Bizihije Kwibohora 29 bishimira umubano w’u Rwanda na Uganda
Amakuru

Bizihije Kwibohora 29 bishimira umubano w’u Rwanda na Uganda

NTAWITONDA JEAN CLAUDE

July 11, 2023

Abanyarwanda batuye muri Uganda n’inshuti zabo bizihije umunsi wo Kwibohora kw’Abanyarwanda maze abayobozi muri Uganda bishimira uburyo Igihugu cyabo gifitanye umubano mwiza n’u Rwanda.

Ni umuhango witabiriwe n’Abanyarwanda baba muri Uganda, abayobozi muri Ambasade y’u Rwanda muri Uganda n’abari bahagarariye Leta ya Uganda ndetse n’abandi bahagarariye ibihugu byabo muri Uganda bahuriye hamwe bishimira imyaka 29 yo kwibohora k’u Rwanda.

Ambasaderi w’u Rwanda muri Uganda Joseph Rutabana ashimangira ko umubano w’ibihugu byombi uhagaze neza.

Yagize ati: “Umubano wacu ubu ni mwiza cyane, nk’uko byagiye bigaragazwa n’uburyo Abakuru b’Ibihugu bagiye basurana, mu kwezi kwa Mata 2022, Perezida wa Repubulika y’u Rwanda Paul Kagame yasuye Uganda agirana ibiganiro na Perezida Yoweri Kaguta Museveni, aho bunguranye ibitekerezo bitandukanye byerekeye umubano w’ibihugu byombi n’akarere.

Nyuma y’amezi 2 mu kwezi kwa Kamena 2022, Perezida Museveni na we yasuye u Rwanda aho yitabiriye Inama y’Abakuru b’Ibihugu na Guverinoma bo mu Muryango w’Ibihugu bikoresha Icyongereza (Commonwealth).”

Umunyamabanga wa Leta ushinzwe ubucuruzi muri Minisiteri y’Ubucuruzi muri Uganda Harriet Ntabazi, yavuze ko U Rwanda na Uganda ari ibihugu bikorana bya hafi mu cyerekezo cy’iterambere.

Yagize ati: “Mu bijyanye no gukuraho inzitizi z’ubucuruzi zitugiraho ingaruka twese, mu bijyanye no guhangana ku rwego mpuzamahanga, mu bijyanye no gushyiraho amategeko agenga ubucuruzi mu muryango w’ubucuruzi ku rwego rw’Isi twagiye twifatanya n’u Rwanda, twagiye dufatanya na Kenya, Tanzania n’ibindi bihugu kugira ngo ukwihuza kwacu kurusheho gushinga imizi kubera ubumwe twagaragarije hamwe.”

Umubano w’u Rwanda na Uganda ufite amateka maremare ahera mu bihe bya mbere y’Ubukoloni, igihe bwabaga na nyuma y’aho. Amateka agaragaza ko Umwami Mutara III Rudahigwa yakundaga gusura mugenzi we Kabaka Edward Muteesa, Umwami w’Ubuganda mu myaka yo mu 1950.

Igihe Umwami Kigeli wa V Ndahindurwa yimurwaga nyuma y’aho Umuryango w’Abibumbye wayoboraga amatora ya Kamarampaka, bivugwa ko yahungiye mu Ngoro y’Umwami Muteesa mu Bwami bw’Ubuganda.

Mu myaka myinsi yashize, umubano w’ibihugu byombi wari ukomeye cyane, ndetse byagiye bifatanya mu iterambere rya Politiki n’imibereho myiza y’abaturage, kugeza mu mwaka wa 2017 ubwo uwo mubano watokozwaga n’abatifuriza u Rwanda ineza bagiye gukorera muri icyo gihugu mu buryo bw’ibanga.

Muri Werurwe 2022, yahuye na Gen. Muhoozi Kainerugaba, Umuhungu wa Perezida wa Yoweri Kaguta Museveni,wagize uruhare rukomeye ku kuzahura umubano w’ibihugu byombi binyuze mu gukuraho ibyari imbogamizi byose.

Ibirori byo kwizihiza Isabukuru ya 29 yo Kwibohora kw’Abanyarwanda byabereye muri Uganda, byitabiriwe kandi n’inshuti z’u Rwanda ziri muri iki gihugu cya Uganda.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA