Umutoza Ngwijuruvugo Richard Patrick ukomoka i Burundi  watoje ikipe ya REG BBC mu Rwanda ndetse na Tigers BBC ubu akaba yari yarasubiye i Burundi hari amakuru avuga ko ashobora kugaruka mu Rwanda ndetse hakaba hari amakipe  agera kuri 3 arimo kuganira nayo.

Ngwijuruvugo yageze mu Rwanda muri 2017 agirwa umutoza wa REG BBC kugeza muri 2018 aho muri 2019 yatoje ikipe ya Tigers BBC. Muri Nyakanga 2021 yasubiye i Burundi   agirwa umutoza w’ikipe y’Urunani BBC.

Ku bijyanye no kugaruka gutoza mu Rwanda, umutoza Ngwijuruvugo  biravugwa ko  hari amakipe 3 ya mbere mu Rwanda amwifuza ndetse akaba  ashobora kuba ari i Kigali  aho ari mu biganiro n’aya makipe  ku buryo mu minsi ya vuba  yakongera kugaragara muri shampiyona y’umukino wa Basketball mu Rwanda.

Ngwijuruvugo  umaze imyaka 13 ari umutoza  yabanje kuba umukinnyi mu makipe atandukanye kuva 2005 kugeza 2009. Atangira gutoza  yatoje ikipe ya Les Amis mu cyiciro cya kabiri nyuma akomereza  mu makipe atandukanye arimo  Urunani BBC, Berco Stars  i Burundi, REG BBC na Tigers mu Rwanda.

Muri uyu mwuga w’ubutoza, Ngwijuruvugo yegukanye ibikombe bitandukanye yaba mu makipe y’i Burundi  no mu Rwanda.

Ba uwa mbere mu kumenya amakuru agezweho!!!