Basketball: Amakipe 12 yakomeje mu cyiciro cya nyuma mu gushaka itike y’igikombe cy’Isi

Basketball: Amakipe 12 yakomeje mu cyiciro cya nyuma mu gushaka itike y’igikombe cy’Isi

Imvaho Nshya

July 5, 2022

Rwanda 63-73 South Sudan

Cameroun 52-59 Rwanda

Rwanda 66-76 Tunisia

Ikipe y’u Rwanda mu  mukino wa Basketball nta bwo yashoboye kuza mu makipe 12 yakomeje mu cyiciro cya nyuma cy’imikino yo gushaka itike  y’igikombe cy’Isi mu bagabo “2023 FIBA Basketball World Cup, African Qualification”.

Mu Gushyingo 2021 ni bwo hatangiye imikino yo gushaka amakipe 5 azahagararira umugabane w’Afurika mu gikombe cy’Isi “FIBA Basketball World Cup 2023”.

Amakipe 16 yashyizwe mu matsinda 4 aho itsinda A ryari rigizwe na Cap Vert, Nigeria, Uganda na Mali. Itsinda B ryari rigizwe na Cameroun, u Rwanda,Tunisia na South Sudan. Itsinda C ryari rigizwe na Cote d’Ivoire, Angola, Guinea na Central African Republic naho itsinda D rigizwe na Misiri, RDC, Senegal na Kenya.

Nyuma y’imikino ibanza , taliki 01 kugeza 03 Nyakanga 2022 hakinwe imikino yo kwishyura mu matsinda yose kugira ngo hamenyekane amakipe akomeza mu cyiciro cya nyuma cyo gushaka itike.

Imikino yo mu itsinda A na B yabereye mu Rwanda muri BK Arena.

Mu itsinda A, ikipe ya Mali yari yasoje imikino ibanza iri ku mwanya wa kabiri yatewe mpaga imikino ibiri ihita ikurwa mu irushanwa. Ibi byatumye haba imikino 3 gusa.

Mu mikino yabaye, ikipe ya Cap Vert yatsinze Nigeria amanota 79 kuri 70 inatsinda Uganda amanota 87 kuri 78. Ikipe ya Nigeria yatsinze Uganda amanota 91 kuri 72.

Aha amakipe 3, Cap Vert, Nigeria na Uganda yahise abona itike yo kuzakina imikino y’icyiciro cya nyuma cyo gushaka itike.

Mu itsinda B, ikipe y’u Rwanda nyuma yo gutsindwa imikino yose ibanza  muri iyi mikino yo kwishyura yatsinze umukino umwe  wa Cameroun ku manota 59 kuri 52  itsindwa na South Sudan amanota 73 kuri 63 inatsindwa na Tunisia amanota 76 kuri 66.

Ubwo ikipe y’u Rwanda yakinaga na Cameroun

Mu yindi mikino yabaye muri iri tsinda B, Tunisia yatsinze Cameroun amanota 65 kuri 54. Ikipe ya South Sudan nyuma yo gutsinda u Rwanda yatsinze Tunisia amanota 75 kuri 61 inatsinda Cameroun amanota 67 kuri 55.

Ikipe ya South Sudan yasoje imikino yose 6 idatsinzwe n’amanota 12 ikurikirwa  na Tunisia n’amanota 10 naho ku mwanya wa 3 haza Cameroun n’amanota 7 yanganyije n’ikipe y’u Rwanda yasoreje ku mwanya wa nyuma wa 4.

Ikipe ya South Sudan, Tunisia na Cameroun ni zo zahise zikomeza mu cyiciro cya nyuma cyo gushaka itike y’igikombe cy’Isi.

Uko imikino yagenze mu yandi matsinda

Mu itsinda C, imikino yo kwishyura yabereye i Abidjan muri Cote d’Ivoire aho ikipe ya Cote d’Ivoire yitwaye neza itsinda Angola amanota 75 kuri 73, itsinda  Central African Republic amanota 73 kuri 63 inatsinda Guinea amanota 65 kuri 56.

Mu mikino yindi yabaye,  Central African Republic  yatsinze Guinea amanota 61 kuri 56,  Angola itsinda Guinea amanota 85 kuri 65  inatsinda Central African Republic amanota 76 kuri 60.

Ikipe ya Cote d’Ivoire yazamutse iyoboye itsinda n’amanota 12, ikurikiwe na Angola n’amanota 10 naho ku mwaya wa 3 haza Guinea n’amanota 7, ikipe ya Central African Republic isoreza ku mwanya wa nyuma n’amanota 7.

Mu itsinda D, imikino yo kwishyura yabereye  Alexandria mu Misiri, ikipe y’igihugu ya Misiri yitwaye neza itsinda imikino yose aho  yatsinze  RDC  amanota 80 kuri 52, itsinda Senegal amanota 76 kuri 43 inatsinda Kenya amanota 72 kuri 39.

Mu yindi mikino yabaye, RDC yateye mpaga ikipe ya Kenya (20-0), RDC yatsinze kandi Senegal amanota 72 kuri 60 naho  Senegal itsinda Kenya amanota 86 kuri 54.

Ikipe ya Misiri yazamutse iyoboye itsinda n’amanota 11 ikurikiwe na RDC n’amanota 10, Senegal ku mwanya wa 3 n’amanota 9 naho Kenya isoreza ku mwanya wa nyuma n’amanota 4.

Nyuma y’iyi mikino yo mu matsinda, amakipe 12 yakomeje na yo yashyizwe mu matsinda abiri. Itsinda E rigizwe na Cote d’Ivoire, Angola, Cap Vert, Guinea, Nigeria na Uganda.

Itsinda F ryo  rigizwe n’ikipe ya  South Sudan, Misiri, Tunisia, RDC, Senegal na Cameroun.

Gahunda y’imikino y’icyiciro cya nyuma

Mu itsinda E, amakipe   yari mu tsinda A  ari kumwe n’ayari mu itsinda C. Amakipe azahura hagati yayo gusa nta kipe izahura n’iyo zari mu itsinda rimwe hanyuma habarwe amanota .

Ibi ni ko bizagenda mu itsinda F ririmo amakipe yo mu itsinda B na D. Imikino ibanza izaba taliki 26 kugeza 27 Kanama 2022 naho iyo kwishyura ibe taliki 24 kugeza 26 Gashyantare 2023.

Muri buri tsinda amakipe 2 ya mbere azabona itike hiyongereho n’ikipe imwe ya gatatu mu matsinda yombi yitwaye neza abe amakipe 5 azahagararire Afurika mu mikino ya nyuma y’igikombe cy’Isi “FIBA Basketball World Cup 2023” izabera muri Indonesia, Japan na Philippines taliki 25 Kanama kugeza 10 Nzeri 2023 aho izitabirwa n’amakipe 32.

Foto: Shema Innocent

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA