BAL 2022: Ikipe ya Zamalek yegukanye umwanya wa gatatu

BAL 2022: Ikipe ya Zamalek yegukanye umwanya wa gatatu

NTAWITONDA JEAN CLAUDE

May 28, 2022

Zamalek 97-74 FAP

Umukino wa nyuma

Taliki 28-05-2022

Petro de Luanda-US Monastir (BK Arena-18h00)

Ikipe ya Zamalek yo mu Misiri yari ifite igikombe cya BAL 2021  yegukanye umwanya wa gatatu muri BAL 2022.

Kuri uyu wa Gatanu taliki 27 Gicurasi 2022 ni bwo habaye umukino wo guhatanira umwanya wa 3 wahuje ikipe ya Zamalek yo mu Misiri na FAP yo muri Cameroun. Uyu mukino warangiye, Zamalek itsinze FAP amanota 97 kuri 74.

Iyi kipe ya Zamalek  ni yo yatsinze uduce twose tw’umukino ku manota 19-11, 23-18, 23-22 na 32-23.

Umukinnyi wa Zamalek, Darryl Eugene “DJ.” Strawberry Jr ni we watsinze amanota menshi muri uyu mukino (20).

Darryl Eugene “DJ.” Strawberry Jr watsinze amanota menshi (20)

Ikipe ya Zamalek muri BAL 2021 yari yegukanye igikombe itsinze ku mukino wa nyuma US Monastir yo muri Tunisia. Uyu mwaka  Zamalek ikaba yaraviriyemo muri ½ itsinzwe na  US Monastir.

Iyi kipe ya Zamalek ni inshuro ya gatatu mu mateka isoreje ku mwanya wa gatatu muri iyi mikino y’ Afurika kuko mu 1972 ubwo imikino y’Afurika y’amakipe yabaye aya mbere iwayo  yabaga ku nshuro ya mbere i Bangui muri Central African Republic, Zamalek yasoreje ku mwanya wa 3 ndetse no mu 1983 ubwo imikino yaberaga i Dakar muri Senegal.

Muri BAL 2021 na 2022, Zamalek yakinnye imikino 14 itsindwa umukino umwe   na US Monastir muri ½.  Kugeza ubu Zamalek ifite igikombe cy’Afurika inshuro 2 (1992 na 2021).

Ikipe ya FAP yo muri Cameroun muri BAL 2021 yari yasoreje ku mwanya wa 7. Iyi ni inshuro ya mbere isoreje mu makipe 4 ya mbere muri Afurika.

Ikipe ya FAP yasoreje ku mwanya wa 4

Umukino wa nyuma urahuza Petro de Luanda na US Monastir

Kuri uyu wa Gatandatu taliki 28 Gicurasi 2022 ni bwo hasozwa imikino ya BAL 2022 ibaye ku nshuro ya kabiri.  Umukino wa nyuma urahuza ikipe ya Petro de Luanda yo muri Angola na US Monastir yo muri Tunisia (18h00) muri BK Arena.

Ikipe ya Petro de Luanda yasezereye ikipe ya FAP muri ½ mu gihe ikipe ya US Monastir yasezereye Zamalek.

Iyi ni inshuro ya kabiri US Monastir igiye gukina umukino wa nyuma kuko umwaka ushize muri BAL 2021 yakinnye umukino wa nyuma itsindwa na Zamalek. Iyi kipe muri iyi mikino y’Afurika  yegukanye umwanya wa kabiri muri 2021 ndetse n’umwanya wa gatatu muri 2017.

Ikipe ya Petro de Luanda  yageze ku mukino wa nyuma inshuro 7 ibasha kwegukana igikombe inshuro 2  (2006 na 2015) naho izindi 5 itsindirwa ku mukino wa nyuma (1994, 2000, 2007, 2009 na 2012). Iyi kipe yasoreje ku mwanya wa 4 inshuro 3 (2004,2011 na 2021).

Foto: Shema Innocent

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA