Taliki 03 kugeza 04 Ukuboza 2022  i  Cairo mu Misiri  habereye imikino y’Afurika mu mukino wa Basketball bakina ari batatu kuri batatu mu bagabo n’abagore  “FIBA 3×3 Africa Cup 2022”.

Muri iri rushanwa, ikipe y’u Rwanda mu bagabo  yitwaye neza yegukana umwanya wa 3 mu gihe ikipe ya Madagascar ari yo yegukanye igikombe.

Ikipe y’ u Rwanda yari igizwe na  Turatsinze Olivier (IPRC-Kigali), Ngabonziza Patrick (APR BBC), Hagumintwari  Steven  (Patriots BBC) na Nshobozwabyosenumukiza Jean Jacques Wilson (APR BBC). Yari mu itsinda A hamwe na Madagascar, Misiri na Botswana naho itsinda B ryari rigizwe na Tunizia, RDC na Maroc.

Mu mikino y’amajonjora, ikipe y’u Rwanda yatsinze Botswana amanota 15 kuri 7, itsinda Misiri amanota 21 kuri 19 inatsinda Madagascar amanota 21 kuri 19.

Ikipe y’u Rwanda (A) na Tunisia (B) zahise zikomeza muri ½ naho  Madagascar, Misiri (A), Maroc na RDC (B) zikina imikino ya ¼ zishakamo amakipe  abiri agomba gukomeza muri ½ .

Ikipe ya Madagascar yatsinze RDC amanota 18 kuri 11 naho Misiri itsinda Maroc amanota 21 kuri 18.

Muri ½ cy’irangiza, ikipe y’u Rwanda yatsinzwe na Madagascar amanota 21 kuri 14 naho Misiri itsinda Tunisia amanota 21 kuri 18.

Mu guhatanira umwanya wa 3, ikipe y’u Rwanda yatsinze  Tunisia amanota 21 kuri 17. Ku mukino wa nyuma ikipe ya Madagascar  yatsinze Misiri  amanota  20 kuri 17. Ikipe ya Misiri akaba ari yo yari yegukanye iri rushanwa muri 2019.

Ikipe y’irushanwa igizwe na Elly Randriamampionona (Madagascar), Mido Taha (Misiri) na Nshobozwabyosenumukiza Jean Jacques Wilson.

Uko amakipe yakurikiranye

Ikipe ya Madagascar yasoreje ku mwanya wa mbere  ikurikirwa na Misiri (2), u Rwanda (3), Tunisia (4), RDC (5), Maroc (6), Botswana (7) na Kenya (8)

Mu cyiciro cy’abagore iyi mikino yari yitabiriwe  n’amakipe 7 aho yashyizwe mu matsinda abiri, itsinda A ryari  rigizwe na Misiri, Tunisia na Madagascar naho itsinda B rigizwe na Kenya, Benin, RDC na Maroc.

Ikipe ya Misiri yegukanye igikombe itsinze ku mukino wa nyuma Madagascar ku manota 21 kuri 11 naho ikipe ya RDC yegukana umwanya wa 3 itsinze Tunisia amanota 19 kuri 13.

Ikipe y’irushanwa yatoranyijwe igizwe na  Nadine Mohamed (Misiri), Rondro Raherimanana (Madagascar) na  Debora Mayimona (RDC).

Uko amakipe yakurikiranye

Misiri yasoreje ku mwanya wa mbere ikurikirwa na Madagascar (2), RDC (3), Tunisia (4), Maroc (5), Kenya (6) na Benin (7).

Ikipe ya Madagascar mu bagabo na Misiri mu bagore nyuma yo kwegukana iri rushanwa  zahise zibona itike yo kuzitabira imikino y’igikombe cy’Isi “FIBA 3×3 World Cup 2023”  izabera i Vienna muri  Austria, taliki 30 Gicurasi kugeza 04 Kamena 2023.

Ikipe ya Misiri mu bagabo na Madagascar mu bagore zabaye  iza kabiri zabonye  amahirwe yo kuzitabira  imikino yo gushaka itike “FIBA 3×3 World Cup 2023 Qualifier” izabera muri Israel.

Ba uwa mbere mu kumenya amakuru agezweho!!!