Ikipe ya Challengers CC na Telugu Royals CC  ni zo zizakina umukino wa nyuma w’irushanwa “Dafabet RCA T20 Men’s Tournament 2023” ryateguwe n’ishyirahamwe ry’umukino wa Cricket mu Rwanda “RCA” ku bufatanye na Dafabet.

Uyu mukino wa nyuma biteganyijwe ko uzabera kuri Sitade Mpuzamahanga  i Gahanga  ku wa Gatandatu, taliki 13 Gicurasi 2023.

Iri rushanwa “Dafabet RCA T20 Men’s Tournament 2023”  ryatangiye taliki 15 Mata 2023, ryitabiriwe n’amakipe  6 asanzwe akina shampiyona y’icyiciro cya mbere mu bagabo ari yo Challengers CC, Right Guards CC,  Zonic Tigers CC,  Kigali CC, Telugu Royals CC na IPRC Kigali CC.

Aya makipe yakinnye  hagati yayo  hanyuma ikipe ya mbere n’iya kabiri zikazakina umukino wa nyuma wo guhatanira igikombe.

Mu mpera z’icyumweru gishize taliki 06 na 07 Gicurasi 2023 habaye imikino ya nyuma y’amajonjora.

Taliki 06 Gicurasi 2023 habaye imikino ibiri aho ikipe ya Telugu Royals CC yatsinze Zonic Tigers CC naho ikipe ya Right Guards CC itsinda Kigali CC.

Taliki 07 Gicurasi 2023, ikipe ya Challengers CC yatsinze Zonic Tigers CC naho Telugu Royals CC itsinda IPRC Kigali CC.

Nyuma y’imikino y’amajonjora, ikipe ya Challengers CC ni yo yasoje iyoboye urutonde n’amanota 10 ikurikiwe na Telugu Royals CC n’amanota 6, inganya na IPRC Kigali CC iri  ku mwanya wa 3, ku mwanya wa 4 hari Right Guards CC n’amanota 5, ku mwanya wa 5 hari Zonic Tiger CC n’amanota 3 naho ku mwanya wa nyuma wa 6 hari Kigali CC aho nta nota na rimwe ifite.

Aya makipe yombi, Challengers CC na Telugu Royals CC ni yo azahatanira igikombe.

Iri rushanwa ryatangiye nyuma yo gusoza “Dafabet RCA T10 Men’s Tournament 2023” ryabaye kuva taliki 18 Werurwe  kugeza 15 Mata 2023. Iri rushanwa na ryo ryahuje aya makipe 6, ikipe ya IPRC Kigali CC ni yo yegukanye igikombe itsinze Challengers CC ku mukino wa nyuma.

Ba uwa mbere mu kumenya amakuru agezweho!!!