Barasaba kaburimbo mu muhanda uhuza Ngororero, Nyabihu na Musanze
Amakuru

Barasaba kaburimbo mu muhanda uhuza Ngororero, Nyabihu na Musanze

Imvaho Nshya

October 17, 2023

Umuhanda Vunga-Musanze, ni ingirakamaro cyane kuko uhuza Uturere tubiri tw’Intara y’Iburengerazuba n’aka Musanze ko mu Ntara y’Amajyaruguru, ukaba worohereza abarema Isoko rya Vunga riri mu masoko akomeye mu Ntara y’Iburengerazuba, n’abagana Ibitaro bya Shyira by’Akarere ka Nyabihu.

Abaturage bavuga ko kuba uyu muhanda udakozwe neza bibangamira abatwara ibinyabiziga n’abanyamaguru, aho n’ibiraro biwugize bigenda bisenyuka bitewe n’uburyo byubakishijwe imbaho n’ibiti.

Nzigira Jean Boscon, umushoferi ukoresha uwo muhanda kenshi, yabwiye Imvaho Nshya kuba utameze neza kubera ibinogo byuzuyemo bituma imodoka zabo zangirika, akaba asaba Umukuru w’Igihugu Paul Kagame kubafasha akawubashyiriramo kaburimbo.

Yagize ati: “Rwose turifuza ko umuhanda Vunga-Musanze washyirwamo kaburimbo kuko umuhanda urimo kaburimbo na ryo ni iterambere. Nk’ubu ntwara abagenzi mbageza i Musanze, ariko bituma nkoresha igihe kinini kubera ko ngenda ndwana n’ibinogo, hakaba ndetse n’ubwo nshobora kuba nakora impanuka kubera ubunyereri… Njye ndisabira Perezida wacu Kagame Paul ko yaduha umuhanda urimo kaburimbo”.

Uyu mushoferi akomeza avuga ko nkuba nta kaburimbo bafite muri ibi bihe by’iterambere ryihuta mu Rwanda, abafite amikoro bo mu Mirenge ya Shyirana na Rugera bahitamo kwigira mu bindi bice by’Igihugu bikomeje umuvuduko mu iterambere.

Ati: “Nk’ubu njye nzi abantu bafite imodoka bo mu Mirenge yacu ya Shyira na Rugera, ariko bahitamo kujya kwiturira za Kigali na Musanze. Tubonye umuhanda wa kaburimbo byo byaba ari iterambere ryaba rije ritugana”.

Mbarushimana Boneventure we avuga ko uyu muhanda uramutse wubatswe neza n’amazi yadendezaga mu muhanda yashiraho kuko haba hari n’imigende ikozwe neza iyayobora.

Yongeyeho ati: “Ikindi n’ibi biraro iyo imvura iguye birariduka, nka kiriya kiraro gihuza Shyira na Rugera kuri ubu imodoka iyo zihageze dukura abagenzi mu modoka. Kubera ko inkuta ziba zitubakishijwe beto mu buryo burambye bigenda bitenguka. Nk’uko Perezida wacu yaduhaye ibitaro hano, numva yaduha n’umuhanda wa kaburimbo”.

Mbarushimana akomeza avuga ko kandi ngo baramutse babonye kaburimbo, byatuma babona n’amatara yo ku muhanda agira uruhare rukomeye mu kwimakaza umutekano.

Umuyobozi w’Akarere ka Nyabihu Antoinette Mukandayisenga, yavuze ko ikibazo kizwi ndetse ubu barimo kukiganiraho n’inzego bireba cyane ko ngo uriya muhanda uri ku rwego rw’Igihugu.

Gusa ntatanga igihe uyu muhanda uzatangira kubakwa. Yagize ati: “Ubu turimo ku biganiraho n’Ikigo cy’Igihugu Gishinzwe Iterambere rya Taransiporo (RTDA) na Minisiteri y’Ibikorwa Remezo (MININFRA), hari gutekerezwa uburyo uyu muhanda wubakwa mu buryo burambye, kandi nizera ko barimo gushaka ingengo y’imari ubundi umuhanda ugatangira kubakwa”.

Abakoresha uyu muhanda cyane bavuga ko nuramuka wubatswe uzabafasha guhahirana hagati y’Uturere tw’Intara y ‘Amajyaruguru n’Intara y’Iburengerazuba, ndetse ngo n’Abanyarwanda baturuka muri izo Ntara bashaka kujya mu Burundi byaborohera ntibazongere kujya babanza kuzenguruka i Kigali.

NGABOYABAHIZI PROTAIS

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA