Byinshi ku bihembo n’iserukiramuco bya Trace bigiye kubera mu Rwanda
Amakuru

Byinshi ku bihembo n’iserukiramuco bya Trace bigiye kubera mu Rwanda

NTAWITONDA JEAN CLAUDE

June 2, 2023

Hari gutegurwa ibirori byiswe ‘Trace Awards & Festival’ bigiye gutangirwa mu Rwanda ku nshuro ya mbere, bihuriremo ibyamamare bitandukanye ku Isi yose.

Trace Awards and Festival ni ibirori byo gutanga ibihembo bizakomatanywa n’iserukiramuco biri gutegurwa na televiziyo mpuzamahanga yitwa ‘Trace’.

Ibi bikorwa byombi bikazamara iminsi itatu bibera mu Rwanda. Biteganyijwe ko bizitabirwa n’ababarirwa hagati ya 7000 na 10 000 barimo ibyamamare ku migabane itandukanye yose ku Isi.

Byatangarijwe mu kiganiro n’itangazamakuru cyabaye ku wa  1 Kamena 2023, muri BK Arena izatangirwamo ibi bihembo mu Ukwakira uyu mwaka.

Iki kiganiro cyari cyahuriyemo abantu batandukanye mu ruganda rw’imyidagaduro mu Rwanda no hanze barimo abahanzi, abanyamakuru n’abandi.

Cyahuriyemo Kyle John Schofield wari uhagarariye QA Venue Solutions Rwanda ifite mu nshingano BK Arena izaberamo iki gikorwa, Umuyobozi Mukuru w’Ikigo cy’Igihugu gishinzwe guteza imbere Ubukerarugendo bushingiye ku nama (RCB) Janet Karemera, Danny Mucira uhagarariye Trace East Africa ndetse n’Umuyobozi Mukuru wa Trace Group, Olivier Laouchez.

Kyle John Schofield wari uhagarariye QA Venue Solutions Rwanda ifite mu nshingano BK Arena izaberamo iki gikorwa, yashimye Trace Group yatekereje kuzana iki gikorwa mu Rwanda.

Umuyobozi Mukuru w’Ikigo cy’Igihugu gishinzwe guteza imbere Ubukerarugendo bushingiye ku nama (RCB) Janet Karemera yavuze iki gikorwa gihambaye kandi byahoze ari indoto ko cyabera mu Rwanda.

Ati: “Ni igikorwa gihambaye twahoze twifuza ko cyabera mu Rwanda none birabaye. Azaba ari amahirwe meza ku myidagaduro Nyarwanda. Ndashimira Trace kuba yarahisemo u Rwanda. Ndabashimira kuba bagiye gutuma amaso yose y’isi ahangwa u Rwanda.’’

Yavuze ko ari igikorwa kizaha akazi abantu batandukanye barimo aba-Djs, abahanzi , abamurika imideli, n’abandi. Akaba n’amahirwe yo guhuza abahanzi nyarwanda n’abandi bakomeye ku isi yose.

Danny Mucira uhagarariye Trace East Africa yavuze ko iki gikorwa kuba kigiye kubera muri Afurika y’Uburasirazuba by’umwihariko mu Rwanda, ari ikintu gishimishije cyane.

Ibi birori bizabimburirwa n’Iserukiramuco rizamara iminsi ibiri guhera ku wa 19-20 Ukwakira 2023 muri Camp Kigali, mu gihe ibihembo bizatangwa ku wa 21 Ukwakira 2023 muri BK Arena. Iki gikorwa kigiye kuba ku bufatanye na RDB ibicishije muri Visit Rwanda.

Trace Group izaba inizihiza isabukuru y’imyaka 20 ikorera mu bihugu bitandukanye ku Isi.

Umuyobozi Mukuru wa Trace Group, Olivier Laouchez yagaragaje ko kimwe mu bintu byatumye bahitamo u Rwanda ari uko ari Igihugu kiri gutera imbere ndetse kikaba gitangiye kuba igicumbi cy’imikino n’imyidagaduro.

Ati: “Twaje hano kubera impamvu zitandukanye zirimo na Visit Rwanda mu rwego rwo gukomeza kuyimenyekanisha ndetse na BK Arena. Ikindi umuyobozi wa RBA ni umwe mu bagize uruhare rukomeye kugira ngo tuze hano.”

Mu itangwa ry’ibihembo hazaba hari gutahana abahanzi batandukanye mu byiciro 27 birimo n’icyahariwe Abanyarwanda.

RBA ni kimwe mu bitangazamakuru bizifashishwa mu gushyigikira iki gikorwa ibinyujije mu miyoboro ifite.

Trace Group igiye gutangira ibi bihembo mu Rwanda ni ikigo gifite shene za televiziyo zitandukanye zikunzwe na benshi bakunda umuziki ugezweho nka Trace Africa, Trace Muzik, Trace Urban, Trace Gospel, Trace Hits n’izindi.

Trace Group yashinzwe mu 2003 ni ikigo kigari cy’imyidagaduro ku Isi gifite amashami atandukanye hirya no hino ku Isi muri Afurika, u Bufaransa, u Bwongereza, Leta Zunze Ubumwe za Amerika, Canada,Brazil, muri Caraïbes no mu bihugu biri mu nyanja y’Abahinde

Iki kigo gifite abagikurikira barenga miliyoni 350 bari mu bihugu 180 na shene za televiziyo zisaga 29, amaradiyo arenga 100 n’ababakurikira ku mbuga nkoranyamabaga barenga miliyoni 22.

Tariki 21 Werurwe 2022, ubuyobozi bwa BK Arena bwari bwakiriye itsinda ryari riyobowe n’uwatangije akaba n’Umuyobozi Mukuru wa Trace Group, Olivier Laouchez.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA