Barbados yifuza kuzanira u Rwanda ubuhanga mu gutunganya ingufu zisubira
Amakuru

Barbados yifuza kuzanira u Rwanda ubuhanga mu gutunganya ingufu zisubira

NTAWITONDA JEAN CLAUDE

August 8, 2023

Minisitiri ushinzwe Ingufu muri Leta ya Barbados Sen. Lisa Cummins yifuza ko u Rwanda n’igihugu cye byafatanya gushyiraho politiki zigamije guhererekanya ubuhanga mu gutunganya no gukwirakwiza  ingufu zisubira hagati ya Bridgetown na Kigali. 

Ni mu gihe ibihugu byombi bikomeje gushaka uburyo bunyuranye bwo kurushaho kunoza no gushimangira umubano ushingiye ku ishoramari no ku guhererekanya umuco. 

Yavuze ko ibihugu bikiri mu nzira y’amajyambere byari mu kamenyero ko gukoresha umutungo kamere, ariko byabaye ngombwa ko bitangira guhindura icyerekezo cy’iterambere.

Yabigarutseho ubwo yagezaga ijambo ku bitabiriye umuhango wo kwakira itsinda ry’ubucuruzi ryaturutse mu Rwanda wabaye mu cyumweru gishize.

Minisitiri  Sen. Cummins yasabye abaturage ba Barbados gufatirana amahirwe ari mu mikoranire na bagenzi babo bo mu Rwanda. 

Ati: “Si ubwa mbere duhuye. Takoranye inama z’ubucuruzi n’ishoramari na mbere hose. Twabonye igisobanuro cy’amasoko yo mu mahanga n’icyo abafatanyabikorwa bacu bakora. Tagize uruhare mu bufatanye mpuzamahanga n’ubutwererane bugamije iterambere. 

Twashyizeho imikoranire mu bucuruzi ishingiye ku mategeko, dufite gahunda z’ishoramari zamaze gutegurwa. Dufite ubufatanye, umubano n’ubushuti byamaze kubakwa, none se igikurikiyeho ni ikihe?

Icyo nsaba buri wese uyu munsi ni ugufata ibi nk’amahirwe afatika yo kwinjira mu mahirwe asobanutse y’ubucuruzi hagati y’ibihugu byacu byombi.”

Aha ni na ho Minisitiri  Sen. Cummins, yahereye asaba ko mu gihe u Rwanda na Barbados byatangiye kwimakaza ubutwererane bushingiye ku ishoramari n’umuco hakwiriye kurebwa uko ibihugu byanafatanya mu kubyaza umusaruro ingufu zituruka ku mirasire y’izuba (photovoltaic).

Minisitiri ushinzwe Ingufu muri Leta ya Barbados Sen. Lisa Cummins

Yavuze ko icyo ari cyo cyifuzo cye kubona ibigo by’ishoramari byo muri Barbados bitangiza inganda zikusanya amashanyarazi akomoka ku mirasire y’izuba mu Rwanda nka bumwe mu buryo bwo kwagura ubutwererane mu rwego rw’ingufu ku mugabane w’Afurika.

Sen. Cummins yagize ati: “Barbados ni Igihugu cya kabiri ku Isi mu bijyanye no gukwirakwiza amashanyarazi aturuka ku mirasire y’izuba (PV/photovoltaic energy)… Ibyo boduha amahirwe yo gukorana n’ibindi bihugu bikiri mu nzira y’amajyambere nk’u Rwanda muri ibyo nita ubutwererane bushinguye ku ngufu zisubira.”

Yakomeje agira ati: “Ibyo bisobanuye ko Barbados ifite amahirwe yo gukorana namwe mu Rwanda ngo tubazanire ubuhanga dufite, ubumenyi n’ubucurabwenge mu birebana no gukoresha umutungo kamere wacu maze tugafasha umugabane w’Afurika mu gukoresha ingufu zisubira duhereye ku nshuti zacu mu Rwanda.”

Yanavuze kandi ko abaturage b’ibihugu byombi bakeneye kuba izingiro ry’umubano ukomeje kwaguka, agira ati: “abaturage bakwiriye guhora ku isonga.” 

Minisitiri Sen. Cummins yanasabye ko Umuryango w’Ibihugu bya Karayibe (CARICOM) wakwihutisha gahunda zo gusinyana amasezerano menshi y’ubufatanye n’u Rwanda kimwe b’ibindi bihugu by’Afurika y’Iburasirazuba. 

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA