BRD yanyuzwe n’abaguze impapuro mpeshamwenda zayo za miliyari 30 Frw
Amakuru

BRD yanyuzwe n’abaguze impapuro mpeshamwenda zayo za miliyari 30 Frw

Imvaho Nshya

October 27, 2023

Banki y’u Rwanda y’Iterambere (BRD) yatangaje ko impapuro mpeshamwenda yashyize ku Isoko yishimira ko Abanyarwanda, inshuti z’u Rwanda n’abandi bashoyemo amafaranga yabo.

Byagarutsweho n’Umuyobozi Mukuru wa BRD Kampeta Sayinzoga, mu kiganiro n’abanyamakuru ku mugoroba wo ku wa Kabiri tariki 26 Ukwakira 2023 ku cyicaro gikuru cya BRD mu Mujyi wa Kigali.

Yavuze ko nka BRD bishimiye amafaranga batari biteze nyuma yo kugurisha impapuro mpeshamwenda ku isoko ry’imari n’imigabane.

Yagize ati: “Twashoboye kubona amafaranga tutari twiteze kandi aranarenga. Icyo twashakaga ni za miliyari 30 ariko ayo mafaranga twarayarengeje ku gipimo cya 110%”.

Ubuyobozi bwa BRD bushimangira ko iyi banki ari imwe mu mabanki mu gihugu ifite inshingano y’iterambere ry’Abanyarwanda mbere y’ibindi byose.

Impamvu impapuro zashyizwe ku isoko zidasanzwe, ni uko BRD igirana igihango n’Abanyarwanda, aho ikavuga ngo nibayihe amafaranga ari zo miliyari 30.

BRD na yo isezeranya inyungu ya 12.85% buri mwaka.

Muri icyo gihe hari uburyo BRD izakoresha amafaranga kandi ubwo buryo bugateza imbere Abanyarwanda.

Amafaranga azakoreshwa mu bacunga ibidukikije, guteza imbere imishinga igizwe n’abagore, ikindi ni uguteza imbere inguzanyo ku Banyarwanda bakeneye amacumbi aciriritse.

Kampeta, Umuyobozi Mukuru wa BRD, Akomeza agira ati “Igikorwa gikurikira ni uko impapuro zijya ku isoko ry’Imari n’Imigabane (RSE), abatashoboye kugura izo mpapuro cyangwa abashoboye kuzigura bakifuza kuzigurisha, bashobora kujya kuri iryo soko bakaba bashobora kugura izo mpapuro cyangwa abasanzwe bazifite bazibonye ku isoko rya mbere bakaba bazigurisha”.

Igice cya mbere cyarangiye neza kubera ko ngo amafaranga BRD yifuzaga muri izo mpapuro, yabonetse.

Ikiciro gikomeje, ni uguhererekanya hagati y’abashaka kuzigurisha n’abashaka kuzigura.

Kamanzi Fernand, Umuyobozi ushinzwe kureberera ikigo n’aho cyakura ubushobozi muri BRD, ashimangira ko igishimishije ari uko imibare y’abantu bashoye imari muri izi mpapuro mpeshamwenda, bashoboye kubona ibigo 129.

Abantu 100 ku giti cyabo bamaze gutanga Miliyari imwe na yo yabonetse mu gihe gitoya kingana n’ibyumweru bibiri.

Ku rundi ruhande, ubutaha BRD ishaka gutangira kuganiriza n’Abanyarwanda batuye mu mahanga bityo bakitabira kugura impapuro mpeshamwenda.

Ati: “Twabonye abantu 9 bamaze gutanga miliyoni 71 z’amafaranga y’u Rwanda, igishimije ni uko babimenye mu gihe gitoya bakabyitabira”.

Rwabukumba Pierre Célestin, avuga ko BRD yasabye kuzashyira ku isoko impapuro mpeshamwenda zifite agaciro ka miliyari 150 Frw mu gihe cy’imyaka Itanu.

Mu kubisaba ntabwo ayo mafaranga yifuza kuyafatira rimwe ahubwo izagenda ibikora mu byiciro bitandukanye. Ati: “Mu cyiciro cya mbere basabye ejobundi ari na cyo abashoramari bitabiriye ku buryo bushimishije, ni miliyari 30 Frw”.

Avuga ko miliyari 30 ari zo zabonye ba nyirazo ubu bakaba banditse mu bitabo. Ati: “Ubu ziratangira kugurishwa ku isoko kugira ngo noneho abazifuza bazigure banazigurishe kuri bagenzi babo mu gihe hagitegerejwe icyiciro cya kabiri igihe kizazira.

Ubu uko bihagaze izi mpapuro mpeshamwenda ziratangira guhinduranya mu ntoki hagati y’abashoramari batari basanzwemo. Abasanzwemo uyu munsi zibanditseho, ni izabo. Ziri mu byangombwa by’ubutaka”.

Rwabukumba asobanura ko kugira ngo umuntu ashobore kwitabira isoko ry’imari n’imigabane, bisaba kuba afite konti y’ishoramari, yaba atayifite akayifunguzayo.

KAYITARE JEAN PAUL

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA