Ikipe ya Challengers CC na IPRC Kigali CC ni zo zizakina umukino wa nyuma  mu irushanwa “Dafabet RCA T10 Men’s Tournament 2023”, uyu mukino ukaba uteganyijwe taliki 15 Gicurasi 2023.

Iri rushanwa ryateguwe n’ishyirahamwe ry’umukino wa Cricket mu Rwanda “RCA” ku bufatanye na Dafabet ryitabiriwe n’amakipe 6 asanzwe akina shampiyona y’icyiciro cya mbere mu bagabo ari yo Challengers CC, Right Guards CC,  Zonic Tigers CC,  Kigali CC, Telugu Royals CC na IPRC Kigali CC. Aya makipe akaba yarakinnye  hagati yayo kuva taliki 18 Werurwe 2023.

Mu mpera z’iki Cyumweru gishize,  taliki 01 na 02 Mata 2023 ni bwo habaye imikino y’umunsi wa 4 n’uwa 5 ari na yo  isoza  y’amajonjora.

Taliki 01 Mata 2023 habaye imikino 3 aho ikipe ya  Right Guards CC yatsinze IPRC Kigali, Zonic Tigers CC itsinda Telugu Royals CC naho ikipe ya Challengers CC itsinda Kigali CC.

Taliki 02 Mata 2023, ikipe ya Kigali CC yatsinze Right Guards CC, Challengers CC itsinda Zonic Tigers CC  naho IPRC Kigali CC itsinda Telugu Royals CC.

Nyuma y’iyi mikino y’amajonjora, ikipe ya Challengers CC ni yo yasoje iyoboye n’amanota 10 aho yatsinze imikino yose. Yakurikiwe na IPRC Kigali CC  n’amanota 6 inganya na Zonic Tigers CC yasoreje ku mwanya wa 3. Ikipe ya Right Guards CC yasoreje ku mwanya wa 4 n’amanota 4, Kigali CC isoreza ku mwanya wa 5 n’amanota 2 inganya n’ikipe ya Telugu Royals CC yasoreje ku mwanya wa nyuma wa 6.

Biteganyijwe ko iri rushanwa “Dafabet RCA T10 Men’s Tournament 2023” rizasozwa taliki 15 Mata 2023 aho ikipe ya  Challengers CC na IPRC Kigali CC zizakina umukino wa nyuma wo guhatanira igikombe. Mu mukino w’amajonjora wahuje aya makipe yombi, Challengers CC yatsinze IPRC Kigali CC ku kinyuranyo cy’amanota 19.

Ba uwa mbere mu kumenya amakuru agezweho!!!