Ikipe ya Challengers CC ni yo yegukanye irushanwa “Dafabet RCA T20 Men’s Tournament 2023” ryateguwe n’ishyirahamwe ry’umukino wa Cricket mu Rwanda “RCA” ku bufatanye na Dafabet.

Iri rushanwa ryasojwe taliki 13 Gicurasi 2023 ryari ryatangiye taliki 15 Mata 2023 ryari ryitabiriwe n’amakipe 6 asanzwe akina shampiyona y’icyiciro cya mbere mu bagabo ari yo Challengers CC, Right Guards CC, Zonic Tigers CC, Kigali CC, Telugu Royals CC na IPRC Kigali CC.

Aya makipe yakinnye hagati yayo hanyuma ikipe ya Challengers CC isoreza ku mwanya wa mbere naho Telugu Royals CC iza ku mwanya wa kabiri.

Taliki 13 Gicurasi 2023 ni bwo habaye umukino wo guhatanira igikombe wabereye kuri Sitade Mpuzamahanga ya Gahanga aho ikipe ya Challengers CC yitwaye neza itsinda Telugu Royals CC.

Uko amakipe yakurikiranye

Ikipe ya Challengers CC yasoreje ku mwanya wa mbere ihabwa igikombe na sheki ya miliyoni imwe. Ku mwanya wa kabiri hasoreje ikipe ya Telugu Royals CC yahawe ibihumbi 500.

Ku mwanya wa 3 hasoreje IPRC Kigali, Rihgt Guards CC (5), Zonic Tigers CC (6) na ho Kigali CC isoreza ku mwanya wa nyuma wa 6.

Ibindi bihembo byatanzwe

Obuya Robinson ukinira Challengers CC yahawe igihembo cy’uwarushije abandi gukubita agapira “Best Batter”. Mu mikino 5 yakinnye yatsinze amanota 174. Obuya yawe ibihumbi 100. Yabaye kandi  uwarushije abandi gutsinda amanota 6 inshuro nyinshi “Top six Hitter” ahabwa ibihumbi 70.  Obuya Robinson yanahawe igihembo  cy’uwakinnye neza mu kibuga “Best Fielder” aho yahawe nabwo ibihumbi 70.

Uwarushije abandi gutera agapira “Best Bowler” yabaye Ramu Moramudi ukinira  Telugu Royals CC aho mu mikino 5 yasohoye mu kibuga abakinnyi 10(10 Wickts). Yahawe ibihumbi 100.

Umukinnyi witwaye neza mu irushanwa ryose  “Player of the Tournament”  yabaye Roger Mukasa ukinira ikipe ya Telugu Royals CC aho yahawe ibihumbi 200.

Nyuma yo kwegukana igikombe, kapiteni w’ikipe ya Challengers CC, Srinath Vardhineni  yatangaje ko icyabafashije kwitwara neza ari ugushyira hamwe nk’abakinnyi. Yakomeje avuga ko bakosoye amakosa bakoze mu irushanwa rya “T10” aho batsinzwe na IPRC Kigali CC ikabatwara igikombe.

Srinath ashimangira ko bagiye gukomeza gukora cyane kugira ngo n’amarushanwa ari imbere bazitware neza.

Umuyobozi  ushinzwe ibikorwa muri RCA, Byiringiro Emmanuel  yagaragaje ko muri rusange irushanwa ryagenze neza.Yakomeje avuga ko aya marushanwa arimo gufasha abakinnyi kuzamura urwego rwabo rw’imikinire bakaba bakomeje gushaka n’abandi bafatanyabikorwa kugira ngo amarushanwa yiyongere.

Iri rushanwa ni irya kabiri nyuma  ya  “Dafabet RCA T10 Men’s Tournament 2023” ryabaye kuva taliki 18 Werurwe  kugeza 15 Mata 2023 aho ryegukanwe n’ikipe ya IPRC Kigali CC itsinze Challengers CC ku mukino wa nyuma.

Ba uwa mbere mu kumenya amakuru agezweho!!!