Burera: Batuye mu Mudugudu w’Icyitegererezo utagira amashanyarazi
Amakuru

Burera: Batuye mu Mudugudu w’Icyitegererezo utagira amashanyarazi

Imvaho Nshya

October 23, 2023

Abaturage bakuwe mu kirwa cya Bushongo cyo mu kiyaga cya Burera, bagatuzwa mu Mudugudu wa Birwa, Akagari ka Rurembo, Umurenge wa Rugarama, Akarere ka Burera bavuga ko bijejwe umuriro w’amashanyarazi kuva bahatuzwa mu 2017, imyaka ikaba ibaye 6 nta n’urutsinga rwari rwerekezayo.

Aba baturage bavuga ko ngo binjiye muri uriya Mudugudu buri nzu irimo imirasire y’izuba ariko ngo ntabwo yamaze nibura umwaka umwe nk’uko Bihibindi Adrien yabibwiye Imvaho Nshya.

Yagize ati: “Tugera hano baduhaye imirasire y’izuba nk’amashanyarazi batwizeza ko bazaduha umuriro w’amashanyarazi ariko ngaho imyaka igiye kuzura 6, imirasire ntabwo twayicanye igihe kirenze umwaka; ikindi kandi nta n’ubwo washyiraho radiyo ngo izavuge twifuza rero nk’uko bahora batwizeza amashanyarazi ko bayaduha hano natwe tugakomeza kwiteza imbere”.

Kuba uyu muriro w’amashanyarazi aba baturage bijejwe atabageraho ngo bibagiraho ingaruka nyinshi harimo umutekano muke kuko ibisambo byitwikira ijoro bikiba amatungo yabo ndetse no gutobora inzu, ikindi bidindiza iterambere ryabo kuko ngo babyaza umusaruro ingufu z’amashanyarazi

Rukundo Erasme yagize ati: “Nta Mudugudu w’Icyitegererezo utagira amashanyarazi, turamutse tubonye amashanyarazi hano ibisambo ntibyabona urwaho ngo bitwibire amatungo bidutegere no mu nzira, nk’ubu hano inka barazimaze ndetse n’ejobundi batwaye inka y’umuturage turaheba, uwaduha amashanyarazi twajya dusudira inzugi n’ibindi, twatunga za televiziyo, abana bacu bagasubira mu masomo, tukazana hano za mudasobwa natwe tukagira serivise z’irembo”.

Abatuye mu Mudugudu wa Birwa bafite inyota y’iterambere ariko babura umuriro w’amashanyarazi

Uyu muturage yongeraho ko ngo babona amashanyarazi mu yindi misozi kuri bo ngo baba bumva bari mu kindi gihugu

Yagize ati: “Na n’ubu tumeze nk’abakibereye mu birwa kuko uko twabonaga amatara turi mu kiyaga n’ubu ni ko tuyabona mu bilometero byinshi, rwose nibadukize ikizima nk’uko badukijije imibu n’imbeho yo mu kiyaga cya Burera, aho malariya yari yaratuzengereje”.

Umuyobozi w’Akarere ka Burera by’agateganyo Nshimiyimana Jean Baptiste avuga ko ikibazo cyo kuba abatujwe muri uriya mudugudu bakeneye umuriro w’amashanyarazi kizwi kandi ngo kirimo kuvugutirwa umuti.

Yagize ati: “Kuba abatujwe mu mudugudu w’ikitegerezo wa Birwa, ariko ingengo y’imari uyu mwaka irahari kuko hafi aho turimo turashinga amapoto na  bo amashanyarazi azabageraho twari twabanje kubaha imirasire y’amashanyarazi ariko duteganya ko bazahabwa umuriro w’amashanyarazi bitarenze mu kwezi kwa 12/2023, ndabizeza ko bigenze neza bitarenga”.

Abaturage basabwa gukomeza kwita no ku mirasire bahawe ngo yaba yaragize ibibazo bakayisana mu gihe bategereje ko bahabwa umuriro w’amashanyarazi.

Umuriro w’imirasire y’izuba ntiwarengeje umwaka 1 gusa

NGABOYABAHIZI PROTAIS

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA