Nyuma y’irushanwa ryo Kwibuka, ishyirahamwe ry’umukino wa Cricket mu Rwanda “RCA” ryateguye irushanwa mu cyiciro cy’abagore “Rwanda Cricket Women’s Elite 2022”  ryatangiye taliki 20 risozwa 24  Kamena 2022.

Iri rushanwa ryakinwe n’amakipe 3, Amasimbi Hawks, Ingenzi Heroes na Ingabo Knights akaba yari agizwe n’abakinnyi  b’Abanyarwanda bitwaye neza muri shampiyona y’icyiciro cya mbere n’icya kabiri  n’abandi bakomoka mu bihugu byo hanze bari mu makipe yari yitabiriye irushanwa ryo Kwibuka.  Aba barimo  Janet Mbabazi  (Uganda), Laura Mophakedi  (Botswana), Suzanne Brereton  (Germany),  Sunday Salome  (Nigeria), Sharon Juma , Quentor Abel  (Kenya) na Nasra Nassoro (Tanzania).

Aya makipe yakinnye hagati yayo maze ikipe y’Amasimbi Hawks yegukana igikombe.

Ku munsi wa nyuma w’iri rushanwa taliki 24 Kamena 2022, ikipe y’ Amasimbi Hawks yatsinze Ingabo Knights. Muri uyu mukino wabereye kuri Sitade Mpuzamahanga i Gahanga, Amasimbi Hawks ni yo yatangiye ikubita agapira ishaka amanota “Batting” maze mu dupira 120 (20 Overs) ikora amanota 101, abakinnyi 4 bava mu kibuga (4 Wickets).

Ikipe y’ Ingabo Knights yasabwaga amanota 102 yatangiye gukubita agapira ishaka amanota “Batting” maze mu dupira 117 (19.3 Overs)ubwo yari imaze gukora amanota 93 abakinnyi 10 bose basohorwa mu kibuga (10 wickets).

Ikipe y’Amasimbi Hawks  yahise yegukana intsinzi ku kinyuranyo cy’amanota 9 (9 runs).

Iyi kipe  y’Amasimbi Hawks   yegukanye umwanya wa mbere ikurikirwa n’ Ingabo Knights  ku mwanya wa 3 haza Ingenzi Heroes.

Abakinnyi bitwaye neza

Hari awarushije abandi  mu gukubita agapira “Best Batter” ni Janet Mbabazi (Amasimbi Hawks) wanabaye uwateye agapira neza “Best Bowler” ndetse n’umukinnyi witwaye neza mu irushanwa ryose “MVP”. Uwakinnye neza mu kibuga hagati “Best Fielder” ni  Ishimwe Gisele (Ingabo Knights).

Ba uwa mbere mu kumenya amakuru agezweho!!!