Amb. Einat Weiss yashenguwe n’amateka ya Jenoside yakorewe Abatutsi
Amakuru

Amb. Einat Weiss yashenguwe n’amateka ya Jenoside yakorewe Abatutsi

NTAWITONDA JEAN CLAUDE

August 18, 2023

Einat Weiss, Ambasaderi mushya wa Isiraheli mu Rwanda, ku wa Kane yasuye Urwibutso rwa Jenoside rwa Kigali ku Gisozi, yunamira inzirakarengane zazize Jenoside yakorewe Abatutsi mu 1994 ndetse bimutera gutekereza no kuri Jenoside yakorewe Abayahudi, ashimangira ko ibyabaye bitazabaho ukundi.

Amb. Einat Weiss, ni umwe mu bo mu gisekuru cya gatatu gikomoka ku barokotse Jenoside yakorewe Abayahudi yahitanye abasaga miliyoni esheshatu ikozwe na Guverinoma y’Abadage b’aba Nazi.

Akigera ku Rwibutso rwa Jenoside rwa Kigali yakiriwe n’abashinzwe kwakira abarusura buri munsi, asobanurirwa amateka ya Jenoside yakorewe Abatutsi guhera ku macakubiri yabibwe n’Abakoloni, uko yateguwe, uko yashyizwe mu bikorwa n’uko yahagaritswe.

Yanahawe ibisobanuro by’uburemere n’ubukana iyo Jenoside yakoranywe, abasaga miliyoni bakicwa mu gihe cy’iminsi 100 gusa, barimo abarenga 250,000 bashyinguwe ku Rwibutso rwa Kigali yasuye akanashyira indabo ku mva bashyinguwemo.

Nyuma yo gusura Urwibutso rwa Jenoside rwa Kigali, Amb. Einat Weiss yagize ati: “Umutima wanjye uri kumwe n’abarokotse ndetse n’imiryango y’ababuze ababo. Nasuye Urwibutso rwa Jenoside rwa Kigali nsobanurirwa ubukana bw’ubwicanyi bwakozwe mu gihe cya Jenoside yakorewe Abatutsi mu 1994.”

Yakomeje agira ati: “Nk’igisekuru cya gatatu cy’abarokotse Jenoside yakorewe Abayahudi biyemeje guharanira ko ‘ibyabaye bitazasubira ukundi’, uku ni ugutsindwa k’ubumuntu.”  

Ku wa Gatatu w’iki cyumweru ni bwo Ambasaderi Einat Weiss yashyikirije Minisitiri w’Ububanyi n’Amahanga n’Ubutwererane Dr. Biruta Vincent, kopi z’inyandiko zimwemerera guhagararira inyungu za Isiraheli mu Rwanda.

Mu minsi mike amaze mu Rwanda, yasogongeye ku rugwiro rw’Abanyarwanda, agaragaza imbamutima ze mu butumwa yanyujije ku mbuga nkoranyambaga aho yashimiye abagize Guverinoma n’abaturage b’u Rwanda muri rusange.

Avugana n’itangazamakuru, Amb. Weiss yiyemeje kurushaho kunoza umubano ukomeje gushinga imizi hagati y’u Rwanda na Isiraheli, aboneraho gushimangira ko igihugu cye gishyize imbere kurushaho kwagura umubano mu ikoranabuhanga no guhanga udushya, guteza imbere ubuhinzi butanga umusaruro, uburezi, ubuzima, guteza imbere ubukerarugendo, ishoramari n’izindi nzego zitandukanye.

Amb. Einat Weiss yagize ati: “Nishimiye cyane gukomeza kunoza umubano hagati y’ibihugu byacu by’abavandimwe, kandi ndagira ngo nshimire Guverinoma y’u Rwanda ku rugwiro banyakiranye kuva nashyika i Kigali.”

Einat Weiss wagizwe Ambasaderi mushya yabaye Umujyanama ushinzwe ibya Politiki muri Ambasade ya Israel muri Leta Zunze Ubumwe z’Amerika hagati ya 2016 na 2019.

Ubunararibonye afite mu bya dipolomasi bunagaragaramo kuba yarabaye Umujyanama n’Umuvugizi muri Minisiteri y’Ububanyi n’Amahanga ya Isiraheli, ushinzwe itangazamakuru n’itumanaho muri Minisiteri, n’Umujyanama mu bya Politiki muri Ambasade ya Isiraheli i Canberra muri Australia guhera mu 2021 kugeza mu 2013.

Einat Weiss asimbuye Ron Adam wasoje manda ye, akaba yarasubiye mu gihugu cye mu cyumweru gishize. Ron Adam yagizwe Ambasaderi wa mbere wa Israel mu Rwanda guhera mu 2019, atangirana na Ambasade yafunguwe i Kigali muri Gicurasi 2019.

Tariki 6 Kanama 2023, ni bwo Inama y’Abaminisitiri yemeje Einat Weiss nk’Ambasaderi mushya wa Isiraheli mu Rwanda.

Minisitiri Dr. Biruta yifatanyije na we kwishimira kuba ari we watoranyijwe kuba  Ambasaderi wa Isiraheli mu Rwanda, aboneraho no gushima umubano mwiza ukomeje gutera imbere hagati y’ibihugu byombi.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA