Byinshi ku mugore w’i Nyagatare witinyutse gusudira bikamuteza imbere
Amakuru

Byinshi ku mugore w’i Nyagatare witinyutse gusudira bikamuteza imbere

Imvaho Nshya

July 19, 2023

Mizero Emérence w’imyaka 28 arubatse afite umugabo n’umwana umwe. Avuka mu Karere ka Gicumbi mu Murenge wa Mukarange mu Kagari ka Mutarama mu Ntara y’Amajyaruguru.

Agira ati: “Umwuga wo gusudira ndawukunda, ni n’umwuga mwiza cyane, nta ngufu bisaba ahubwo bisaba kwiyemeza”.

Iyo abara inkuru ye, avuga ko mu 2016 yacikishirije amashuri ubwo yari ageze mu mwaka wa Gatanu w’amashuri yisumbuye.

Yahisemo gukomeza amashuri y’imyuga mu Ntara y’Amajyaruguru, ayarangije atangira imirimo y’ubushabitsi.

Ubu akorera mu Kagari ka Karutare mu Murenge wa Rwempasha mu Karere ka Nyagatare mu Ntara y’Iburasirazuba.

Mu kiganiro yahaye Imvaho Nshya yavuze ko yize gusudira kugira ngo azikorere.

Kugira ngo ashobore kubona igishoro, yakoreraga abandi ariko akajya yizigama.

Ati: “Nabyiyumvisemo numva ni wo mwuga nakora. Nabanje kwitinyuka ndangije mbona ko ari ngombwa kuba nabikora”.

Ati: “Natangiye nkorera abandi nyuma mbona igishoro ngenda nizigama amafaranga, mbona ayo kuranguza ibyuma ntangira ubwo”.

Mu buhamya bwe, agaragaza ko uyu mwuga umaze kumugeza kuri byinshi.

Yagize ati: “Nk’urugero ibyuma nkoresha ni ibyanjye. Mbirangura i Kigali nkabicuruza kandi na byo bikanyungura. Ikindi hari ubwo mfata ibyuma nkabikoramo inzugi n’amadirishya nkabicuruza. Gusudira ni byo bintunze”.

Avuga ko abakiliya baboneka kandi ko nta kibazo afite, ibyo bikajyana no kuba akora buri munsi.

Akigera mu Gasima (Agasanteri k’ubucuruzi) mu Murenge wa Rwempasha, abaturage baho ngo babanje kujya bamutinya ariko bamugera iruhande bakabona bidasanzwe kubona umugore usudira ariko ngo ubu baramumenyereye.

Ati: “Bakimbona baratangara ariko abenshi bampa akazi nta kibazo kiba gihari, niba umpaye amafaranga uyu munsi, kubera ko mba mfite ibyuma hafi yanjye mpita mbikora ku buryo komande iboneka mu minsi Itanu”.

Asaba abagore n’abakobwa kwitinyuka, bagakunda umurimo kandi bagakora, bagakura amaboko mu mifuka kugira ngo na bo bashobore kwiteza imbere.

Ati: “Gukora ni byiza cyane kuko bituma ugera ku cyo ushaka kugeraho kandi bigatuma nta n’umuntu ugusuzugura”.

Afite umukobwa yigisha gusudira kugira ngo azamufashe mu gihe kiri imbere.

Mu byo amaze kugeraho, Mizero ngo yashoboye kwiyubakira inzu, afite ibibanza yaguze, afite ubushobozi bwo kwishyurira umwana we amafaranga y’ishuri ikindi ngo yishyurira umuryango we mituweli.

Ahamya ko ntaho aragera mu kwiteza imbere ariko ngo akomeje gutekereza ibyo yakora.

Yihaye intego ko mu gihe kiri imbere azatangiza iduka ricuruza amarangi.

Yanditswe na KAYITARE Jean Paul 

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA