Taliki 12-09-2022

Umwanya wa 3

Namibia-Uganda (Gaborone-09h30)

Umukino wa nyuma

Tanzania-Rwanda (Gaborone-14h00)

Nyuma yo kwitwara neza mu mikino y’amajonjora, ikipe y’u Rwanda mu bakobwa batarengeje imyaka 19 mu mukino wa Cricket yageze ku mukino wa nyuma w’irushanwa ry’Afurika ryo gushaka itike y’igikombe cy’Isi  aho igomba gukina na Tanzania, ikipe itsinze ikabona itike yo kuzitabira igikombe cy’Isi kigiye kuba ku nshuro ya mbere “ ICC U-19 Women’s T20 World Cup 2023”.

Kuva taliki 03 Nzeri 2022 i Gaborone muri Botswana harimo kubera imikino y’Afurika yo gushaka itike y’igikombe cy’Isi mu bakobwa batarengeje imyaka 19 “ICC U-19 Women’s T20 World Cup Africa Qualifiers 2022”

Iyi kipe y’u Rwanda yageze ku mukino wa nyuma isezereye ikipe y’igihugu ya Uganda  muri ½ . Uyu mukino wabaye taliki 10 Nzeri 2022, ikipe y’u Rwanda yatangiye ikubita agapira “Batting” maze mu dupira 120 (Overs 20) ikora amanota 97, abakinnyi 6 basohorwa mu kibuga (6 wickets).

Ikipe ya Uganda yasabwaga amanota 98 yatangiye na yo gukubita agapira ishaka amanota “Batting”. Ubwo  hari hamaze gukinwa udupira 88 (14.4 Overs) abakinnyi 10 bavanwe mu kibuga (10 Wickets) mu gihe iyi kipe yari imaze gukora amanota 41. Ikipe y’u Rwanda yahise yegukana intsinzi ku kinyuranyo cy’amanota 56.

Ikipe ya Tanzania yo yageze ku mukino wa nyuma isezereye Nambia ku manota 111 ku 107.

Uyu mukino wa nyuma w’u Rwanda na Tanzania  uzaba taliki 12 Nzeri 2022 saa munani (14h00) i Gaborone akaba ari ku isaha imwe no mu Rwanda.

Mbere y’uyu mukino wa nyuma hateganyijwe umukino wo guhatanira umwanya wa 3 ugomba guhuza ikipe y’igihugu ya Uganda  na Namibia (09h30).

Inzira ikipe y’u Rwanda yanyuzemo kugera ku mukino wa nyuma

Iyi mikino yo gushaka itike “ICC U-19 Women’s T20 World Cup Africa Qualifiers 2022” yitabiriwe n’amakipe 9 aho yashyizwe mu matsinda abiri. Itsinda A ryari  rigizwe n’u Rwanda, Nigeria, Malawi, Mozambique na Tanzania naho itsinda B rigizwe na Botswana, Namibia, Sierra Leone na Uganda.

Muri buri tsinda amakipe yakinnye hagati yayo hanyuma abiri ya mbere akomeza muri ½. Mu itsinda A hazamutse Tanzania n’u Rwanda naho mu itsinda B hazamuka Uganda na Namibia.

Mu mikino y’amajonjora, ikipe y’u Rwanda yatsinze ku mukino wa mbere Nigeria amanota 79 kuri 70, itsinda Malawi amanota 197 kuri 42 inatsinda kandi Mozambique amanota  259 kuri 36  nyuma itsindwa na Tanzania 115 ku 114.

Imikino y’igikombe cy’Isi  “ICC U-19 Women’s T20 World Cup 2023” izabera muri Afurika y’Epfo muri Mutarama 2023. Iyi mikino izitabirwa n’ibihugu 16, ibihugu 15 bikaba byaramaze kubona itike ari byo South Africa izakira irushanwa, Australia, Bangladesh, England, India, Ireland, New Zealand, Pakistan, Sri Lanka, USA, West Indies, Zimbabwe, Indonesia, United Arab Emirates na Scotland.

Ba uwa mbere mu kumenya amakuru agezweho!!!