Taliki 14 Ukuboza 2022 ni bwo ubuyobozi bwa “Basketball Africa League (BAL)” bwatangaje gahunda y’imikino ya nyuma ya BAL 2023 izaba ibaye ku nshuro ya 3. Iyi mikino izatangira taliki 11 Werurwe 2023 isozwe taliki 27 Gicurasi 2023 ikaba izakinwa mu byiciro bitatu.

Biteganyijwe ko taliki 11 kugeza 21 Werurwe 2023 hazaba imikino y’ijonjora mu itsinda A  “Sahara Conference”, imikino izabera muri Dakar Arena muri Senegal.

Nyuma taliki 26 Mata kugeza 06 Gicurasi 2023 hazaba imikino yo mu itsinda B “Nile Conference”, imikino izabera muri Hassan Mostafa Indoor Sports Complex i Cairo mu Misiri.

Amakipe 4 ya mbere muri buri tsinda azakomeza mu cyiciro cya nyuma “Playoffs & Finals” aho imikino izabera mu Rwanda muri  BK Arena kuva taliki 21 kugeza 27 Gicurasi 2023.

Amakipe 12 azakina BAL 2023

Nk’uko bisanzwe hari amakipe yo mu bihugu 6 atarakinnye imikino y’amajonjora. Aya ni Petro de Luanda (Angola), US Monastir (Tunisia), Al Ahly (Misiri), REG BBC (Rwanda), AS Douanes (Senegal) na Kwara Falcons (Nigeria).

Nyuma y’imikino y’amajonjora yabaye mu Kwakira n’Ugushyingo 2022 hari andi 6 yabonye itike ari yo ABC Fighters (Cote d’Ivoire), SLAC (Guinea), Stade Malien (Mali), Ferroviário da Beira (Mozambique), Cape Town Tigers (South Africa) na City Oilers BBC (Uganda).

Muri aya makipe 12 agiye gukina imikino ya nyuma ya BAL 2023,  amakipe 5 ni inshuro ya mbere agiye kwitabira aya ni Al Ahly BBC (Misiri), Kwara Falcons (Nigeria), ABC Fighters (Cote d’Ivoire), Stade Malien (Mali) na City Oilers BBC (Uganda).

Muri Mutarama 2023 ni bwo aya makipe azashyirwa mu matsinda kugira ngo ahatane bityo haboneke amakipe  8 azakina imikino ya nyuma.

Perezida wa BAL, Amadou Gallo Fall yatangaje ko imikino iheruka muri 2022  yagenze neza aho muri iyi Mijyi itatu (Dakar, Cairo na Kigali) abakunzi ba Basketball babashije kwirebera imikino inogeye ijisho.Yakomeje avuga ko na BAL 2023 bizeye ko imikino izagenda neza.

Perezida w’ishyirahamwe ry’umukino wa Basketball muri Afurika “FIBA ​​Africa” akaba na Perezida w’inama y’ubutegetsi ya BAL, Anibal Manave yavuze ko  kongera gusubira muri iyi Mijyi itatu ari uburyo bwo kubaka imbaraga zihoraho mu guteza imbere umukino wa Basketball muri Afurika mu buryo burambye.

Yakomeje avuga ko akurikije uburyo imikino yo gushaka itike y’imikino ya nyuma ya BAL 2023 yari ku rwego rwo hejuru yizeye ko n’iyi mikino ya nyuma izaba ishimishije kandi n’amakipe agiye gukina iri rushanwa bwa mbere azabasha kwitwara neza.

Nk’uko byakozwe mu irushanwa riheruka, muri BAL 2023  buri kipe mu makipe 12 izahabwa umukinnyi ubarizwa mu ishuri ry’umukino wa Basketball “NBA Academy Africa” muri gahunda ya “BAL Elevate” mu rwego rwo gufasha aba bakinnyi bakiri bato kwigaragaza. Ubuyobozi bwa BAL bukaba butangaza ko iyi gahunda yatanze umusaruro kuko bamwe mu bakinnyi bakoreshejwe muri BAL 2022  babonye amakipe muri USA.

Iri rushanwa rifite abaterankunga batandukanye barimo RDB, NIKE, Jordan Brand and Wilson, Hennessy  na  Envol City.

Irushanwa riheruka “BAL 2022” ryegukanwe n’ikipe ya US Monastir yo muri Tunisia itsinze ku mukino wa nyuma ikipe  ya Petro de Luanda yo muri Angola amanota  83 kuri 72. Ikipe ya Zamalek BBC yo mu Misiri yegukanye BAL 2021 ubwo yakinwaga bwa mbere yasoreje ku mwanya wa 3.

Ba uwa mbere mu kumenya amakuru agezweho!!!