Ba Guverineri ba Nigeria biteguye gufatira urugero ku Mujyi wa Kigali
Amakuru

Ba Guverineri ba Nigeria biteguye gufatira urugero ku Mujyi wa Kigali

NTAWITONDA JEAN CLAUDE

August 25, 2023

Umwiherero w’iminsi ine wa ba Guverineri ba Leta za Nigeria witezwe gutangira kuri uyu wa Kane taliki ya 24 Kanama kugeza ku wa 27 Kanama 2023, aho abo bayobozi bavuga ko banyotewe no kwigira ku byo Umujyi wa Kigali umaze kugeraho.

Uwo mwiherero wiga ku Buyobozi wateguwe n’Ishami ry’Umuryango w’Abibumbye ryita ku Iterambere (UNDP), bikaba byitezwe ko uhuriza hamwe ba Guverineri bagera kuri 36 b’Intara za Nigeria.

Guverineri wa Leta ya Zamfara Dauda Lawal, ni umwe mu bitabiriye uwo mwiherero, wahishuye ko biteguye kureba ibyiza by’u Rwanda by’umwihariko harebwa imbaraga Umujyi wa Kigali ukomeje gushyira mu kwiyubaka nk’umujyi w’ikoranabuhanga kandi uhangana n’imihindagurikire y’ibihe.

Umuvugizi wa Guverineri Sulaiman Bala Idris, ku wa Gatatu yavuze ko uwo mwiherero wateguwe ku bufatanye bwa UNDP n’Ihuriro rya ba Guverineri ba Nigeria (NGF).

Yongeyeho ko muri iyo Nama habaho gahunda yo guhererekanya ubumenyi n’ubunararibonye binyuze mu gusura ibice bitandukanye by’Umujyi wa Kigali bigira ku rugendo rukomeje rwo kuwutegura mu buryo bw’ikoranabuhanga.

Ibyo ngo bizafasha abitabiriye kurushaho gusobanukirwa udushya twihariye indi mijyi y’Afurika yakwigira ku Mujyi wa Kigali.

Sulaiman yagize ati: “Umwiherero w’aba bayobozi uratuma barushaho kugira ubumenyi bwisumbuyeho binyuze mu butembere bazaba banaherekejwemo n’Umujyi wa Kigali ugaragaza amahirwe yo guhuza imiyoborere y’imijyi n’imitunganyirize y’imijyi y’ahazaza.

Muri uko gusura ibikorwa bitandukanye mu Mujyi wa Kigali baribanda ku bikorwa by’ingenzi bijyanye n’umutekano w’Umujyi, ubuzima bujyana no kubungabunga ibidukikije, imicungire y’imyanda, impinduka mu bukungu, ndetse n’ibindi bikorwa bigamije kugira imijyi y’Afurika icyicaro cy’ikoranabuhanga.

Abo bayobozi ngo biteguye kwigira ku ntambwe Umujyi wa Kigali umaze gutera muri urwo rwego.

Sulaiman ati: “Urwo rugendoshuri ba Guverineri bakora ruzabasigira amakuru y’ingenzi ajyanye no gutunganya imijyi no kurushaho kuyinoza kuko ari umushinga watangiye no mu yindi mijyi ya Nigeria.

“[…] Ibyo bizatubera amahirwe yo kungurana ibitekerezo no gusangira ubumenyi n’impuguke ku ngingo z’ingenzi cyane.”

Biteganyijwe ko ba Guverineri bo muri Nigeria bazanagira umwanya wo gusura Urwibutso rwa Jenoside rwa Kigali n’Ingoro y’Urugamba rwo guhagarika Jenoside yakorewe Abatutsi kugira ngo barusheho gusobanukirwa urugendo rw’u Rwanda rwo kwiyubaka, kunga ubumwe, no guharanira icyerekezo gishya cy’iterambere Abanyarwanda bahereye ku busa.

Biteganyijwe ko Perezida wa Repubulika y’u Rwanda Paul Kagame, ari mu banyacyubahiro bategerejwe mu mwiherero w’iminsi itatu wa ba Guverineri ba Leta (Intara) zitandukanye za Nigeria.

Nigeria ni igihugu gifite Leta cyangwa Intara 36 n’Umurwa Mukuru. Buri Ntara muri izo yitwa Leta kuko ifite inshingano zihariye za Politiki ariko abayobozi bazo bakagira n’inshingano bahuriraho n’ubuyobozi bukuru bwa Repubulika ya Nigeria.

Uretse Perezida Kagame, bivugwa ko ibyo biganiro bizitabirwa na Uhuru Kenyatta wabaye Perezida wa Repubulika ya Kenya ndetse na Jakaya Kikwete wabaye Perezida wa Tanzania.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA