Burera: Umuhanda Base-Kirambo- Butaro-Cyanika ugiye gushyirwamo kaburimbo
Amakuru

Burera: Umuhanda Base-Kirambo- Butaro-Cyanika ugiye gushyirwamo kaburimbo

Imvaho Nshya

October 22, 2023

Mu gihe abaturiye umuhanda Base-Kirambo-Butaro-Cyanika banyotewe no kuwubonamo kaburimbo kugira ngo bakomeze iterambere kandi boroherezwe ingendo, amakuru mashya ni uko bashonje bahishiwe kuko uyu mwaka uzarangira imirimo yaratangiye.

Uyu muhanda w’ibilometero 63 witezweho kuzuzura utwaye miliyari 80 z’amafaranga y’u Rwanda, ukaba unyura ku Bitaro Bikuru bya Butaro bivura Kanseri ndetse no kuri Kaminuza Mpuzamahanga y’Ubuvuzi n’Ubuzima kuri bose (UGHE).

Ubuyobozi bw’Akarere ka Burera buvuga ko nta gihindutse watangira gushyirwamo kaburimbo bitarenze mu mpera z’uyu mwaka wa 2023, kuko ari umuhanda witezweho byinshi mu Iterambere ry’Akarere.

Abaturage bavuga ko mu mwaka wa 2013 Perezida wa Repubulika y’u Rwanda Paul Kagame yasuraga abaturage b’Akarere ka Burera, yabemereye kaburimbo muri uwo muhanda ariko ngo bahora biteguye ko imirimo igiye gutangira.

Musafiri Emmanuel utuye mu Murenge wa Cyeru, yagize ati: “Twifuza ko umuhanda Base-Kirambo-Butaro-Cyanika  wubakwa kuko uramutse wubatse igiciro cy’imodoka cyagabanyuka kuko nk’ubu kugera i Musanze uri kuri moto baguca ibihumbi 17, nyamara umuhanda uramutse umeze neza byatworohera, ndetse n’ibiciro by’imodoka byajya hasi.  Ikindi burya ahageze kaburimbo iterambere rirahagera, kubera umuhanda uzaba ugendwa tuzakora ubucuruzi, bahora bagaragaza ibikorwa byo kuwutangira ariko sinzi aho biherera”.

Uyu muhanda unyura kuri Kaminuza Mpuzamahanga ya UGHE

Abo baturage bemeza kandi ko uwo muhanda uramutse ushyizwemo kaburimbo bava mu icuraburindi kuko hashyirwa amatara yok u muhanda.

Batamuliza Kevine yagize ati: “Turamutse tubonye uyu muhanda nk’uko twawemerewe na Perezida byatuma abakire bajya barekera imodoka zabo hano zikaduha serivisi aho kuzijyana mu mujyi, kuko nabonye abenshi bajya mu mujyi bakurikiye kaburimbo n’amatara. Uyu muhanda ugeze hano twacanirwa kuva kuri Base ukazenguruka ukagera za Cyanika.”

Kuba uyu muhanda Base–Kirambo-Butaro-Cyanika ukenewe n’abantu benshi kandi ukaba wagira akamaro kanini mu iterambere bishimangirwa n’abashoferi bawukoresha.

Bavuga ko uyu muhanda uramutse ukozwe neza urugendo rwagabanyuka kubera ko kugenda bahura n’ibisimu n’amabuye bituma bakererwa mu nzira.

Umwe muri bo yagize ati: “Ubundi iyo umuhanda umeze neza urugendo na rwo rurihuta. Tubonye kaburimbo kugenda byatworohera kandi n’imodoka zacu zajya zigira ibikoresho bikaramba cyane ko burya umuhanda mubi wangiza imodoka, aha nanone imodoka zitwara abagenzi zakwiyongera muri uyu muhanda cyane ko harimo kompanyi imwe na twa minibisi (hiace) tubiri na two ubona ko twashaje”.

Umuyobozi w’Agateganyo w’Akarere ka Burera Nshimiyimana Jean Baptiste, yashimangiye ko uyu muhanda ushobora gutangira kubakwa mu mpera z’uyu mwaka wa 2023.

Yagize ati: “Uriya muhanda twitezemo byinshi mu iterambere, tukaba dufite icyizere ko imirimo yo kuwubaka yatangira mu mpera z’uyu mwaka ukaba uzubakwa na NPD na China Road Corporation kuko kuri ubu barimo kugenda bongeramo ibikoresho  nk’imashini zikora mu mihanda n’ibindi.”

NGABOYABAHIZI PROTAIS

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA