Bwa mbere ibihembo bya TIME 100 bigiye gutangirwa mu Rwanda
Amakuru

Bwa mbere ibihembo bya TIME 100 bigiye gutangirwa mu Rwanda

NTAWITONDA JEAN CLAUDE

June 1, 2023

Ikinyamakuru TIME cyatangaje ko Inama Nyafurika itoranya abantu 100 bahabwa ibihembo by’ubudashyikirwa ku ruhare bagira mu guhindura Isi izabera mu Rwanda mu kwezi k’Ugushyingo 2023, muri Kigali Convention Center.

Ibyo bihembo ngarukamwaka bihabwa abantu bakanyujijeho barimo abayobozi, abahazi n’abanyabugeni, abahanga udushya, ibyamamare, n’abandi bafite ibikorwa bihindura Isi kurusha ibindi mu nzego zinyuranye.

Iyo nama izabera i Kigali yiswe “TIME100 Summit Africa and Impact Award Africa” yitezweho kwitabirwa n’abavuga rikijyana bagize Umuryango Mugari wa TIME100, bitezweho kuganira ku bisubizo by’ingenzi birimo gushakirwa ibibazo byugarije Isi haba ku rwego rw’Akarere na Mpuzamahanga. 

Abo bayobozi bitezweho no kuganira ku ngamba abatuye Isi basabwa gushyira mu ngiro byihutirwa,  mu guharanira kubaka ahazaza harushijeho kuba heza.

Biteganyijwe ko nyuma y’inama, abayobozi mpuzamahanga n’abo mu Karere, abavuga rikijyana, impuguke mu igenamigambi ndetse n’abagize Umuryango Mugari wa TIME bazahurira hamwe mu kwishimana n’abashyizwe ku rutonde kubera itandukaniro bagaragaje mu gutegura ahazaza mu byo bakora n’ah’Isi muri rusange. 

Umuyobozi wa TIME Jessica Sibley, yagize ati: “TIME100 ni umuryango utagira umupaka w’abaharanira impinduka muri buri rwego ndetse bakaba bakomeje guteza imbere Isi. Twishimiye gukomeza kwagura umuryango wacu tukaba tugeze  no mu Rwanda.”

Inama ya TIME100 n’umuhango wo gutanga ibihembo birimo gutegurwa ku bufatanye n’Urwego rushinzwe Iterambere mu Rwanda (RDB) ari na rwo mufatanyabikorwa w’ingenzi mu kwakira ibyo bikorwa. 

Umuyobozi Mukuru wa RDB Clare Akamanzi, yagaragaje uburyo u Rwanda rwiteguye guha ikaze abagize Umuryango Mugari wa TIME bazarushaho kuryoherwa n’urugwiro ndetse n’ibishya byinshi batigeze babona ahandi. 

Yijeje abo bashyitsi ko bazibonera ibyiza by’imijyi ikomeje gutera imbere, imisozi n’amataba biteye amabengeza, ibiyaga n’ibindi byiza nyaburanga byahogoje amahanga. 

Yagize ati: “Mu kwezi k’Ugushyingo twiteguye kwakira abatumirwa bose ba TIME100, aho bazishimira igihe bazamara mu Gihugu ndetse bakazatahana ubunararibonye butandukanye batabonye ahandi ku Isi.”

Gahunda yo kwagurira ibikorwa bya TIME 100 mu Rwanda ni yo ya vuba, ikaba ije ikurikira izindi zabaye mu myaka yashize.

Mu 2022, TIME100 yahembye abayobozi n’ibyamamare barimo icyamamare muri Sinema mpuzamahanga Idris Elba na Sabrina Dhowre Elba, Graça Machel washinze Ikigo Graça Machel Trust, rwiyemezamirimo mu itangazamakuru Jeffrey Katzenberg, umushoramari mu ikoranabuhanga washinze Ikigo WndrCo; n’impirimbanyi mu kubungabunga urusobe rw’ibinyabuzima Farwiza Farhan, ari na we washinze Ikigo HAkA. 

Abandi bahembwe umwaka ushize bazamo umuhanha mu guhanga inyubako David Adjaye, Umunyamabanga wa Leta ushinzwe ikoranabuhanga rigezweho muri Leta Zunze Ubumwe z’Abarabu (UAE) Sarah Al Amiri, n’umugiraneza Tony Elumelu n’ibyamamare batandukanye.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA