Amarerero, igisubizo kirambye mu kugabanya 33% by’abana bagwingiye
Amakuru

Amarerero, igisubizo kirambye mu kugabanya 33% by’abana bagwingiye

Imvaho Nshya

October 6, 2023

Ikigo cy’Igihugu gishinzwe imikurire y’abana bato (NCDA) cyatangaje ko igwingira ry’abana mu Rwanda ari ikibazo gihangayikishije aho gisaba abaturage kongera imyumvire y’uburyo bita ku bana babagaburira indyo yuzuye ndetse bakanayoboka ingo mbonezamikurire y’abana bato azwi nk’amarerero.

Ubuyobozi bwa NCDA buvuga ko amarerero ari kimwe mu bisubizo byo kugabanya abana bagwingira bakiri munsi y’imyaka itandatu, mu gihe imibare yatangajwe na RDHS igaragaza ko abana 33% bari munsi y’imyaka itandatu bagwingiye biturutse ku kutitabwaho uko bikwiye n’ababyeyi.

Icyo kigo cyabigarutseho ku wa Kane tariki ya 5 Ukwakira 2023, ubwo hizihizwaga umunsi wahariwe Imbonezamikurire y’Abana Bato (ECD Day) mu Mujyi wa Kigali.

Umuyobozi Mukuru wa NCDA Ingabire Assoumpta, yagaragaje ko igwingira ari ikibazo kigihangayikishije aho imibare igaragaza ko abana bari munsi y’imyaka itanu bari ku ijanisha rya 33% bagwingiye mu gihe mu Mujyi wa Kigali abagwingiye ari 22%.

Yasabye kandi ababyeyi ko kugira ngo iri gwingira ricike ari uko ababyeyi bajyana abana mu marerero kugira ngo bitabweho ariko kandi bakanita ku mwana kuva agisamwa kugera agejeje imyaka ibiri (Iminsi igihumbi).

Ati: “Ababyeyi rwose ni ugukomeza kubibumvisha kandi kumuvana mu rugo akamujya mu irerero ni byiza, kandi akitabwaho ni byiza kandi umutekano we uba ucunzwe neza, ni ugukomeza kubisobanurira abantu bakongera imyumvire cyane cyane iyo twitaye kuri ya minsi igihumbi, ababyeyi tubakangurira kwisuzumisha inda uko bisabwa, iminsi igihugu y’umwana bayiteho.”

Mu kurwanya ikibazo cy’igwingira Leta y’u Rwanda yashyize imbaraga mu gushyiraho ingo mbonezamikurire z’abana bato (ECDs), aho abana bitabwaho bahabwa indyo yuzuye muri aya marerero.

Nimugire Chantal, Umuturage utuye mu Karere ka Nyarugenge mu Mujyi wa Kigali, avuga ko kuba abana batitabwaho ahanini bituruka ku babyeyi baba badafite imyumvire ihwitse yo kubitaho n’uburangare.

Yagize ati: “Cyane cyane abazunguzayi usanga batohereza abana babo mu marerero, ugasanga bagiye bonyine umwana asigaye ku musozi.”

Uyu muturage ariko avuga ko abaturage bamaze kujyana abana mu bigo mbonezamikurire, na bo  bahakura ubumenyi mu gutegura indyo yuzuye y’abana kubera ko baza kwigira kuri ibi bigo mbonezamikurire uko bategura ifunguro ry’umwana.

Minisitiri w’Uburinganire n’Iterambere ry’Umuryango Dr. Uwamariya Velentine, yasabye abafatanyabikorwa n’abaturage muri rusange gukora ibishoboka byose bagashyigikira gahunda ya Leta yo kwita ku mikurire y’abana hirindwa ko bagwingira.

Ati: “Iyo umwana yahawe serivisi akura neza, kwita kuri iyi gahunda bisobanuye kugira umuryango mwiza, Umunyarwanda mwiza kandi ufite iterambere ryiza, ni yo mpamvu Leta y’u Rwanda yashyize imbaraga mu kwita ku minsi igihumbi y’umwana.”

Ikigo gishinzwe guteza imbere Gahunda Mbonezamikurire y’Abana Bato mu Rwanda (NCDA) igaragaza ko ibigo mbonezamikurire  by’abana bato byagiye byubakwa ahantu hatandukanye ndetse n’ibikorera mu miryango.

Kuri ubu hari  ibigo 23 bikorera aho abantu bakorera (Work Based ECDs), ingo mbonezamikurire 77 z’icyitegererezo, ingo 3 898 (ECDs) zishamikiye ku mashuri, ingo 1 992 zegereye abaturage, mu gihe ibigo mbonezamikurire bikorera mu ngo z’abaturage ari 25 179 byubatswe kugira ngo iri gwingira mu bana bakira bato ryirindwe.

ZIGAMA THEONESTE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA