Taliki 13-01-2023

REG BBC-Orion BBC (KEPLER-19h00)

Patriots BBC-Kigali Titans (KEPLER-21h00)

Taliki 14-01-2023

APR BBC-IPRC Musanze (KEPLER-13h00)

Tigers BBC-IPRC Huye (KEPLER-15h00)

Taliki 15-01-2023

REG BBC-IPRC Musanze (STECOL-11h00)

APR BBC-IPRC Huye (STECOL-13h00)

Espoir BBC-Orion BBC (STECOL-15h00)

Kuri uyu wa Gatanu taliki 13 Mutarama 2023 ni bwo hatangira umwaka w’imikino muri Basketball ahateganyijwe imikino ibiri mu cyiciro cy’abagabo.

Mu mikino iteganyijwe, ikipe ya REG BBC ifite igikombe giheruka irakina na Orion BBC yazamutse mu cyiciro cya mbere uyu mwaka . Uyu mukino uraba saa moya (19h00).

Undi mukino urahuza ikipe ya Patriots BBC yasoreje ku mwanya wa kabiri  na Kigali Titants BBC yazamutse mu cyiciro cya mbere uyu mwaka nyuma yo kwegukana  shampiyona y’icyiciro cya kabiri. Uyu mukino uratangira saa tatu (21h00).

Iyi mikino yombi irabera ku kibuga cya KEPLER i Kinyinya mu Karere ka Gasabo.

Imikino ya shampiyona izakomeza  kuri uyu wa Gatandatu taliki 14 Mutarama 2023 aho ikipe ya APR BBC izakira IPRC Musanze (13h00) naho Tigers BB yakire IPRC Huye (15h00). Iyi mikino na yo izabera muri KEPLER.

Imikino ya shampiyona izaba kandi taliki 15 Mutarama 2023 aho  ikipe ya REG BBC izakira IPRC Musanze (11h00), APR BBC yakire IPRC Huye (13h00) naho Espoir BBC yakire Orion BBC (15h00).Iyi mikino yose izabera muri  STECOL mu cyanya cyahariwe inganda i Masoro.

Umujyanama mu bya Tekinike muri FERWABA, Habimana Mugwaneza Claudette yatangaje ko iyi shampiyona biteze ko izagenda neza ndetse na gahunda y’imikino bateguye ikaba itazahindagurika cyane nk’uko byagenze umwaka ushize aho byatewe ahanini n’ikibazo cy’ibibuga.

Yakomeje avuga ko nyuma yo gutangira shampiyona mu cyiciro cya mbere mu bagabo  biteganyijwe ko  taliki 20 Mutarama 2023 hazatangira shampiyona y’icyiciro cya kabiri mu bagabo ndetse shampiyona y’icyiciro cya mbere mu bagore.

Shampiyona y’icyiciro cya mbere mu bagabo yitabiriwe n’amakipe 12 ari yo REG BBC, Patriots BBC, APR BBC, Tigers BBC, Espoir BBC, IPRC Kigali BBC, UGB, Shoot 4 Stars BBC, IPRC Huye BBC, IPRC Musanze, Kigali  Titans BBC na Orion BBC.

Mu cyiciro cya mbere mu bagore hazitabira amakipe 8 ari yo REG BBC, APR BBC, IPRC Huye, The Hoops Rwanda, GS Marie Reine, UR Busogo, UR Kigali na GS Gahini.

Imikino ya shampiyona izabera ku bibuga bitadukanye birimo ikibuga cya STECOL (Masoro), KEPLER (Kinyinya), UR Kigali (kizakinirwaho mu cyiciro cya kabiri), IPRC Kigali, LDK ndetse na Kimironko ahazatangira gukinirwa muri Gashyantare 2023. Hari kandi n’imikino imwe n’imwe izabera muri BK Arena.

Umunyamabanga Nshingwabikorwa wa FERWABA, Jabo Landry yatangaje ko umuterankunga kugeza ubu wa shampiyona ari Bralirwa binyuze mu kinyobwa cyayo “Cheetan Energy Drink” ariko barimo gushakisha n’abandi baterankunga.

Ba uwa mbere mu kumenya amakuru agezweho!!!