Amb. Rwamucyo woherejwe muri Loni yashimiye Perezida Kagame
Amakuru

Amb. Rwamucyo woherejwe muri Loni yashimiye Perezida Kagame

Imvaho Nshya

October 22, 2023

Ambasaderi Rwamucyo Ernest woherejwe guhagararira u Rwanda mu Muryango w’Abibumbye (Loni) yashimiye Perezida wa Repubulika Paul Kagame wamugiriye icyizere akamuha inshingano nshya, amwizeza ko atazapfusha ubusa ayo mahirwe.

Ni nyuma y’aho Inama y’Abaminisitiri yateranye ku wa Gatanu tariki ya 20 Ukwakira imwemeje nk’Ambasaderi Uhoraho w’u Rwanda muri Loni, asimbuye Amb. Claveri Gatete uheruka kugirwa Umunyamabanga Nshingwabikorwa wa Komisiyo ya Loni ishinzwe Ubukungu muri Afurika (UN ECA).

Yagize ati: “Ncishijwe bugufi cyane n’icyizere nagiriwe, kandi ndashimira byimazeyo Nyakubahwa Paul Kagame ku bw’inshingano nshya nahawe nk’Intumwa Ihoraho y’u Rwanda mu Muryango w’Abibumbye. Nyakubahwa, niyemeje ko nzakoresha imbaraga zose mu guha agaciro icyo cyizere mwangiriye.”

Rwamucyo yari asanzwe ari Ambasaderi w’u Rwanda mu Buyapani ndetse areberera n’inyungu zarwo mu bindi bihugu birimo Malaysia, Philippines na Thailand.

Inama y’Abaminisitiri kandi yanemeje ko izo nshingano Amb. Rwamucyo yakoraga zikomezwa na Mukasine Marie Claire wagizwe Ambasaderi w’u Rwanda mu Buyapani.

Mukasine we yari asanzwe ari Umuyobozi wa Komisiyo y’Uburenganzira bwa Muntu mu Rwanda (NCHR), izo nshingano yari ho zikaba zahawe Umurungi Providence.

Mukasine na we yashimye Perezida Kagame agira ati: “Mbikuye ku mutima nongeye kubashimira cyane Nyakubahwa Prezida wa Repubulika Paul Kagame ku cyizere mwongeye kungiririra  kandi ndabizeza ko izi nshingano  zo guhagararira u Rwanda mu Buyapani nzazikorana umurava kandi nubakiye ku nama nziza zanyu.”

Abandi bahawe inshingano nshya ni Dr. Aimé Muyoboke Kalimunda wagizwe Umuyobozi Mukuru mu Kigo cy’ishuri cyo kwigisha no Guteza Imbere Amategeko (ILPD), Kamarampaka Consolée wagizwe Umunyamabanga Mukuru Wungirije w’Urwego rw’Igihugu rw’Ubugenzacyaha (RIB).

Nkuranga Jean Pierre yagizwe Umuyobozi Mukuru wungirije Ushinzwe Imari n’Ubutegetsi mu Ishuri Rikuru ry’u Rwanda ry’lmyunga n’Ubumenyingiro (RP) na ho Musonera Ephrem agirwa Umuyobozi Mukuru wungirije ushinzwe iterambere n’ubushakashatsi.

Nzeyimana Jean Claude we yagizwe Umuyobozi ushinzwe amashuri y’ibanze n’ishami ry’ibizamini by’ubumenyi ngiro Mu Kigo cy’lgihugu gishinzwe Ibizamini n’Ubugenzuzi bw’Amashuri (NESA).

Amb. Rwamucyo wahawe inshingano zo guhagararira u Rwanda muri Loni yashimiye Perezida Kagame

Indi myanzuro y’Inama y’Abaminisitiri

1. Inama y’Abaminisitiri yemeje imyanzuro y’Inama y’Abaminisitiri yateranye ku wa 11 Nzeri 2023.

2. Inama y’Abaminisitiri yagejejweho ibi bikurikira:

• ‘Raporo y’ibaruramari ya Leta ihujwe y’umwaka w’ingengo y’imari warangiye ku wa 30/06/2023.

• Amasezerano y’ubufatanye hagati ya Guverinoma y’u Rwanda na EasyGroup EXP yemerera u Rwanda kwakira irushanwa ry’igikombe cy’Isi cy’abahoze bakina umupira w’amaguru bamamaye cyane, azamara imyaka itatu: 2024, 2025 na 2026.

3. Inama y’Abaminisitiri yemeje imishinga y’amategeko ikurikira:

• Umushinga w’Itegeko ngenga rihindura Itegeko ngenga n° 001/2019.0L ryo ku wa 29/07/2019 rigenga amatora.

• Umushinga w’Itegeko ryemera kwemeza burundu amasezerano hagati ya Repubulika y’u Rwanda na Repubulika ya Koreya yo guca burundu gusoresha kabiri ku byerekeye imisoro ku musaruro n’ikumira ry’inyerezwa ry’umusoro no kutishyura umusoro.

• Umushinga w’Itegeko ryemera kwemeza burundu amasezerano y’inguzanyo hagati ya Repubulika y’u Rwanda na Banki ya Koreya y’Ubucuruzi bw’Ibisohoka n’Ibyinjira mu Gihugu, yerekeranye n’inguzanyo igenewe umushinga wo gusana no kwagura umuhanda Kigali-Muhanga.

• Umushinga w’Itegeko ryemera kwemeza burundu amasezerano y’inguzanyo hagati ya Repubulika y’u Rwanda na Banki ya Koreya y’Ubucuruzi bw’Ibisohoka n’Ibyinjira mu Gihugu, yerekeranye n’inguzanyo igenewe umushinga wo gusana no kwagura Ibitaro by’Akarere bya Kabgayi.

• Umushinga w’itegeko ryemera kwemeza burundu amasezerano y’impano hagati ya Repubulika y’u Rwanda n’Ikigega Mpuzamahanga gitsura Amajyambere, yerekeranye n’impano igenewe gutera inkunga umushinga w’Abajyanama b’Ubuzima.

• Umushinga w’Itegeko ryemera kwemeza burundu amasezerano y’inguzanyo hagati ya Repubulika y’u Rwanda n’lkigega Nyafurika gitsura Amajyambere, yerekeranye n’inguzanyo igenewe umushinga wo kubaka ikigo cy’icyitegererezo mu bumenyi mu by’indege.

• Umushinga w’Itegeko ryemera kwemeza burundu amasezerano y’impano hagati ya Repubulika y’u Rwanda n’Ikigega Mpuzamahanga gitsura Amajyambere, yerekeranye n’impano igenewe umushinga wo kubungabunga ubuzima bw’abaturiye ibirunga.

• Umushinga w’Itegeko ryemera kwemeza burundu amasezerano y’inguzanyo hagati ya Repubulika y’u Rwanda n’Ikigega Mpuzamahanga gitsura Amajyambere, yerekeranye n’inguzanyo igenewe umushinga wo kubungabunga ubuzima bw’abaturiye ibirunga.

• Imishinga y’amategeko yemera kwemeza burundu amasezerano ajyanye no gutwara abantu n’ibintu mu kirere, hagati ya Repubulika y’u Rwanda n’ibihugu bikurikira: Antigua and Barbuda, Austria, Bangladesh, Barbados, Colombia, Cuba, Czech, Guinea Bissau, Latvia, Maldives, Malta, Mauritania, New Zealand, Saint Lucia na Venezuela.

4. Inama y’Abaminisitiri yemeje Amateka akurikira:

• Iteka rya Perezida rigenga Ikigo cy’Igihugu gishinzwe Igororamuco.

• Iteka rya Minisitiri w’Intebe rigenga uburyo bwo kwegereza abaturage serivisi za Leta.

• Iteka rya Minisitiri w’Intebe rivana ubutaka mu mutungo rusange wa Leta rikabushyira mu mutungo bwite wayo, buhagabwa Komisiyo y’Umuryango w’Afurika y’Iburasirazuba ishinzwe guteza imbere ubumenyi, ikoranabuhanga n’ubuvumbuzi (EASTECO).

• Iteka rya Minisitiri ryerekeye uruhushya rwo gukoresha amazi.

• Amateka ya Minisitiri w’Intebe agena imbonerahamwe y’imyanya y’imirimo ya Minisiteri y’Imari n’Igenamigambi, Minisiteri y’Uburezi, Minisiteri y’Ubutegetsi bw’Igihugu, Minisiteri y’Ibikorwa Remezo, Minisiteri y’Ubucuruzi n’Inganda, Minisiteri y’Ibidukikije, Minisiteri y’Urubyiruko, Ikigo gishinzwe Ubuzima mu Rwanda, Ikigo cy’u Rwanda gishinzwe Ikoranabuhanga mu Itumanaho n’Isakazabumenyi n’Ikigo cy’Igihugu gishinzwe Ubutaka.

5. Inama y’Abaminisitiri yemeje politiki, porogaramu n’ingamba zikurikira:

• Amasezerano hagati ya Repubulika y’u Rwanda na Africa Pharmaceutical Technology Foundation (APTF), yemerera Africa Pharmaceutical Technology Foundation (APTF) kugira icyicaro gikuru mu Rwanda.

 • Amasezerano y’inyongera hagati ya Repubulika y’u Rwanda na Agence Francaise de Developpement (AFD), yemerera Agence Francaise de Developpement kugira icyicaro mu Rwanda.

 • Politiki y’Igihugu y’amazi, isuku n’isukura.

• Amasezerano hagati ya Sosiyete itunganya ikanatanga serivisi z’ingufu z’amashanyarazi (EUCL) na Rusumo Power Company, yerekeye gucunga no gukoresha umuriro w’amashanyarazi ukomoka ku rugomero rwa Rusumo.

• Amasezerano yo gutiza amashyamba ya Leta Sosiyete yitwa Ess-Oil Limited.

8. Mu bindi

• Minisitiri wa Siporo yamenyesheje Inama y’Abaminisitiri ibikorwa bya siporo biteganyijwe kubera mu Rwanda n’ibyo u Rwanda ruzitabira mu mahanga.

• Minisitiri w’Ibidukikije yamenyesheje Inama y’Abaminisitiri ibi bikurikira:

o Kuva ku itariki ya 23 kugeza ku ya 27 Ukwakira 2023, i Kigali hazabera Inama Mpuzamahanga y’abashakashatsi mu byerekeye ibihe (climate).

o Ku itariki ya 28 Ukwakira 2023, ku munsi w’Umuganda, hazatangizwa igihembwe cyo gutera amashyamba mu mwaka wa 2023/2024, icyo gikorwa kikazahurirana no kwizihiza isabukuru ya 48 y’umunsi wo gutera amashyamba.

• Minisitiri w’Ubuhinzi n’Ubworozi yamenyesheje Inama y’Abaminisitiri ko ku itariki ya 27 Ukwakira 2023, hazizihizwa Umunsi Mpuzamahanga w’Ibiribwa. Ibirori ku rwego rw’Igihugu bizabera mu Karere ka Kayonza.

• Minisitiri w’Imari n’Igenamigarnbi yamenyesheje Inama y’Abaminisitiri ibi bikurikira:

o Ku itariki ya 31 Ukwakira 2023 hazizihizwa Umunsi Mpuzamahanga wahariwe kuzigama.

o Ku itariki ya 10 Ugushyingo 2023, i Kigali hazizihizwa umunsi ngarukamwaka wo gushimira abasora ku rwego rw’Igihugu.

• Minisitiri w’Ubutegetsi bw’Igihugu yamenyesheje Inama y’Abaminisitiri ko kuva ku itariki ya 14 kugeza kuya 17 Ugushyingo 2023, i Kigali hazabera inama izahuza abahagarariye Inzego z’imitegekere y’Igihugu zegerejwe abaturage mu bihugu bigize Umuryango wa Commonwealth.

• Minisitiri wIbikorwaremezo yamenyesheje Inama y’Abaminisitiri ko kuva ku itariki ya 10 kugeza ku ya 14 Ukuboza 2023, i Kigali hazateranira Ihuriro Mpuzamahanga ku mikoreshereze y’amazi rihuza inzobere hagamijwe gushakira ibisubizo ibibazo by’amazi ku Isi.

NTAWITONDA JEAN CLAUDE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA