30,000frws wa buri munyamuryango, bingana n’imari shingiro ya 30,120,000frw.

Ifite imitungo itimukanwa ifite agaciro ka 157, 004, 200 Frw. Yishyuriye abanyamuryango ubwisungane mu kwivuza na Ejo Heza bifite agaciro ka 43,301,400Frw.

Yatanze akazi ku bakozi bahoraho 26, ikaba ikoresha ikoranabuhanga mu icungamutungo (Software Quickbook).

Iburengerazuba

Koperative CEZONYI ikora ubworozi bw’inka za kijyambere mu Karere ka Nyabihu mu Ntara y’Iburengerazuba, ni yo yabaye indashyikirwa.

Yabonye ubuzima gatozi mu mwaka wa 2009. Mu mwaka wa 2022, koperative yatanze urwunguko n’ubwasisi bungana na 26,000,000 Frw ku banyamuryango bayo.

Amafaranga y’ubwizigame kuri Konti angana na 125, 000,000 Frw. Yatangiye abanyamuryango Ejo Heza ya 2,520,000 Frw.

Ifite abanyamuryango 84, umugabane ubu ugeze kuri 1,036,000Frw naho imari shingiro ikaba igeze kuri 87,024,000 Frw.

Yaguze imodoka itwara amata n’ibindi bikoresho by’ikusanyirizo bifite agaciro ka 56,500,000Frw, itanga akazi ku bakozi 8 ikaba igemura amata angana na litiro 14,000 ku munsi.

Yanditswe na KAYITARE JEAN PAUL

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA