BNR yatanze icyizere ko ibiciro bizamanuka umwaka utaha
Amakuru

BNR yatanze icyizere ko ibiciro bizamanuka umwaka utaha

Imvaho Nshya

September 20, 2023

Muri uku kwezi kwa Nzeri hagaragaye itumbagira ry’ibiciro binyuranye cyane cyane ibirayi, byageze ku mafaranga y’u Rwanda 1500 ku kilo mu Mujyi wa Kigali, ndetse mu masoko agezweho hari n’aho cyageze ku mafaranga 2000.

Banki Nkuru y’u Rwanda (BNR) yatanze icyizere cy’uko mu mwaka utaha wa 2024, ibiciro by’ibiribwa bizagabanuka hagendewe ku buryo ubukungu bw’Igihugu bukomeje kwiyongera.

Guverineri wa BNR John Rwangombwa, yavuze ko nubwo ibiciro byatumbagiye, hakurikijwe uko imibare imeze, uko ubukungu, n’ubukerarugendo biziyongera ibiciro bishobora kugabanyuka.

Yabigarutseho kuri uyu wa Gatatu tariki 20 Nzeri, ubwo yagaragarizaga inzego zitandukanye mu by’ubukungu uko urwego rw’imari na Politiki y’ifaranga byari bihagaze mu mezi 6 ashize ya 2023.

Ati: “Uko ubukungu buziyongera tukohereza byinshi mu mahanga, dufite icyizere ko bizagabanuka kandi hano twaberetse ko twabonye amadovize ahagije mu bukerarugendo, umwaka utaha bishobora kuba byiza.”

Ku rwego rw’Isi biteganyijwe ko ibiciro ku isoko bizamanuka bikagera kuri 6.8% muri uyu mwaka, ndetse na 5.2% mu mwaka utaha, bikazaba bivuye ku 8.7% byariho mu mwaka ushize.

Mu gihe ibitumizwa mu mahanga byazamutseho 18% mu kwezi kwa Werurwe k’uyu mwaka, BNR yagaragaje ko ikigero cyo guta agaciro k’ifaranga cyavuye kuri 6.5% kigera kuri 12%.

Itumbagira ry’ibiciro rivugwa mu mpamvu zatumye habaho gutakaza agaciro k’ifaranga ry’u Rwanda. Mu myaka 20 ishize, ni bwo bwa mbere habayeho gutakaza agaciro k’ifaranga kurenza 10%.

Rwangombwa yagaragaje ko izamuka ry’ibiribwa ryatewe no kuba umusaruro w’ubuhinzi warabaye muke bitewe n’ihindagurika ry’ibihe.

Ni mu gihe ifaranga ryatakaje agaciro bitewe no kuzamuka kw’ibiciro mpuzamahanga kandi u Rwanda rufite ingano nyinshi y’ibitumizwa mu mahanga,n’ibikenerwa mw’ishoramari.

Yavuze ko kuba ibitumizwa mu mahanga ari byinshi kurusha ibyoherezwa hanze na byo biri mu mpamvu nyamukuru zatumye ifaranga rita agaciro.

Yagize ati: “Ibisanzwe kw’isoko iyo ibishakwa biruta ibihari hakabaho kuzamuka kw’ibiciro kunini bituma icyuho kizamukaho 23%”.

KAMALIZA AGNES

TANGA IGITECYEREZO

  • Kenny
    September 20, 2023 at 11:04 pm Musubize

    Akaba aratibeshye faaaa ; nzaba ndeba

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA